अनिल खत्री
चैत ३,२०८१ गुल्मीः घरेलु तथा साना उद्योग कार्यालय गुल्मीले जिल्लाका ४ उत्कृष्ट उद्यमीलाई सम्मान गरेको छ । विश्व उपभोक्ता अधिकार दिवसको अवसर परेर जिल्लाका विभिन्न स्थानमा विभिन्न व्यवसाय गर्ने उद्यमी कृषकहरुलाई सम्मान गरिएको हो ।
सम्मानित हुनेहरुमा जिल्लाको धुर्कोट गाउँपालिका–६ का अर्याल पशुपंक्षी फर्मका सञ्चालनक मेघनाथ अर्याल, छत्रकोट गाउँपालिका वडानम्बर–५ मा सिद्धिविनायक कउषि पशुपंक्षी फर्मका सञ्चालक डालप्रसाद पन्थी रहेका छन् । त्यस्तै धुर्कोट गाउँपालिका–२ मा खनाल सुन्तला फर्मका सञ्चालक केशवराज खनाल, धुर्कोट गाउँपालिका–२ मा खनाल मौरी तथा सुन्तला फर्मका सञ्चालक पार्वती खनाल सम्मानित भएका हुन् ।
सम्मानित हुनेहरुलाई कृषि, भूमि व्यवस्था तथा सहकारी मन्त्री दिने पन्थीले जनही २५ हजारका दरले सम्मान गरेका हुन् । घरेलु तथा साना उद्योग कार्यालय गुल्मीले उत्कृष्ट उद्यमी सम्मान गर्न आवेदन खुलाएको थियो । त्यसैको आधारमा उद्यम तथा रोजगारी सृजना लगायतका विभिन्न आधारहरु छनोट गरेर सम्मान गरिएको घरेलु तथा साना उद्योग कार्यालय गुल्मीका प्रमुख राजीव अर्यालले बताउनुभयो । सोहि कार्यक्रमा जिल्ला शहकारी संघ गुल्मीलाई कफी प्रशोधन गर्ने परपल मेसिन, काटा, प्रदान गरिएको थियो ।
त्यस्तै जिल्लाको इस्मा गाउँपालिकाको वडानम्बर–३ दर्लाचौरको इस्मा रामकोट स्लेट ढुंगा उद्यमी समूहलाई ढुंगा काट्ने मेसिन प्रदान गरिएको आर्यालले बताउनुभयो । उत्कृष्ट उद्यमी सम्मान गर्दै कृषि, भूमि व्यवस्था तथा सहकारी मन्त्री दिने पन्थीले यस्ता खालका सम्मनले उद्यमी कृषकलाई प्रोत्साहन गर्ने बताउनुभयो ।
पछिल्लो समय खानपान लगायतको कारणले विभिन्न खालका रोगहरु निम्ति रहेकाले उपभोक्ताले वस्तु किन्दा सचेत हुनुपर्नेमा जोड दिनुभयो । विश्व उपभोक्ता अधिकार दिवसको अवसरमा गुल्मी उद्योग वाणिज्य संघ अध्यक्ष इश्वरीप्रसाद पौडेल, चेम्बर अफ कमर्शका अध्यक्ष दुर्गाप्रसाद पाण्डे, प्रमुख जिल्ला अधिकारी जनार्दन गौतमले विश्व उपभोक्ता अधिकार दिवसको बारेमा विभिन्न खालका धारण राख्नुभएको थियो ।
