जेठ २२२०८०पाल्पा : पाल्पामा आइतबार बेलुकीपख भएको जिप दुर्घटना परी मृत्यु हुनेको संख्या ४ पुगेको छ। ११ जना घाइते भएका छन्।
मृत्यु हुनेमा पाल्पाबाट अर्घाखाँचीको पाणिनी गाउँपालिका-१ की ५५ वर्षीया श्यामकला परियार, जिप चालक सोही ठाउँका २६ वर्षीया रमेश विक, सोही गाउँपालिका वडा नम्बर २ पोखराथोकका २५ वर्षीया सीता गौतम, सोही ठाउँका २ वर्षीय संयोग गौतम रहेका जिल्ला प्रहरी कार्यालय पाल्पाका सूचना अधिकारी तथा प्रहरी नायब उपरीक्षक वीरेन्द्र थापाले बताए।
रुपन्देहीको सालझण्डीबाट अर्घाखाँची तर्फ जाँदै गरेको लु१च ९०२४ नम्बरको बोलेर जिप रैनादेवी छहरा- ८ सत्यवतीस्थित किउरे छेडामा हिजो बेलुकी साढे ५ बजे दुर्घटना भएको हो।
घाइतेमध्य ५ जनाको अवस्था गम्भीर छ। उनीहरूको रुपन्देहीको बुटवलस्थित विभिन्न अस्पतालमा उपचार भइरहेको छ।
जिप माथिल्लो सडकबाट तल्लो सडकमा खसेको छ। करिब ७० मिटर तल खसेको थापाले बताए।
घटनाबारे थप अनुसन्धान भइरहेको प्रहरीले जनाएको छ।
