तिलाचन पाण्डे
पुस १०,२०८१ गुल्मी : गुल्मीको छत्रकोट गाउँपालिकाले जिल्लामै पहिलो पटक जिपलाइन सञ्चालनमा ल्याएको छ ।
छत्रकोट गाउँपालिकाको वडानम्वर तीन देवालय मन्दिर परिसरबाट देवी भगवती मन्दिरसम्म एक हजार असी मिटरको लम्वाइमा जिपलाइन सञ्चालनमा ल्याएको हो । जिपलाइन सञ्चालनमा आएपछि आन्तरिक तथा बाह्य पर्यटक बढ्ने गाउँपालिकाले विश्वास लिएको छ ।
लुम्विनी प्रदेश र गाउँपालिकाको ८६ लाख ७३ हजार १४४ रुपियाँको संयुक्त लगानीमा सानु सेतीदेवी कन्ट्रक्सन प्रालि काठमाण्डौँले निर्माणको कार्य सम्पन्न गरी जिपलाइन सञ्चालनमा ल्याएको प्रमुख प्रशासकीय अधिकृत रुद्रहरी पुरीले जानकारी दिनुभयो । जिप लाइनले आन्तरिक पर्यटकमा वृद्धि हुने र यस क्षेत्रको थप प्रचारमा टेवा पुग्ने गाउँपालिकाले विश्वास लिएको गाउँपालिकाका अध्यक्ष रामप्रसाद पाण्डेले बताउनुभयो । जिपलाइनबाट हिमाल, पहाड र तराइ देख्न सकिने भएकाले आन्तरिक पर्यटकहरु आउनेमा आफू ढुक्क रहेको उहाँको दाबी छ । यस क्षेत्रमा पिक्नीक स्थल र धार्मिक स्थल पनि भएकाले यहाँ आएका धेरै जसो ब्यक्तिहरु जिपलाइन प्रयोग गर्ने पालिकाले दाबी गरेको छ ।
जिपलाइनको शुल्क पनि अन्यत्र भन्दा सस्तो रहेकाले अन्य स्थानको तुलनामा बढी चल्ने पाण्डेको दाबी छ । जिपलाइन चढ्ने विद्याथीका लागि तीन सय, छत्रकोट गाउँपालिका भित्रका नागरिकका लागि चार सय, पालिका भन्दा वाहिरका नागरिकका लागि पाँच सय र विदेशी नागरिकका लागि एक हजार पाँच सय शुल्क निर्धारण गरिएको प्रमुख प्रशासकीय अधिकृत पुरीले बताउनुभयो ।
जिपलाइन सञ्चालनका लागि निजी क्षेत्रलाई जिम्मा दिने गरी पालिकाले तयारी गरेको बताउँदा निजी क्षेत्र नआउन्जेल पालिकाले नै ब्यबस्थापन गरेर चलाउने उहाँले बताउनुभयो ।
जिपलाइन चढ्नेका लागि १० लाख रुपियाँको दुर्घटना विमा गरिएको पुरीले बताउनुभयो । सुरुको स्टेशनदेखी ल्यान्डिङ हुने स्थानसम्मको समय ५५ देखी ७७ सेकेण्डसम्म लाग्ने छ । नगरकोट जिपलाइन प्रालिका दुइ जना दक्ष प्राविधिकद्धारा स्थानीय तीन जना र नगर प्रहरी दुई जना गरी पाँच जनालाई १२ दिनको तालिम प्रदान गरी जिपलाइन सञ्चालनमा ल्याइएको गाउँपालिकाले जनाएको छ ।
