तिलाचन पाण्डे
पुस २६,२०८१ गुल्मी :राष्ट्रिय जनमोर्चाले देशका ठुला दलहरु जनताप्रति गम्भीर नभएको टिप्पणी गरेको छ ।
राष्ट्रिय जनमोर्चा जिल्ला समिति गुल्मीले शुक्रबार जिल्लाको सदरमुकाम तम्घासमा पत्रकार सम्मेलनको आयोजना गरेर देशका ठुला दलहरु जनताप्रति भन्दा पनि ब्यक्तीगत स्वार्थमा लागेको जनाएको छ ।
पार्टीका केन्द्रिय सदस्य तथा लुम्बिनी प्रदेशका सल्लाहाकार सुरेश थापाले नेपाली काँग्रेस, नेकपा एमाले र माओवादी जनताप्रति भन्दा पनि ब्यक्तिगत स्वार्थमा लागेकाले महंगी र भष्ट्राचारले सीमा नाघेको बताउनुभयो ।
दैनिक युवाहरु विदेश पलायन हुँदा पनि युवाहरुलाई स्वदेशमा राख्ने वातावरण निर्माण गर्न नसक्नु दुःखद भएको उहाँको भनाइ छ । युवाहरु देशमा नहुँदा ठुला दलहरुको विरोध कम हुने र यसैमा उनीहरु रमाएको शंका आफूहरुलाई लाग्ने गरेको उहाँको दाबी छ ।
यस्तै पार्टीले आगामी चैत २४ गतेदेखि संघीयताविरुद्ध राजधानी केन्द्रित आन्दोलन गर्न लागेको जनाएको छ । देशमा संघीयता जनताको माग र देशको राष्ट्रिय आवश्यकताका आधारमा नआएको भन्दै आन्दोलनका कार्यक्रम घोषणा गरिएको जिल्ला अध्यक्ष रामकुमार क्षेत्रीले बताउनुभयो ।
चैत २४ देखी ३० गतेसम्म राजधानी काठमाडौँमा संघीयताको खारेजी, गणतन्त्रको रक्षा, भष्ट्राचार उन्मूलन र सुशासनका लागि आन्दोलन गर्ने, जिल्लाभर माघ महिना भित्र संगठनात्मक तथा प्रचारप्रसार अभियानलाई तिव्र पार्ने जनाएको छ । पार्टीले स्थानीय स्तरमा बैठक, प्रशिक्षण,सदस्यता वितरण, टोल समितिहरुको गठन, पर्चा वितरण र कोणसभा गर्ने क्षेत्रीले बताउनुभयो ।
फागुन महिनामा आर्थिक अभियान सञ्चालन र चैत्रमा जिल्लाबाट काठमाडौंमा सयौँ जना सहभागिता बनाउने तयारी थालिएको जनमोर्चा गुल्मीले जनाएको छ । त्यस्तै रामकुमार क्षेत्रीको संयोजकत्वमा सात सदस्यीय आन्दोलन व्यवस्थापन तथा परिचालन समिति निर्माण गरिएको छ ।
