तिलाचन पाण्डे
मंसिर १७,२०८१ गुल्मीः अझै पनि समाजमा महिलाहरुले केही गर्न सक्दैनन् भन्ने प्रसस्त उदाहरणहरु पाइन्छन् । उनीहरु खाली घरको चुलो चौकोमा मात्र सीमित रहने भन्ने भास्य पनि समाजमा प्रयाप्त पाइन्छ ।
तर गुल्मीमा भने एक सहकारी संस्थाको नेतृत्व नै महिलाहरुले गर्दै मासिक ३० रुपियाँका दरले बचत गर्दै आएको उक्त सहकारीमा अहिले सात करोड बढीको पुँजी रहेको छ ।
सदरमुकाम तम्घासमा रहेको अमरकल्याण महिला विकास बहुउद्येश्यीय सहकारी संस्थामा अहिले सात करोड बढीको पुँजी भएको ब्यवस्थापक अञ्जु पन्थीले जानकारी दिनुभयो ।
२०६२ साल असार ३० गते सहकारी डिभिजन सहकारी कार्यालय पाल्पामा दर्ता भई कार्य सुरु गरेको सहकारीमा अहिले सात करोड ५३ लाख ३१ हजार ६३९ रुपियाँ कुल पुँजी रहेको पन्थीले बताउनुभयो ।
१९ औँ वार्षिक साधरण सभामा सहकारीको माध्यमबाट शुपथ पसल सञ्चालन, कृषि तथा ब्यपारहरुमा लगानी गर्दै आएको संस्थाले जनाएको छ । महिलाहरुले सञ्चालन गरेको सहकारीको माध्यमबाट आफूहरु ढुक्कका साथ आफना कुराहरु राख्न सक्ने र स सानो रकमका लागि श्रीमानको मुख ताक्नुपर्ने अवस्थाको अन्त्य भएको संस्थाका उपाध्यक्ष गीता पाण्डेले जानकारी दिनुभयो ।
सहकारीले जिल्लामा लैङगिक हिंसामा परेका महिला तथा बालबालिकालाई अल्पकालीन आस्रय दिनुका साथै उचित मार्ग देखाउँदै आएको पन्थीले बताउनुभयो ।
१९ औँ साधारण सभाको उद्घाटन गर्दै रेसुङगा नगरपालिकाका उपप्रमुख अमृतादेबी कुँवरले महिलाहरु पनि पछिल्लो समयमा उदाहरणीय कार्यमा लागेको भन्दै अझै परिस्कृत भएर लाग्नुपर्नेमा जोड दिनुभयो । पहिले चुलो चौकोमा मात्रै सीमित रहने महिलाहरु अहिले खुलेरै नेतृत्व गर्ने स्थानमा पुग्नु गर्वको विषय भएको बताउनुभयो ।
पछिल्लो समयमा केही सहकारी संस्थाहरुको बदनियतका कारण सबै सहकारीहरुलाई ट्याग लाग्ने गरेको बताउँदै सहकारीलाई सही तरिकाले सञ्चालन गर्न उहाँले आग्रह गर्नुभयो । नगरपालिकाले नगरभित्रका सहकारीहरुलाई नियमन गर्ने अधिकार पनि भएकाले सुक्ष्म तरिकाले नियालेको उहाँको दाबी छ । शनिवार सम्पन्न १९ औँ साधारण सभा तथा छैठौँ अधिवेशनबाट गीता पाण्डे अध्यक्षमा निर्वाचित हुनुभएको छ ।
जसको उपाध्यक्षमा बिष्णुमाया शिरिस,सचिवमा दीपा ज्ञवाली पन्थी, कोषाध्यक्षमा सुन्धरा गैरेसहित ९ जनाको कार्यसमिति रहेको ब्यबस्थापक अञ्जु पन्थीले जानकारी दिनुभयो । यस्तै लेखा समितिको संयोजकमा रस्मिता भण्डारी पाण्डे , सदस्यहरुमा विमला श्रेष्ठ र कमला थापा चयन भएको पन्थीले बताउनुभयो । निर्वाचित समितिको कार्यकाल चार वर्षको रहने छ ।
