मंसिर २१, २०७६ काठमाडौँः सत्तारुढ नेपाल कम्युनिष्ट पार्टी नेकपाले एकतापछि जिम्मेवारी बाँडफाँट गरिसकेको छ। दुई अध्यक्ष राखेको नेकपाले पुष्पकमल दाहाल प्रचण्डलाई कार्यकारी अध्यक्षको जिम्मेवारी दिइसकेको छ। अर्का अध्यक्ष केपी शर्मा ओलीले पुरै कार्यकाल सरकार सम्हाल्ने सहमतिको आधारमा प्रचण्डलाई अधिकारसहितको कार्यकारी अध्यक्षको दिइएको हो । प्रचण्डले कार्यकारी अध्यक्षको जिम्मेवारी पाएसँगै पार्टीभित्र उनको सक्रियता दोब्बर भएको छ। प्रधानमन्त्री ओली बिरामी भएर अस्पतालमा रहेका बेलामा अध्यक्ष प्रचण्डले पार्टीमा सक्रियता बढाएका हुन्। त्यही अनुसार उनको देशदौडाहा पनि बढेको छ। प्रधानमन्त्री ओली १० दिन लामो अस्पताल बसाईबाट बिहीबार मात्रै सरकारी निवास बालुबाटर फर्केका छन्। ओली अस्पतालमा रहँदा नेकपाभित्रका नेताहरुसँग विभिन्‍न चरणमा प्रचण्डले भेटघाट गरेका छन्। अध्यक्ष प्रचण्डले प्रदेश प्रमुख नियुक्ति र मन्त्रिपरिषद् पुनर्गठन प्रक्रियामा ओलीसँग रुष्ट भएका नेकपाका वरिष्ठ नेता माधवकुमार नेपालसँग पनि भेट गरेका थिए। प्रचण्डको अध्यक्षतमा गत बुधबार नेकपाको सचिवालय बैठकसमेत बसिसकेको छ। यसबीचमा उनले बिहीबार प्रमुख प्रतिपक्षी कांग्रेसका सभापति शेरबहादुर देउवालाई बूढानीलकण्ठमै पुगेर भेटेका छन्। अध्यक्ष प्रचण्डले पूर्वएमालेका नेताहरुसँगको भेटलाई पनि बाक्लो पारेका छन्। यसलाई उनीहरुलाई आफ्नो पक्षमा ल्याउने सक्रियाताका रुपमा बुझिएको छ। प्रचण्डले झलनाथ खनाल, वामदेव गौतम, नारायणकाजी श्रेष्ठलगायतका नेताहरुसँग आफ्नै निवासमा छलफल गरेका छन्। उनीहरुसँग मात्रै नभइ पूर्व एमालेका अन्य केही नेतालाई समेत आफ्नो पकडमा ल्याउने कसरतसहित प्रचण्डको सक्रियता बढेको हो। प्रधानमन्त्री ओलीको स्वास्थ्यअवस्थालाई देखाउँदै अध्यक्ष प्रचण्डले चीन भ्रमण स्थगन गरेको जनाएका थिए। चिनियाँ राष्ट्रपति सी जिङपिङको विशेष निमन्त्रणमा प्रचण्डको चीन भ्रमण तय भएको थियो। भ्रमण स्थगित भएपछि उनी नेकपाभित्रै राजनीतिक छलफलमा केन्द्रित भएका छन्। पार्टीको कार्यकारी अध्यक्षको जिम्मेवारी पाएसँगै पार्टी बैठकको अध्यक्षता गर्ने, पार्टीलाई वैचारिक नेतृत्व दिने, संगठनात्मक रूपमा नेतृत्व गर्नेलगायतका अधिकार उनीसँग छ। प्रचण्डलाई कार्यकारी अधिकार दिए पनि ओलीले पार्टीमा आफ्नो अधिकार घटाएका छैनन् पार्टी र सरकारको अधिकार छुट्टाए पनि पार्टी बैठकको अध्यक्षता भने दुवै जनाले गर्ने नेकपाले निर्णय गरेको थियो। ओलीले पनि दुवैजना अध्यक्ष रहेको जनाउँदै बैठकको अध्यक्षता दुवैले गर्ने बताएका थिए। नेकपाको मंसिर ४ गतेको बैठकले ओलीलाई सरकार र प्रचण्डलाई पार्टीको जिम्मेवारी दिएको थियो। सचिवालयको बैठकपछि दुवै नेता पार्टीभित्र शक्तिशाली बनेका छन्। कार्यकारी अधिकार प्रचण्डले पाए पनि वरीयतामा उनी दोस्रो स्थानमै छन्। प्रचण्डले आफ्नो राजनितिक इतिहासमा आफूलाई सधैँ कार्यकारी अधिकारमै राखेका छन्। तत्कालीन नेकपा ९मशाल० को महामन्त्रीबाट सुरु भएको उनको कार्यकारी अधिकारमा पार्टी एकतापछि पूर्णविराम लागेको थियो । तत्कालीन एमालेसँग पार्टी एकता भएपछि प्रचण्डले आफ्नो कार्यकारी अधिकार गुमाएका थिए। उनीमाथि ओली हाबी भएका थिए। तर, मंसिर ४ गतेको बैठकले पुनः कार्यकारी अध्यक्षको भूमिका पाएका छन्। कार्यकारी अधिकार पाएपछि प्रचण्डले आफुलाई बल्ल अध्यक्षको ुफिलु भएको प्रतिक्रिया दिएका छन्। नेकपाको विधानले ओली(प्रचण्ड दुवैलाई कार्यकारी अध्यक्ष तोकेको छ। प्रचण्डले अर्को सचिवालय बैठक २३ गते बोलाएका नेकपाका प्रवक्ता नारायणकाजी श्रेष्ठले जानकारी दिए। उनका अनुसार नेकपाको आगामी सचिवालयको बैठक पनि अध्यक्ष प्रचण्डको अध्यक्षतमा बस्‍ने छ। नेकपाको आगामी बैठकमा उपनिर्वाचनको बिषयमा समीक्षा गरिने प्रवक्ता श्रेष्ठले बताए। बैठकमा पार्टी सङ्गठनात्मक एकीकरणको बाँकी कामको बिषयमा छलफल र निर्णय, पार्टीको कार्ययोजना तय र स्थायी कमिटी तथा केन्द्रीय कमिटी बैठक बोलाउन निर्णय लिनेसक्ने उनको भनाई छ। अब बस्‍ने स्थायी कमिटीको बैठक प्रधानमन्त्रीसमेत रहेका ओली र दाहाल दुवैले अध्यक्षता गर्ने बताइएको छ। स्थायी कमिटीको बैठक नबोलाएको भन्दै भीम रावललगायतका नेताहरुले पटक पटक दबाब दिइरहेका छन्। थाहाबाट

मंसिर २१, २०७६ ओखलढुंगा ः ओखलढुंगामा नातिनीलाई बलात्कार गर्ने ५८ वर्षीय एक वृद्ध पक्राउ परेका छन्। पक्राउ परेका व्यक्तिले नातामा नातिनी पर्ने १५ वर्षीय बालिकालाई २३ हप्ताअघि बलात्कार गरेको खुलेको छ। बालिकाको पेट फुल्दै गएपछि हजुरबुबाबाट बलात्कृत भएको रहस्य बाहिरिएको र बालिकाका आफन्तले जाहेरी दिए पछि बृद्धलाई पक्राउ गरीएको जिल्ला प्रहरी कार्यालय ओेखलढुंगाले जनाएको छ। बालिकाको पेट अस्वभाविक बढेकाले आफन्तले सोधपुछ गर्दा बालिका गर्भवती भएको खुलेसँगै घटना सार्वजानिक भएको हो। सुस्त मनस्थितिकी ती बालिकाको पेटमा २३ हप्ताकी गर्भवती रहेको र कम उमेरकी भएकाले गर्भपतनका लागि प्रसुती गृह थापाथलीमा पठाईएको जिल्ला अस्पताल रुम्जाटार ओखलढुंगाले जनाएको छ। घरमा कोही नभएको मौका छोपी ती वृद्धले गत साउनमा बालिका बलात्कार गरेको पीडित परिवारले दिएको जाहेरीमा उल्लेख छ। बालिकाका आफन्तले दिएको जाहेरीका आधारमा वृद्धलाई पक्राउ गरी अनुसन्धान थालिएको जिल्ला प्रहरी कार्यलय ओेखलढुंगाले जनाएको छ। बालिकालाई जिल्लास्थित एक सुरक्षित आवासगृहको संरक्षणमा राखिएको छ।

मंसिर १९, २०७६ काठमाडौं ः यातायातकर्मी राम बहादुर थापाले विचौलीयविरुद्ध यातायात व्यवस्था विभाग कार्यालयमा निवेदन हालेका छन्। यातायात विभागमा विचौलीयको बिगबिगी बढेको भन्दै त्यसलाई नियन्त्रण गरी कारबाही गर्न माग गर्दै उनले बिहीबार विभागमा निवेदन हालेका हुन्। यातायात कार्यालयमा विचौलीयले सेवाग्राहीलाई मनलागी पैसा असुल्ने गरेकाले छानबिन गरी कानुनी कारबाही गर्नुपर्ने माग राख्दै निवेदन दिएको थापाले बताए। ‘यातायात कार्यालयमा विचौलीय छ्यापछ्याप्ती छन्,’ उनले भने, ‘अध्ययन गरेर यो तथ्या फेला पारेको हुँ। विचौलीयलाई पैसा दिए आधा घण्टाको कम एकैछिनमा गरिदिन्छ।’ उनका अनुसार लाइसेन्सका लागि सेवाग्राही दुई घण्टासम्म लाइनमा बस्नुपर्छ। ३० देखि ३५ हजार विचौलीयलाई दिए लाइसेन्स बनाइदिन्छ। लाइनमा बस्नु पनि पर्देन। उनले भने, ‘यातायातका कर्मचारी र विचौलीयसगँ बुझ्दा पुलिस प्रशासन, सिडियो सबैलाई पैसा दिने गरेको पाइएको छ। कानुनी कारबाही गर्नुको सट्टा सरकारी निकायका पदाधिकारीले नै जनतालाई लुट्ने गर्छन।’ थाहाबाट

मंसिर १९, २०७६ भद्रपुर ः झापाको बिर्तामोडस्थित मनमोहन मेमोरियल सामुदायिक अस्पतालका चिकित्सकको लापरबाहीले पाँच महिने शिशुको मृत्यु भएको घटना सेलाउन नपाउँदै बिर्तामोडकै बिर्ता सिटी अस्पतालमा बिहीबार एक महिलाको मृत्यु भएको छ। चिकित्सकको लापरबाहीले महिलाको मृत्यु भएको भन्दै पीडित पक्षले नाराबाजी गर्दै आन्दोलित बनेपछि अस्पताल परिसर तनाव ग्रस्त बनेको हो। बेलुका ४ बजेदेखि नाराबाजीसहित पीडित पक्ष आन्दोलित बनेपछि अस्पतालमा धनजनको क्षति हुन नदिन इलाका प्रहरी कार्यालय अनारमनिले कडा सुरक्षा प्रदान गरी घटनालाई साम्य बनाउन पहल गरिरहेको छ। घटना विवरण अनुसार कनकाई नगरपालिका ७ स्थित कालिमुडाकी ४९ वर्षीया फुलमाया तामाङको उपचारको क्रममा बिहीबार दिउँसो अस्पतालमा मृत्यु भएको थियो। मिर्गौलामा समस्या भएर उपचारका लागि बिर्ता सिटी गएकी तामाङको इन्डोस्कपी गर्ने क्रममा दिउँसो १ बजे मृत्यु भएको पीडित पक्षको दाबी छ। बिरामी महिला तामाङ डराइरहेको अवस्थामा जबरजस्ती चिकित्सकले इन्डोस्कपी गर्दा उनको मृत्यु भएको भन्दै पीडित पक्षले अस्पताल प्रशासनको लापरवाहीविरुद्ध नाराबाजीमा उत्रिएका थिए। अस्पताल परिसरमा अहिले व्यापक प्रहरी परिचालन गरी भीड नियन्त्रणमा लिएको इलाका प्रहरी कार्यालय अनारमनिका प्रहरी नायव उपरीक्षक मोहन थापाले जानकारी दिए। अहिले घटनाका सन्दर्भमा पीडित पक्ष, अस्पताल प्रशासन र सरोकारवाला पक्षबीच छलफल चलिरहेको प्रहरी नायव उपरीक्षक थापाले बताए। यता मंसिर ११ गते बिर्तामोड नगरपालिका ५ बस्ने विजय लिम्बूको ५ महिने शिशु विपिषा लिम्बूको गए राति उपचारको क्रममा मृत्यु भएको थियो। निमोनिया भएर अस्पताल भर्ना गरिएकी विपिषालाई इन्जेक्सन लगाएलगत्तै पेट फुलेको र त्यसपछि शिशुको मृत्यु भएको पीडित पक्षले अस्पतालमा तोडफोड गरेका थिए। यता घटनालाई मिलाउन अस्पताल प्रशासनले पीडित पक्षलाई पाँच लाख रुपैयाँ क्षतिपूर्ति दिएका थिए। थाहाबाट