गुल्मी २०७६ भाद्र ३०  

चारधामध्यकै एक धाम मानिने गुल्मीको ऐतिहासिक तथा धार्मिक स्थल रुरुधाम रिडीमा शुरु भएको महायज्ञ जारी रहेको छ । गुल्मी, पाल्पा र स्याङजाको संगमस्थलमा पर्ने रुरुक्षेत्रधामको पहिचानलाई विश्वसामु पु–र्याउने तथा त्यस क्षेत्रको विकासका लागि नेपालमै पहिलोपटक ऐतिहासिक महायज्ञ सञ्चालन भएको हो ।  ऐतिहासिक रुरु धार्मिक तथा सांस्कृतिक तुलादान महामहोत्सव एवं संगीतमय लीलामय श्रीमदभागवत पितृमोक्ष विराट ज्ञान महायज्ञ–२०७६ यहि भाद्र २८ गते नेपाल सरकारका परराष्ट्रमन्त्री तथा गुल्मी क्षेत्र नं –१ का सांसद प्रदिप ज्ञवालीले उदघाटन गर्नुभएको थियो ।

महायज्ञ सञ्चालन भएसँगै त्यस क्षेत्र अहिले महायज्ञमय भएको छ र हजारौँ श्रद्धालुको आवतजावत तथा आगमनले रुरु क्षेत्र निकै उल्लासमय भएको छ ।
महायज्ञको प्रमुख वाचक विश्वविख्यात श्रीमदभागवत कथा प्रवक्ता बालयोगेश्वर महाराज श्री रहनुभएको छ ।  हजारौँ भक्तजन तथा दैनिकजसो देशका प्रमुख बिशिष्ट व्यक्तित्वहरुको सहभागीतामा महायज्ञ सञ्चालन भईरहेको छ ।

महायज्ञका संयोजक गुरुप्रसाद ज्ञवाली भन्नुहुन्छ ‘‘रुरुधामले अब मुहार फेर्दै छ ’’

महायज्ञको तेश्रो दिन आज पनि हजारौँ भक्तजनहरुको सहभागीता रहेको थियो । महायज्ञका संयोजक गुरु प्रसाद ज्ञवालीले महायज्ञ निकै उत्साहपूर्ण रुपमा सञ्चालन भईरहेको बताउनुभएको छ ।

असोज १७ गते सम्म चल्ने महायज्ञको सोमबार तेश्रो दिनसम्म आई पुग्दा दानवीरहरले खुलेरै सहयोग प्रदान गरेका छन् । ज्ञवालीका अनुसार तेश्रो दिनसम्म आई पुग्दा करिब १७ लाख भन्दा बढी आर्थिक सङकलन भएको बताउनुभयो ।

महायज्ञको व्यवस्थापन र भारतको वनारसबाट पण्डितहरु आएर दैनिक पूजाँ भईरहेको छ । बिशेष महत्व बोकेको रुरुधामलाई  महायज्ञले विश्वसामु परिचित बनाउनेमा आफूहरु ढुक्क रहेको संयोजक ज्ञवालीको विश्वास छ ।

यतिबेला सबै मिलेर महायज्ञलाई सफल बनाउने समय भएकाले महायज्ञलाई सहयोगका लागि पनि आग्रह गर्नुभयो । स्थानीयहरुको पनि उत्साहपूर्ण सहयोग र सहभागीता रहेको बताउँदै उहाँले रुरु क्षेत्रको विकास हुन सके जिल्लाले नै मुहार फेर्नेमा कुनै शङ्का नरहेको बताउनुभयो  ।

महायज्ञ अवधिभर २१ करोड दिपप्रज्वलन,एक करोड पार्थिव शिवलिङ्ग पुजन 

महायज्ञ अवधिभर २१ करोड दिपप्रज्वलन, एक करोड पार्थिव शिवलिङ्ग पुजन, ५१ हजार व्यक्तिहरुको तुलादान, लगायतका कार्यक्रमहरु गरीने छ ।  ‘कुनै पनि शुभकर्म गर्नका लागि संसारको तिर्थ भुमिका रुपमा रुरुक्षेत्रलाई लिइन्छ ।’

यसको व्यवस्थापन र भौतिक संरचनाको अत्यन्तै अभाव र कमी भएको हुनाले यसको विकासका लागि महायज्ञ कोशेढुङ्गा सावित हुने महायज्ञका मूल सङकल्पकर्ता बाल  योगेश्वर महाराज श्रीले बताउनुभयो ।

‘अन्य तिनवटा धामहरु मुक्तिक्षेत्र,बराहक्षेत्र,पाशुपतक्षेत्रमा हजारौँ यात्रुहरुको भिड लाग्छ । तर रुरुक्षेत्रधाममा भने सुनसान सन्नाटा छाए जस्तो हुन्छ ।’ त्यस क्षेत्रलाई आध्यात्मिक केन्द्रको रुपमा विकास गरी लाखौ पर्यटकहरुलाई भित्र्याउन महायज्ञले ठु्लो सहयोग पु¥याउने महाराज श्रीले  उल्लेख गर्नुभयो ।

उहाँले भन्नुभयो ‘प्रयाग,कुरुक्षेत्र जस्ता तिर्थस्थलहरुमा सयौँ पटक स्नान गरेर प्राप्त हुने पुण्य कालिगण्डकी क्षेत्रमा एकपटक स्नान गरे प्राप्त हुन्छ,भनेर विभिन्न धार्मिक शास्त्र हरुमा पाइन्छ ।’ यो पवित्र स्थलको संरक्षण तथा विकासका लागि महायज्ञको आयोजना गरिएको  महाराज श्रीले बताउनुभयो ।

महायज्ञमा पुग्ने भक्तजनलाई निःशुल्क बस सेवा 

ऐतिहासिक महायज्ञमा पुग्नका लागि महायज्ञ मूल अयोजक समितिले विभिन्न स्थानबाट बस सेवाको व्यवस्था समेत मिलाएको छ ।
जसअनुसार खज्र्याङ्ग, चोरकाटे, तम्घास, रानीबास थोर्गा हुँदै रिडीका लागि बिहान ९ः०० बजे निःशुल्क बससेवा उपलब्ध गराएको छ । यस्तै छिमेकी जिल्ला पाल्पाबाट पनि बिहान ९ः०० बजे बस छुट्छ ।

अनिल खत्री, गुल्मी भदौ ३०।
गुल्मीमा पर्यटकीय गनतव्य बनाउनको निम्ति ट्रीहाउस निर्माण गरिएको छ । जिल्लाको सदरमुकाम तम्घास नजिकै रहेको रेसुङ्गा नगरपालिकाको वडा नम्बर ७ को उनयचौरमा सल्लाको रुखमा ट्रीहाउस निर्माण भएको छ ।

प्रदेश नम्बर ५ वन मन्त्रालयको आर्थिक सहयोगमा उनाएचौरमा ट्रीहाउससँगै पर्यटकीय पार्क बनाइएको हो । नगरपालिकाले पार्क र पर्यटक तान्न सल्लाको रुखबाट तम्घास बजारसँगै बिभिन्न स्थानका दृश्य हेर्न सकिने गरि ट्रीहाउस बनाएको छ । सञ्चालनमा आएको १ महिनाको अबधीमा ट्रिहाउसले जिल्लामा र जिल्ला बाहिर चर्चामा रहेको छ । सल्लाको रुपमा बनाइएको ट्रीहाउस हेर्नको निम्ति झण्डै एक महिनाको अबधीमा १५ हजारले अबलोकन गरेको समितिले बनाएको छ ।

जिल्ला सदरमुकाम तम्घासबाट झण्डै ६ किलोमिटर टाढाको दुरीमा पर्ने उक्त स्थानमा केहि धार्मिक मन्दीरहरु मात्रै रहेका थिए । खाली चौरमा मन्दीरहरुसँगै धार्मिक स्थलको रुपमा नगरले उत्कृष्ट पटकीय गनतव्यको रुपमा बिस्तार गर्न पार्क र ट्रिहाउस निर्माण गर्न जोड दिएको रेसुङ्गा नगरपालिका वडा नम्बर ७ का सदस्य रघुनाथ पन्थीले बताउनु भयो ।सल्लाको रुखमा फलामको सिडी राखेर ४२ फिट अग्लो रुखमा बनाइएको घरबाट तम्घास बजारसँगै छिमेकी जिल्लाका बिभिन्न स्थलहरु हेर्न सकिन्छ । रुखमै निर्माण गरिएको घर यस क्षेत्रकै नौलो खालको घर रहेको छ ।

उनाएचौरमा रहेको खाली ठूलो चौरमा धेरै वर्ष पहिले बिमानस्थल निर्माणको लागि पनि सम्भाव्यता अध्ययन गरिएको थियो । प्राबिधिक समस्या देखिए पछि सिमीचौरमा निर्माण भइरहेको छ ।बिमानस्थल अन्तै बन्ने भएपछि निराश बनेका स्थानीय ट्रिहाउस, खेल मैदान र पर्यटकीय पार्क बनेपछि स्थानीयहरु उत्साहित भएका छन् । बिभिन्न क्षेत्रको आर्थिक सहयोगमा ट्रीहाउससँगै, पर्यटकीय पार्क बनाउनको निम्ति आर्थिक सहयोगमा बिभिन्न संरचना निर्माण गरिएको छ ।

उनाएचौरमा नगरकै खेल मैदानसँगै पार्क र ट्रीहाउस निर्माण भएसँगै अबलोकनका लागि बिभिन्न स्थानबाट पर्यटकहरु जान थालेका छन् । केहि दिन अघिबाट निर्माण सम्पन्न भएको ट्रिहाउसमा शनिवार र बिदाको दिन धेरै पर्यटकहरु पुग्ने गरेको स्थानीय एवं त्यस स्थलको संरक्षण रेखदेख गर्दै आएका घनश्याम पन्थी बताउताउनु भयो । हाल दैनिक १ सय जनासम्म ट्रीहाउस अबलोकन गर्नको निम्ति पुग्ने गरेका छन् ।

ट्रिहाउस अबलोकनको निम्ति २० रुपैयाँ लिने गरिएको छ । त्यस स्थलको संरक्षण गर्नको निम्ति शुल्क लिने गरिएको समितिले जनाएको छ ।
बृद्धहरुको निम्ति निशुल्क र बिद्यार्थीहरुको निम्ति छुटमा १० रुपैयाँ लिने गरेर अबलोकन गर्न पाउने व्यवस्था मिलाइएको छ । निर्माण भएको ट्रिहाउसको उल्लेख्या नभएपनि हेर्नको निम्ति बिभिन्न स्थानबाट पर्यटकहरु आउन थालेको स्थानीय तेजबहादुर पुनको भनाई छ ।यसक्षेत्रको नयाँ खालको रहेकाले हेर्न आउनेहरुले निकै रमाइलो मानेको अबलोकन गर्न पुगेकाहरु बताउछन् । ट्रिहाउस अबलोकनमा लागि पुग्ने गरेकाहरु निकै रमाइलो र अनौठो खालको लागेको बताउने गरेका छन् ।

यसक्षेत्रमा रमाइलो दृश्य सहित निर्माण गरिएको ट्रिहाउससँगै अरु बिकासको पनि कमी रहेको पर्यटकहरुको जोड रहेको छ । धार्मिक मन्दीरहरुसँगै नगरकै उत्कृष्ट पर्यटकीय पार्क ट्रिहाउस र खेल मैदान बनाउनको निम्ति धेरै काम पुरा हुदै गएको रेसुङ्गा नगरपालिका वडा नम्बर ७ का वडा अध्यक्ष मोहनप्रसाद पाण्डेले बताउनु भयो ।

नगरले वालक देखि बृद्धसम्मलाई मनोरञ्जन लिने खालको पार्क र नगरकै उत्कृष्ट गनतव्य बनाउन गुरु योजना बनाएर अगाडी बढाइने वडा अध्यक्ष पाण्डेयको भनाई छ । केहि रुपमा संरचना पुरा भएपनि अरु धेरै उत्कृष्ट संरचना तयार गरेर नगरकै उत्कृष्ट घुम्न लाएक स्थल बनाउनको निम्ति काम अगाडी बढि रहेको वडा अध्यक्षले पाण्डेले बताउनु भयो ।

अनिश शर्मा गैरे, गुल्मी भदौ २९ ।
सामुदायिक रेडियो पुष्पाञ्जलीले आफ्नो भवन निर्माण कार्य सम्पन्न गरेको छ । गुल्मीको मुसिकोट नगरपालिका ७ वामी बसपार्कमा रहेको भाडाको घरबाट सोही वडाकै पल्टारमा रेडियोले आफ्नै भवन निर्माणकार्य सम्पन्न गर्दै आफ्नै निजि भवनबाट प्रशारण पनि सुरु गरेको छ ।

रेडियोको लागि भवन निर्माण गर्न रेडियोकै सञ्चालक समिति सदस्य अर्जुन सापकोटा तथा बुवा गोबिन्द सापकोटाले जग्गा प्रदान गर्नुभएको थियो । सोही जग्गामा रेडियोले भवन निर्माण गरेको हो । सो भवन निर्माणको शिलन्यास मुसिकोट नगरपालिकाका नगरप्रमुख सोमनाथ सापकोटाले गर्नुभएको थियो । भने भवन निर्माणको जिम्मा गन बहादुर श्रीस र राम बहादुर गोतामेलाइ प्रदान गरिएको थियो ।

रेडियोले आफ्नै व्यवस्थित टावर पनि बनाएको छ । हालसम्म सामान्य फलामे पाइपमा उपकरण जडान गरि सञ्चालीत रेडियोले हाल व्यवस्थित टावर बनाएको हो । सो टावर बनाउने जिम्मा स्थानीय कमल थापाले लिनुभएको थियो ।

भवन निर्माणकोे लागि मुसिकोट नगरपालिकाले एक लाख रुपैया सहयोग गरेको थियो । भने अन्य श्रोत रेडियो आफैले जुटाएको हो । आयव्याय विवरण केही समयमा सार्वजनिक गरिने रेडियोका अध्यक्ष सुदर्शन शाक्यले बताउनुभयो । केही दिन पछि भवनको उद्घाटन पनि गरिने उहाँले बताउनुभयो ।

सर्यनारायण सञ्चार अभियान द्धारा सञ्चालित सामुदायिक रेडियो पुष्पाञ्जली गुल्मीको ग्रामिण भेगबाट २०७० साल जेठ २८ गते परिक्षण प्रशारण सुरु गरी सोही बर्षकै भदौ १ गतेबाट नियमित प्रशारण सुरु गरेको थियो ।

‘सुचना, सञ्चार, कृषि, पर्यटन विकास र समुन्नत समाज निर्माणको लागि’ सामुदायिक रेडियो पुष्पाञ्जली भन्ने नारा सहित स्थापित रेडियो नया भवनमा सरेसँगै यसको प्रशारण क्षेत्र पनि बढेको छ ।

गुल्मीको मुसिकोट नगरपालिका सहित, चन्द्रकोट गाँउपालिका, इस्मा गाँउपालिका, मालिका गाँउपालिका, रेसुङ्गा नगरपालिका सहित बाग्लुङ्गको बडिगाड गाँउपालिका, ढोरपाटन नगरापालिका तथा गल्कोट नगरपालिका सहितका अधिकांश क्षेत्रमा स्पष्ट सुनिएको हाम्रा श्रोताहरुले जानकारी दिएका छन् ।

रेडियोे अव नया व्यवस्थापनका साथ नया कार्यक्रमहरु उत्पादन गर्दै अघि बढ्ने छ ।यसैबिच आफ्नै भवनबाट रेडियोले नियमित प्रशारण पनि सुरु गरेको छ ।