जेठ २२,२०८० गुल्मीः सवारी दुर्घटना कम गर्नका लागि गुल्मीमा सडकमै सवारी साधनको जाँच र चालकहरुको स्वास्थ्य परीक्षण गरिएको छ ।

‘आफू बाँचौ र अरुलाई पनि वचाऔं’ भन्ने नाराका साथ जिल्ला ट्राफिक प्रहरी कार्यालय गुल्मी, गुल्मी यातायात प्रालिको संयुक्त आयोजनामा बस, ट्रक, जीप लगायतका बिभिन्न सवारी साधनहरुमा दक्ष प्राविधिकद्धारा सवारी चेकजाँच तथा चालकहरुको आँखा तथा स्वास्थ्य परीक्षण गरिएको हो ।

जिल्ला आँखा उपचार केन्द्र, गुल्मी मोडल हस्पिटल, प्राबिधिक सहयोगमा जिल्लाको रेसुङ्गा नगरपालिकाको वडानम्बर ४ को तम्घास–सिमलटारी सडक खण्डको अर्खलेमा सडकमै पुगेर चेक जाँच तथा स्वास्थ्य परीक्षण गरिएको थियो । ८५ वटा साना–ठूला सवारी साधनका चालकहरुको आँखा परीक्षण एवंम स्वास्थ्य परीक्षण गरिएको जिल्ला ट्राफिक कार्यालय गुल्मीका प्रमुख प्रहरी नायव निरीक्षक कृष्णप्रसाद आचार्यले जानकारी दिनुभयो ।

परीक्षणवाट ६ जना चालकहरुमा उक्त रक्तचापको समस्या तथा ५ जना चालकहरुमा आँखामा समस्या देखिएको थियो । सवारीहरुमा समेत समय–समयमा मर्मत सम्भार, समिसिङ्ग, टाइराइड, टायर लगायतको समस्या देखिएकोमा उक्त समस्या तत्काल सुधार गर्न र समय समयमा आँखा, स्वास्थ्य एवंम सवारी परीक्षण गरी सवारी साधन चलाउनको लागि चालकहरुलाई आग्रह गरिएको आचार्यले बताउनुभयो ।

दुर्घटनाको एउटा पक्ष चालकको स्वास्थ्य र सवारी साधानको अवस्था पनि हुने भएकाले सडकमै सवारी साधानहरुको चेकजाँच र चालकहरुको स्वास्थ्य परिक्षण कार्यक्रम राखिएको गुल्मी यातायात प्रालिका सञ्चालक हिमाल कुँवरले बताउनुभयो । चेक जाँचको क्रममा समस्या भए यातयात प्रालिले आफना सदस्यहरुलाई सहजीकरणका लागि बिभिन्न सहयोग गर्ने उहाँको भनाई छ ।

जिल्लाको उपल्लो तम्घासबाट सुरु भएको अभियान जिल्लाका बिभिन्न स्थानमा पुगेर चेकजाँच गरिने छ । ट्राफिक प्रहरीको सक्रियतामा यो अभियान जिल्ला भर सञ्चालन गरिने कुँवरले बताउनुभयो ।

बढ्दो दुर्घटना न्यूनिकरण गर्न भन्दै प्रहरीले सडकमै चालक, सहचालक, यात्रु र विद्यार्थीहरुलाई राखेर प्रशिक्षण दिँदै आएको छ

जेठ २०,२०८० गुल्मीः स्थानीय सरकार गठन भएको झण्डै ६ वर्षपछि गुल्मीको मुसिकोट नगरपालिकाले नगर प्रहरी भर्ना गरेको छ । बढ्दो शहरीकरण सँगै बढेका चोरी डकैतीका घटना न्यूनीकरण गर्न र नगरमा शान्ति सुरक्षालाई मजबुद बनाउन नगर प्रहरी भर्ना गरिएको नगरपालिकाको भनाई छ ।

नगर प्रहरी सञ्चालन तथा व्यवस्थापन सम्बन्धी कार्यविधि, २०७५ अनुसार मुसिकोटले एकजना नगर प्रहरी सहायक निरिक्षक र ४ जना जवान गरी ५ नगर प्रहरी भर्नाका लागि लागि दरखास्त आह्वान गरेको थियो । तर नगर प्रहरी सहायक निरिक्षकका लागि एक जनाको दरखास्त परेकोमा सक्षम उम्मेदवार नभएपछि पहिलो चरणमा ४ जना नगरप्रहरीको भर्ना गरिएको हो ।

बुधवार एक कार्यक्रमकाबीच नवनियुक्त नगर प्रहरीको आधारभुत तालिम समापन तथा दीक्षान्त कार्यक्रम सम्पन्न भएको छ । मुसिकोट नगरपालिकाका प्रमुख प्रशासकीय अधिकृत बिनोद कँुवरका अनुसार नगरवासीको शान्ति सुरक्षा र अपराधका घटना न्यूनीकरण र नियन्त्रण गरी सभ्य समाज निर्माण गर्ने सोच स्वरुप नगर प्रहरीको भर्ना गरिएको हो । उनीहरुले औपचारिक रुपमा बिहिवारबाट काम सुरु गर्ने मुसिकोट नगरपालिका नगरप्रमुखका स्वकीय सचिव सुरज भट्टराईले जानकारी दिनुभयो ।

मुसिकोट नगरपालिकाका नगरप्रमुख जीवन खरेलका अनुसार नगर प्रहरी कार्यविधिले ३५ बुँदामा रहेर उनीहरुको काम, कर्तव्य तोकेको छ । नगरका नीति, कानुन मापदण्ड कार्यान्वयन गर्र्ने, नगरको सम्पति र सार्वजनिक सम्पतिको सुरक्षा गर्ने, स्थानीय स्तरमा हुने मेला, महोत्सव तथा चाडपर्वमा सुरक्षा व्यवस्था, प्राकृतिक, सांस्कृतिक सम्पदा र गौरवका योजनाको संरक्षण, सार्वजनिक जग्ग्गा अतिक्रमण, विपद व्यवस्थापनमा खोजी, राहत तथा पुर्नस्थापना र नगर सरसफाइ व्यवस्थापन लगायत शान्ति सुरक्षाका काम नगर प्रहरीले गर्ने उहाँको भनाई छ ।

नगर प्रहरीको काम, कर्तव्य पनि करिब नेपाल प्रहरीसँग मिल्दोजुल्दो रहेको छ । संविधानले स्थानीय सरकारलाई आवश्यकता अनुसार प्रहरी भर्ना गर्ने अधिकार दिएको छ । संविधानको अनुसूचि ८ मा स्थानीय तहको एकल अधिकार सूचि अन्तर्गत नगर प्रहरी रहेको छ ।

स्थानीय सरकार सञ्चालन ऐन २०७४ को परिच्छेद ३ को दफा ११९२० मा नगर प्रहरीको गठन, सञ्चालन, व्यवस्थापन, नियमन तथा नगर प्रहरीसम्बन्धी नीति, कानुन र मापदण्ड कार्यान्वयन गर्ने उल्लेख छ । संविधानले दिएको सोही अधिकारमा टेकेर स्थानीय सरकारले गाउँ तथा नगर प्रहरी सञ्चालनसम्बन्धी ऐनकार्यविधि निर्माण गरी काम गरिरहेका छन् ।

जिटिभी नेपालबाट

जेठ २०,२०८० गुल्मीःगुल्मीको मालिका गाउँपालिका – ४ अर्खबाङ्ग स्थित भ्यागुतेघाट झोलुङ्गे पुलको उद्घाटन गरिएको छ ।

शुक्रबार गाउँपालिका अध्यक्ष देवीराम अर्यालले एक कार्यक्रमका बिच पुलको उद्घाटन गरेका हुन । उद्घाटनगर्दै अध्यक्ष अर्यालले झोलुङ्गे पुलले नागरिकको  जीवन यापनमा सहजता ल्याएको बताए ।

६९ मिटर लम्बाई र १ दशमलव ६ सेन्टिमिटर चौडाइ रहेको पुल यसै आर्थिक वर्षमा पुल सम्पन्न भएको गाउँपालिकाका प्राविधिक डिल्लीराज खनालले बताए ।

झोलुङ्गे पुल क्षेत्रगत विकास कार्यक्रम अन्तर्गत३६ लाख १४ हजार ९५ रुपैयाँ लगानीमा पुल निर्माण भएको हो । जहाँ केन्द्रिय सरकारको ८५ प्रतिशत ,गाउँपालिकाको १३ प्रतिशत र स्थानीय उपभोक्ताको २ प्रतिशत लगानी रहेको छ ।

पुलले वडा नम्बर चारको अर्खबाङ्ग र काभ्रेलाई जोडेको छ । यस झोलुङ्गे पुलबाट एक सय १४ घरधुरी प्रत्यक्ष लाभान्वित भएका छन भने वडा नम्बर तीन ह्वाङ्दी र दुई दर्लिङ्गका जनताले समेत सेवा लिने गाउँपालिकाले जनाएको छ ।