सुशीला रेग्मी
फागुन २८, पाल्पा
चापाकोट नगरपालिका वडा नं ७ आदर्श मावि पटसारको आयोजनामा भएको ५९ औँ वार्षिकउत्सव तथा अभिभावक भेला सकिएको छ । विद्यालय व्यवस्थापन समितिका अध्यक्ष डुकबहादुर शाहको अध्यक्षतामा भएको कार्यक्रमका मुख्य पाहुना नगर प्रमुख शिवकुमार गिरीले रहनुभएको हो । मुख्य पाहुना नगर प्रमुख गिरीले यस विद्यालयले उत्पादन गरेका विद्यार्थी राष्ट्रिय स्तरमा नै उच्च तह सम्म नेतृत्व गरेकाले विद्यालयको शैक्षिक गुणस्तरमा खलबल नपु¥याउने गरी काम गर्न आग्रह गर्नुभएको छ ।
शिक्षक राजेन्द्र पाठकको स्वागतबाट सुरु भएको कार्यक्रममा विद्यालयका प्रधानाध्यापक लक्ष्मण ठकुरी उचैले एक करोड ३ लाख ८६ हजार १ सय ७२ रुपैयाँ बराबरको प्रगति प्रतिवेदन तथा भौतिक, शैक्षिक प्रगति एवम् भावी कार्यक्रमबारे जानकारी गराउनुभएको छ । चापाकोट नगरपालिका शिक्षा शाखाका स्रोतव्यक्ति मुकुन्द डोटेल, राधा दामोदर विद्यालय व्यवस्थापन समितिका अध्यक्ष ज्ञानेश्वर बस्ताकोटी, साविक साँखर गाविस पूर्व अध्यक्ष हरिशचन्द्र ढकाल, शिक्षक तुल्सीराम रिमाल, भुपु विद्यार्थी बद्री पाठक, सिर्जना रिमाल, बालकृष्ण ढकाल, शिक्षक रामभक्त अधिकारी, देवप्रसाद भट्टराई, लक्ष्मी देवकोटा लगायतले छात्रबृत्ति घोषणा गर्दै कार्यक्रम सफलताको शुभकामना दिनुभएको छ ।
थानेश्वर कंडेल अक्षयकोष, रत्न सिं सुनार अक्षयकोष, खगेश्वर र नन्दकुमारी अक्षयकोषबाट छात्रबृत्ति प्रदान गरिएको छ । कक्षा १ देखि १० सम्मका दलित विद्यार्थीलाई शिक्षक तुल्सीप्रसाद खनालले शैक्षिक सामग्री वितरण गर्नुभएको हाम्रा प्रतिनिधि कमलप्रसाद अधिकारीले जानकारी दिनुभएको छ । कार्यक्रमको संचालन शिक्षक हेमु खवासले गर्नुभएको हो ।
