कात्तिक २२,२०८२ : लमजुङमा बलेरो जिप दुर्घटना हुँदा दुई जनाको मृत्यु भएको छ ।

मर्स्याङ्दी गाउँपालिका–६ नाइचेस्थित सडकमा जिप दुर्घटना हुँदा चालकसहित त्यसमा सवार एक जनाको मृत्यु भएको हो । मर्स्याङ्दी–३ खुदी बजारबाट सिमेन्ट बोकेर गएको हिदीखोला हाइड्रोपावरको बा ८च ३७३१ बलेरो जिप गएराति करिब ११ः३० बजे दुर्घटना भएको थियो ।

दुर्घटनामा परी मृत्यु हुनेमा जिपका चालक दोलखा मेलुङ गाउँपालिका–४ का ३० वर्षीय बिनोद खड्का र गाडीमा सवार सोही ठेगानाका २५ वर्षीय पारस खड्का रहेको जिल्ला प्रहरी कार्यालय लमजुडका सूचना अधिकारी प्रहरी निरीक्षक ज्ञानेन्द्र बहादुर क्षेत्रीले जानकारी दिनुभयो । दुर्घटनामा परी घाइते हुनेमा ताप्लेजुङको सिदिङ्वा गाउँपालिका–४ का २० वर्षीय उमेश लिम्बु रहनुभएको छ । उहाँको अवस्था सामन्य रहेको प्रहरीले जनाएको छ ।

दुर्घटनाबारे राति १२ः३० बजे जानकारी पाएपछि बाहुनडाँडा र खुदी चौकीबाट प्रहरी टोली खटिई घाइतेको उद्धार गरी उपचारका लागि प्रदेश अस्पताल लमजुङ ल्याएको थियो । गम्भीर घाइते दुईजनाको उपचारको क्रममा चिकित्सकद्वारा मृत घोषणा गरेको प्रहरीले जनाएको छ ।

आफैं अनियन्त्रित भई जिप सडकबाट करिब आठसय मिटर तल खसेर दुर्घटना भएको र सो घटनाबारे थप अनुसन्धान भइरहेको प्रहरीले जनाएको छ । गोरखापत्रबाट

कात्तिक २१,२०८२ काठमाडौँ : आज नेपाली बजारमा सुनको मूल्य तोलामा ६ सय रुपैयाँले बढेको छ ।

नेपाल सुनचाँदी व्यवसायी महासंघका अनुसार आज सुनको प्रतितोला मूल्य २ लाख ३८ हजार चार सय रुपैयाँ तोकिएको छ ।

कात्तिक २१,२०८२ काठमाडौँ ः नेपालको सुदूरपश्चिम क्षेत्र दार्चुला नजिक भूकम्पको धक्का महसुस गरिएको छ । भूकम्प मापन केन्द्रका अनुसार बिहीबार राति १० बजेर ४० मिनेटमा दार्चुला जिल्लाको तवाघाट आसपास भारत सीमाक्षेत्र केन्द्रबिन्दु भएर स्थानीय रिक्टर स्केल अनुसार ४दशमलव १ म्याग्निच्युडको भूकम्प गएको जनाएको हो ।

भूकम्पको प्रभाव दार्चुला आसपासका क्षेत्रमा हल्का रूपमा महसुस गरिएको भए पनि अहिलेसम्म कुनै मानविय क्षति वा भौतिक नोक्सानीको विवरण प्राप्त भएको छैन ।

सुदूरपश्चिमका विभिन्न जिल्लामा पछिल्ला वर्षहरूमा साना ठुला भूकम्पका झट्का अनुभव भइरहेका छन् । भूगर्भ विभागले नागरिकलाई सचेत रहन र आधिकारिक जानकारीका लागि विभागको सूचना अनुसरण गर्न आग्रह गरेको छ । गोरखापत्र

कात्तिक १९,२०८२ काठमाडौँ : नेपाली बजारमा बुधबार सुनको मूल्य प्रतितोला ११ सय रुपैयाँले घटेको छ ।

नेपाल सुनचाँदी व्यवसायी महासंघका अनुसार आज बुधबार सुनको कारोबार मूल्य प्रतितोला दुई लाख ३७ हजार दुई सय रुपैयाँ तोकिएको छ । अघिल्लो दिन यो मूल्य २ लाख ३८ हजार तीन सय रुपैयाँ कायम रहेको थियो ।