तिलाचन पाण्डे
पुस २,२०८१ गुल्मीःपछिल्लो समय गुल्मीमा शिक्षकहरुद्धारा राजीनामा दिनेको लर्को लागेको छ ।
जिल्ला शिक्षा विकास तथा समन्वय इकाई गुल्मीका अनुसार साउन १ गतेदेखी हालसम्म १८ जनाले राजीनामा दिएका छन् । प्राथमिक तहमा १६ जना, माध्यमिक तहमा दुई जना गरी कुल १८ जनाको राजीनामा स्वीकृत भएको कार्यालयका प्राविधिक सहायक रामप्रसाद पन्थीले जानकारी दिनुभयो ।
उदय माध्यमिक विद्यालय चन्द्रकोटका माध्यमिक तहमा अध्यापन गराउने भिमबहादुर थापा र जनबोध माध्यमिक विद्यालयमा गणित विषय अध्यापन गराउने गीता भण्डारीले राजीनामा दिनुभएको हो । थापाले बिरामी भएर र भण्डारीले तथ्याङक अधिकृतमा नाम निकालेर राजीनामा दिएको पन्थीले बताउनुभयो । यस्तै १७ जना शिक्षकको अनिवार्य अवकास भएको पनि उहाँले बताउनुभयो ।
पछिल्लो समयमा शिक्षण पेशामा त्यती रुचि नहुँनु र वेदैशिक रोजगारीको लहरले पनि राजीनामा दिनेहरुको सङख्यामा वृद्धि हुँदै गएको शिक्षा विकास तथा समन्वय इकाइ गुल्मीका प्रमुख थानेश्वर घिमिरेले बताउनुभयो । आफू केही महिना पहिले मात्रै गुल्मीमा आएको बताउँदै आफू आए लगत्तै राजीनामाको लर्को लागेको उहाँले जिल्ला समन्वय समिति गुल्मीमा भएको एक सार्वजनिक कार्यक्रममासमेत बताउनुभएको थियो । राजीनामा दिनेमा करिव आधाको सङख्यामा वैदेशिक रोजगार रहने गरेको उहाँको भनाइ छ ।
यता नागरिक समाज गुल्मीका अध्यक्ष पदमप्रसाद पाण्डेका अनुसार शिक्षण पेशामा आकर्षण र उचित सम्मान नहुनाले पनि बीचैमा छाड्नेको लर्को लाग्ने गरेको बताउनुभयो । यसका साथै विद्यालयहरु राजनीतिक अखडा बन्नु, शिक्षकहरुलाई जीवन निर्वाह गर्न पनि धौधौ हुनु, शिक्षण पेशामा भविष्य नदेख्नु र निजामती सेवा सरह राज्यले हेर्ने दृष्टिकोण नहुनुले पनि शिक्षण पेशाबाट राजीनामा दिने गरेको उहाँको तर्क छ । यहि अवस्था कायमै रहेमा भविष्मा शिक्षण पेशामा संकट देखा पर्न सक्ने उहाँको भनाइ छ ।
पछिल्लो समय गुल्मीमा अग्रेजी,विज्ञान र गणित विषय अध्यापन गराउने शिक्षकहरु पाउँनै मुस्किल हुन थालेको छ । केही समय पहिले सदरमुकाम तम्घासकै रेसुङगा माध्यमिक विद्यालयले माध्यमिक तहको अंग्रेजी राहत शिक्षकमा विज्ञापन गर्दा शिक्षक पाउँन सकेको थिएन । तेस्रो पटकसम्म विज्ञापन गर्दा बल्ल तल्ल शिक्षक पाएको विद्यालयका प्रधानाध्यापक भागीरथ भण्डारीले बताउनुभयो । अहिले पनि नगरपालिका भित्र जनविकास माध्यमिक विद्यालयमा निम्नमाध्यमिक तहको गणितमा र त्रिभुवन माध्यमिक विद्यालयमा अग्रेजी संघीय अनुदानमा शिक्षक अभाव भएको सूचना कार्यालयमा आएको शिक्षा विकास तथा समन्वय इकाइ गुल्मीका प्राविधिक सहायक रामप्रसाद पन्थीले बताउनुभयो ।
गुल्मीमा सामुदायीक र संस्थागत गरी ५९० विद्यालय र ५६ हजार २०३ विद्यार्थी सङख्या रहेको शिक्षा विकास तथा समन्वय इकाइ गुल्मीले जनाएको छ । जिल्लामा बालशिक्षादेखी कक्षा १२ सम्मका विद्यालयमा राहत र दरबन्दी गरी तीन हजार १५३ जनाको दरबन्दी रहेको कार्यालयले जनाएको छ ।
