चैत १६,२०७९ गुल्मीः गुल्मीमा भुस्याहा कुकुरहरुको आतंक बढेपछि तम्घासका कुकुरलाई छौप्दै स्थायी बन्ध्याकरण गर्ने अभियान सुरु गरिएको छ ।

जिल्लाको सदरमुकाम तम्घासमा कुकुरको आंतक अत्याधिक भएपश्चात बजारका भुस्याहा कुकुरहरुको बन्ध्याकरण गर्ने अभियान सुरु गरिएको छ ।

कुकुरहरुले बालबालिका झम्टने ,रातिको समयमा यात्रा गर्न पनि असहज हुने र दुर्घटना समेत निम्त्याउने भएकाले कुुकुरहरुमा स्थायी बन्ध्याकरण गर्ने अभियान चलाएको भेटिरेनरी अस्पताल तथा पशु सेवा विज्ञ केन्द्र गुल्मीका प्रमुख भरत काफलेले जानकारी दिए ।

कुकुरहरुमा बन्ध्याकरण गर्दा रेविज बिरुद्धको खोप दिएर गरिने भएकाले रेविजको जोखिम पनि कम हुने ,कुकुरहरुमा स्तन र पाठेघरको क्यान्सर कम हुने , भएकाले उत्तम विकल्प भनेकै स्थायी बन्ध्याकरण रहेको काफ्लेले बताए ।
यसरी स्थायी बन्ध्याकरण गर्दा कुकुरहरुको आयु पनि बढी हुने ,मोटाउने र स्वच्छ रहने काफलेको दाबी छ ।

अहिले कम्तिमा एक सय कुकुरको बन्ध्याकारण गरिने कार्यालयले जनाएको छ ।

रातीको समयमा टोलटोलमा कुुकुरहरु जम्मा भएर सुत्न पनि नदिने ,बालबालिकाहरुको पनि जोखिम भएको र सवारी दुर्घटना समेत पर्न सक्ने भएकाले कुकुरको ब्यबस्थापन गर्न रेसुंगा नगरवासीहरुले नगरलाई समेत आग्रह गर्दै अएका छन् ।

चैत १५,२०७९ गुल्मीः  चैत १७ गतेदेखी सुरु हुने एसइई  परीक्षाका लागि गुल्मीमा सबै तयारी पूरा भएको छ ।

शिक्षा बिकास तथा समन्वय इकाई गुल्मीले बुधबार पत्रकार सम्मेलनको आयोजना गरेर सबै तयारी पूरा भएको जानकारी गराएको हो ।

कार्यालय प्रमुख लोकनाथ मरासिनीका अनुसार जिल्लामा १४० बिद्यालयका  ४ हजार ७२२ बिद्यार्थीहरु सहभागी हुनेछन् । जसमा १६ वटा प्राविधिक धार बिद्यालयका ३४२ जना परीक्षार्थीहरु सहभागी हुनेछन् भने खुल्ला बिद्यालयका ४२ जना पनि परीक्षामा सहभागी हुने मरासिनीले बताए ।

जिल्लामा कुल २८ वटा केन्द्रहरुका केन्द्राध्यक्ष र सहायक केन्द्राध्यक्षहरुका लागि अभिमुखीकरण गरि परीक्षा केन्द्रहरुमा पठाई सकिएको छ ।

परीक्षा केन्द्रमा परीक्षाको अनुगमन गर्दा भिडभाड नहुने गरी ब्यबस्था मिलाइएको छ । वडा स्तरमा वडा अध्यक्ष र पालिका स्तरमा प्रमुख तथा अध्यक्ष ,उपाध्यक्ष ,प्रमुख प्रशासकीय अधिकृत र शिक्षा शाखाका कर्मचारीहरुबाट अनुगमनको ब्यबस्था मिलाइएको मरासिनीले बताए । यसका साथै जिल्ला स्तरबाट पनि अनुगमनको ब्यबस्था गरिएको हो ।

सूर्य सुनार
चैत १५,२०७९ गुल्मीः गुल्मेली अधिकृत समाजले रेसुङ्गा संरक्षण समितिलाई बातावरण मैत्री डोको वितरण गरेको छ । बुधबार एक कार्यक्रमका बिच अधिकृत समाजबाट ५० वटा डोको वितरण गरिएको हो ।

रेसुङ्गा क्षेत्रमा सफा र स्वाच्छ राख्न सहयोग पुग्ने उदेश्यले डोको वितरण गरेको संस्थाका अध्यक्ष तथा नेपाल सरकारका पूर्व सचिब शंकरप्रसाद खरेलले जानकारी दिनुभयो । पछिल्लो समय विभिन्न किसिमका फोहोरले गर्दा वातावरणमा नकारात्मक असरहरु देखा परेको उहाँले बताउनुभयो । दिगो विकासको महत्वपूर्ण पाटो भनेको वातावरण संरक्षण भएको हुँदा त्यसको संरक्षणमा लागि परेको बताउनुभयो ।

कार्यक्रमका प्रमुख अतिथि लुम्बिनी प्रदेश सांसद डिल्लीराज भुसालले आफू पहिले देखी अहिले सम्म निरन्तर रुपमा रेसुङ्गा क्षेत्रको विकासकोे निम्ती काम गरेको बताउनुभयो । रेसुङ्गा क्षेत्रको सिडि देखी गर्जुरामा पार्क निर्माण सम्म रेसुङ्गाको पर्यटकीय विकासमा काम गरेको बताउनुभयो । रेसुङ्गाको भ्रमण गर्दा पूर्वप्रधानमन्त्री केपी शर्मा ओलीले यस क्षेत्रको बारेमा प्रशंसा गर्दा धेरै खुशी लागेको भुसालले बताउनुभयो ।  साथै आगमी दिनमा पनि रेसुङ्गाको विकास गर्न आफू तयार रहेको बताउनुभयो ।

प्रमुख जिल्ला अधिकारी सागरमणी पाठकले रेसुङ्गा धार्मिक र पर्यटकीय हिसाबले धेरै महत्वभएको ठाउँ हुँदा यसको विकासको निम्ती सबै लाग्नुपर्ने बताउनुभयो ।

रेसुङ्गा संरक्षण समितिका अध्यक्ष सुरेशचन्द्र भुसालले यहाँको वातावरण सफा र स्वाच्छ राख्नुपर्छ भन्ने उदेश्यले पवित्र काम गुल्मेली अधिकृत समाजले गरेको प्रति धन्यवाद व्यक्त गर्नुभएको थियो ।

कार्यक्रममा सहायक प्रमुख जिल्ला अधिकारी हरिप्रसाद गैरे, गुल्मेली अधिकृत समाजका उपाध्यक्ष दामोदर भणडरी, गुल्मी उद्योग वाणिज्य संघका उपाध्यक्ष ताराप्रसाद भुसाल लगायतको उपस्थित रहेको थियो ।