जेठ १२,२०८३ बागलुङ : बागलुङको बडिगाड गाउँपालिका क्षेत्रमा गएराति आएको भीषण हावाहुरी र असिनापानीसहितको वर्षाले ठुलो क्षति पुर्‍याएको छ । प्राकृतिक विपत्तिका कारण दुई दर्जनभन्दा बढी घरमा क्षति पुगेको स्थानीयले बताएका छन् ।

विशेषगरी तीव्र हावाहुरीले घरका छाना उडाउने, भित्तामा चिरा पार्ने तथा विद्युत् आपूर्ति अवरुद्ध हुने समस्या निम्त्याएको हो । रातिको समयमा आएको विपत्तिले स्थानीय बासिन्दा त्रसित बनेका थिए ।

स्थानीयका अनुसार डेमबहादुर घिमिरे, डुकुराज घिमिरे, चेमकली घिमिरे, मनिषा घिमिरे, तारापति घिमिरे, भीमबहादुर रास्कोटी, कल्पना घिमिरे, देविचन रास्कोटी, अमृत जिसी, सागर जिसी, अमरबहादुर पाइजा लगायतका घरमा बढी क्षति पुगेको छ ।

धेरै घरका जस्तापाता उडेको, गोठ तथा भण्डारण कक्षमा क्षति पुगेको र खाद्यान्नसमेत भिजेर नष्ट भएको बताइएको छ । विपत्तिपछि गाउँमा विद्युत् सेवा पनि अवरुद्ध भएको छ भने केही परिवार सुरक्षित स्थानतर्फ सारिन बाध्य भएका छन् । यद्यपि हालसम्म मानवीय क्षति भने नभएको स्थानीयवासीले बताएका छन् ।

हावाहुरी र असिनापानीले घर तथा भौतिक संरचनासँगै किसानले लगाएको मकैबालीसमेत पूर्ण रूपमा नष्ट भएको छ । केही दिनअघिसम्म हरियाली देखिएको बारी अहिले उजाड बनेपछि किसान चिन्तित बनेका छन् । वर्षदिनको आशा बोकेको मकैबाली एकै रातमा नष्ट भएपछि स्थानीय किसान भावुक बनेका छन् ।

स्थानीय कृषकका अनुसार यस वर्ष राम्रो उत्पादन हुने अपेक्षा गरिएको मकैबाली असिनाले सखाप पारेपछि खाद्यान्न संकटको चिन्ता बढेको छ । “घर पनि बिग्रियो, बाली पनि सखाप भयो, अब कसरी वर्ष कटाउने भन्ने चिन्ता थपिएको छ,” एक पीडित किसानले दुखेसो पोख्नुभयो ।

बडिगाड गाउँपालिका–५ का वडा अध्यक्षसहित प्रहरी टोलीले क्षतिको विवरण संकलन सुरु गरेको जनाएको छ । प्रभावित परिवारलाई तत्काल राहत तथा पुनःस्थापनाको व्यवस्था गर्न स्थानीयले माग गरेका छन् ।

प्राकृतिक विपत्तिले ग्रामीण भेगका नागरिक अझै पनि असुरक्षित अवस्थामा बाँचिरहेको यथार्थ उजागर गरेको स्थानीय बुद्धिजीवीहरूको भनाइ छ । हाल प्रभावित क्षेत्रमा क्षतिको यथार्थ विवरण संकलन तथा राहत वितरणको तयारी भइरहेको छ । गोरखापत्र अनलाइन

जेठ ९,२०८३ म्याग्दी : चीन र भारत जोड्ने काली गण्डकी कोरिडोरको बेनी–जोमसोम–कोरला सडकअन्तर्गत कोवाङ–जोमसोम खण्डको ठेकेदारसँगको ठेक्का सम्झौता तोडिएको छ ।

मुस्ताङको थासाङ गाउँपालिकाको कोवाङ खन्तिदेखि टुकुचे, मार्फा हुँदै जिल्ला सदरमुकाम जोमसोम बजार जोड्ने १७ किलोमिटर दूरीको सडक नौ वर्षदेखि अलपत्र बनाएको निर्माण कम्पनीसँगको सम्झौता तोडिएको बेनी–जोमसोम–कोरला सडक योजना कार्यालयले आज सार्वजनिक सूचनामार्फत जानकारी गराएको हो ।

योजना प्रमुख तेजस्वी शर्माले दुई वर्षमा सम्पन्न गर्नुपर्ने काम सात पटक म्याद थप गर्दा पनि नसकेको निर्माण कम्पनी पप्पु–गौरी पार्वती कोसी एन्ड न्यौपानेसँगको ठेक्का तोडेर अधुरो काम पूरा गर्न नयाँ प्रक्रिया अघि बढाइएको जानकारी दिइन ।

“सातौँ पटक थपिएको २०८२ असोज २५ गतेसम्म निर्माण सम्पन्न हुनुपर्नेमा म्याद सकिएको २०० दिन पुग्दासमेत कम्पनीले प्रतिबद्धता र शर्त पालनामा जिम्मेवार नदेखिएकाले सार्वजनिक खरिद ऐन, २०६३ को दफा ५९ ९७० को आधारमा ठेक्का अन्त्य गरिएको हो”,उनले भनिन, “८५ प्रतिशत भौतिक प्रगति भएको कोवाङ–जोमसोम खण्डको बाँकी काम पूरा गर्न नयाँ प्रक्रिया अघि बढाउँछौँ ।”

विसं २०६४ मा मार्ग खुलेको सडक चक्लाउने, पर्खाल, नाली बनाउने र ११ मिटर चौडाइका दरले अक्सफाल्ट प्रविधिको कालोपत्रे र ढलान गर्न २०७४ साल जेठ ९ गते उक्त कम्पनीसँग रु ७० करोडमा ठेक्का सम्झौता भएको थियो । पर्वतको मालढुङ्गादेखि म्याग्दी हुँदै मुस्ताङको कोरलानाका जोड्ने २०२ किलोमिटर दूरीको सडक स्तरोन्नतिका लागि ११ खण्डमा सञ्चालित आयोजनामध्ये कोवाङ–जोमसोम खण्डमात्र अलपत्र बनेको हो ।

आयोजनाका अनुसार उक्त सडक निर्माणका लागि कम्पनीलाई ठेक्का तोड्नुअघि कुल ठेक्का सम्झौता लागतको ०।०५ प्रतिशत हुनेगरी जरिवाना रकम कायम गरिएको छ । थासाङ गाउँपालिकाको टुकुचेमा ४०० मिटर कालोपत्रे र ३०० मिटर आरसिसी ढलान बाँकी छ ।

साथै सोहीखण्डको मार्फा राजखोलाको पक्की पुलबाट माथिल्लो क्षेत्रमा करिब एक हजार २०० मिटर कालोपत्रे गर्न बाँकी रहेको छ । जोमसोमका पुथाङ विमानस्थल माथिबाट नेपाली सेनाको ब्यारेकसम्म करिब ५०० मिटर सडकमा ‘स्टक्चर’ र कालोपत्रे गर्न बाँकी रहेको छ ।

अन्य ठाउँमा कालोपत्रे र ढलान भइसकेको छ । कोबाङ–जोमसोम सडक कालोपत्रे नहुँदा पर्यटक, स्थानीयका साथै सवारीसाधन र पैदल यात्रीलाई सास्ती हुँदै आएको छ ।

जेठ ९,२०८३ : उत्तरी चिनको एउटा कोइला खानीमा ग्यास विस्फोट हुँदा कम्तीमा आठ जनाको मृत्यु हुनुका साथै दर्जनौँ वेपत्ता भएको जनाइएको छ । सिन्ह्वा समाचार एजेन्सीका अनुसार शानक्सी प्रान्तको लिउसेनयु कोइला खानीमा शुक्रबार साँझ ७ः२९ बजे विस्फोट भएको थियो ।

विस्पोटको समयमा २४७ जना कामदारहरू कोइलाखानीमै फसेको उल्लेख गर्दै ती मध्ये २०१ लाई शनिबार सुरक्षित रूपमा उद्धार गरिएको सिन्ह्वाले जनाएको छ ।

स्थानीय आपतकालीन व्यवस्थापन अधिकारीहरूलाई उद्धृत गर्दै सिह्न्वाले आठ जनाको मृत्यु भएको पुष्टि गरेको छ भने ३८ जना अझै वेपत्ता रहेकाले उनीहरुको खोजी कार्य जारी रहेको बताएको छ ।

राष्ट्रपति सी जिनपिङले घाइतेहरूको उपचार गर्न सम्भावित “सबै प्रयास“ गर्न आग्रह गदै घटनाको गहन अनुसन्धान गर्न आह्वान गरेको सिन्ह्वाले जनाएको छ ।

उहाँले सबै क्षेत्र र विभागहरूले यो दुर्घटना बाट पाठ सिकेर कार्यस्थलको सुरक्षाको सन्दर्भमा निरन्तर सतर्क रहनु पर्ने र विनाशकारी घटनालाई नियन्त्रण गर्नु पर्ने कुरामा जोड दिनुभएको छ ।

यस अघि नै सिन्ह्वाले ग्यास–खानीमा कार्बन मोनोअक्साइडको स्तर–एक अत्यधिक विषाक्त स्थरमा पुगेको रिपोर्ट गरेको थियो । वेपत्ता रहेकाहरुका केहीको अवस्था “गम्भीर“ रहेको अघिल्लो रिपोर्टले जनाएको छ ।

पछिल्लो समयमा चिनमा खानीको सुरक्षामा सुधार आएको भएता पनि मनग्य सुरक्षा प्रावधानहरु अवलम्वन गर्न नसकिएकाले अझै पनि बारम्बार दुर्घटनाहरू हने गरेका छन् ।

जेठ ९,२०८३ स्याङ्जा : प्रशासनले सार्वजनिक स्थलमा सुर्तिजन्य बस्तुहरु बिक्री वितरण र सेवनमा रोक लगाएको छ ।

जिल्ला प्रशासन कार्यालय स्याङ्जाले सूर्तिजन्य पदार्थको बिक्री, वितरण तथा सेवनसम्बन्धी कानुनी व्यवस्था कडाइका साथ पालना गर्न सबैलाई आग्रह गरेको छ । कार्यालयले सूचना जारी गर्दै सार्वजनिक स्थलमा धूम्रपान तथा सूर्ति सेवन गर्न नपाइने व्यवस्था सर्वसाधारण र सरोकारवाला सबैलाई पुनः स्मरण गराएको हो ।

धूम्रपान तथा सूर्ति सेवन मानव स्वास्थ्यका लागि हानिकारक मात्र नभई आर्थिक, सामाजिक र सांस्कृतिक क्षेत्रमा समेत नकारात्मक असर पार्ने भएकाले यसको नियन्त्रण आवश्यक रहेको उल्लेख गर्नुभएको छ । प्रशासनले जारी गरेको सूचनालाई अवज्ञा गरेमा कानून अनुसारको कारवाही गर्ने प्रशासनले चेतावनीसमेत दिएको छ ।

जेठ ९,२०८३ ताप्लेजुङ : इन्द्रावती खोलामा आएको बाढीले मोटरेवल -मोडर गुड्ने पुलमा क्षति पुर्‍याउँदा यातायात सेवा अवरुद्ध भएको छ । ताप्लेजुङ र पाँचथरको सिमाना भई बग्ने इन्द्रावती खोलाले मोटरेवल पुलमा क्षति पुर्‍याउँदा यातायात सेवा पूर्णरुपमा अवरुद्ध बनेको हो ।

ताप्लेजुङको सिदिङ्वा गाउँपालिका–४ साब्लाखु र पाँचथरको याङ्वरक गाउँपालिका–४ थर्पु जोड्नेगरी इन्द्रावती खोलामा निर्माण गरिएको मोटरेवल पुलमा बाढीले क्षति गरेको हो । साब्लाखुका स्थानीय सञ्जय पन्दाकका अनुसार शुक्रबार राति इन्द्रावती खोलामा आएको बाढीले पुलमा क्षति पुर्‍याएको हो ।

बाढीले मोटरेवल पुलको साब्लाखुतर्फको भागमा क्षति गरेको पन्दाकले जानकारी दिनुभयो । पक्की संरचनाभन्दा बाहिरीतर्फ करिव छ मिटर जति पुलको जिपमा बाढीले क्षति पु¥याउँदा यातायात सेवा पूर्णरुपमा अवरुद्ध बनेको उहाँले बताउनुभयो । पुलको पक्की संरचना पनि निकै जोखिममा रहेको उहाँले जानकारी दिनुभयो ।

पुलमा क्षति भई सडक अवरुद्ध हुँदा ताप्लेजुङको सिदिङ्वा गाउँपालिका क्षेत्र र सिरिजङ्घा गाउँपालिकाको वडा नं। ७ खेवाङ र वडा नं। ८ याम्फुदिनबाट सञ्चालन हुने लामो तथा छोटो दूरी यातायात सेवा ठप्प भएको छ । सिदिङ्वा गाउँपालिकाकी उपाध्यक्ष कृष्णकुमारी कडरिया (बन्दनां) का अनुसार बाढी पुलमा क्षति गरेपछि सिदिङ्वाका विभिन्न वडाबाट सदरमुकाम फुङ्लिङ र लामो दूरीतर्फ पाँचथर, इलाम हुँदै अन्यत्र जाने सवारी साधन रोकिएका छन् ।

यस्तै सिदिङ्वातर्फ भित्रने यात्रु तथा मालबाहक सवारी साधन पनि पाँचथरतर्फ नै रोकिएका उपाध्यक्ष कडरियाले जानकारी दिनुभयो । उहाँका अनुसार शुक्रबार साँझपछि इन्द्रावती खोलाको शिरतर्फ ठुलो वर्षा भएको र वर्षाका कारण बाढी आएको हो । बाढीले उक्त मोटरेवल पुलबाहेक अन्य स्थानमा क्षति गरे नगरेको अवस्थाबारे अहिलेसम्म कुनै जानकारी प्राप्त नभएको पनि उहाँले बताउनुभयो । गोरखापत्रबाट

जेठ ७,२०८३ काठमाडौँ : सरकारले बकर इद -इद–उल–अजहा का अवसरमा आगामी जेठ १४ गते सार्वजनिक बिदा दिने भएको छ । गृह मन्त्रालयका प्रवक्ता आनन्द काफ्लेले बिहीबार सूचना जारी गर्दै मुस्लिम आयोगबाट प्राप्त जानकारीअनुसार यस वर्ष बकर इद जेठ १४ गते परेको जानकारी दिनुभयो ।

वि।सं। २०८२ मङ्सिर १६ गते नेपाल राजपत्रमा प्रकाशित सूचनाअनुसार इस्लाम धर्मावलम्बीहरूको पर्व बकर इदका दिन सार्वजनिक बिदा दिने व्यवस्था रहेकाले जेठ १४ गते बिदा हुने मन्त्रालयले स्पष्ट पारेको छ ।

मन्त्रालयले स्वदेश तथा विदेशमा रहेका सम्पूर्ण इस्लाम धर्मावलम्बी नेपाली दिदीबहिनी तथा दाजुभाइहरूमा शुभकामना पनि व्यक्त गरेको छ ।