तिलाचन पाण्डे
पुस ४,२०८१ गुल्मीः धार्मिक तथा पर्यटकीय स्थल कंके देउरालीको प्रचार प्रसार गर्नका लागि महोत्सवको आयोजना गरिएको छ ।
मदाने गाउँपालिकाको पुर्कोटमा रहेको धार्मिक तथा पर्यटकीय स्थल कंके देउरालीको प्रचार प्रसार गर्नका लागि महोत्सव आयोजना गरिएको मदाने गाउँपालिकाका अध्यक्ष महेन्द्रबहादुर कुँवरले जानकारी दिनुभयो ।
गाउँपालिकाले सदरमुकाम तम्घासमा पत्रकार सम्मेलनको आयोजना गरेर पुस ५ गतेदेखी ७ गतेसम्म प्रथम कंके देउराली कृषि, पर्यटन तथा सांस्कृतिक महोत्सव २०८१ को आयोजना गरिएको जनाएको छ । गाउँपालिकाको आयोजना र कंके देउराली पर्यटन पूर्वाधार विकास समितिको सह आयोजनामा महोत्सव गर्न लागिएको कुँवरले बताउनुभयो ।
कंके देउरालीलाई पर्यटकीय रुपमा थप प्रचार प्रसार गरी आन्तरीक पर्यटक ल्याउनका लागि महोत्सवले थप टेवा दिने कुँवरको दाबी छ । एक हजार ९५० फिट उचाइ रहेको उक्त स्थानमा कंके देउराली जलासय निर्माणको कार्य अगाडि बढेकाले पर्यटकका लागि थप आकर्षण हुने उहाँको भनाइ छ । अर्घाखाँचीको सुपा देउराली आएका पर्यटकलाई कंके देउरालीमा ल्याउने गरी योजना रहेको कुँवरले बताउनुभयो ।
यसका साथै गाउँपालिका भित्र उत्पादित कृषि उपजको प्रर्दशन गरिने उपाध्यक्ष सरिता खडकाले जानकारी दिनुभयो । गाउँपालिका भित्र रहेको प्रतिभालाई खोजी गरी मदाने तारा पनि सञ्चालन गर्न लागिएको खडकाले बताउनुभयो । महोत्सवका लागि पालिकाले चार लाख रुपियाँ बजेट ब्यबस्थापन गरेको उपाध्यक्ष खडकाले जानकारी दिनुभयो । महोत्सवको सम्पूर्ण तयारी पूरा भएको बताउँदै महोत्सवमा स्थानीय तथा राष्ट्रिय स्तरका कलाकारको प्रस्तुति रहने गाउँपालिकाले जनाएको छ ।
