सुशीला रेग्मी
माघ २२, पाल्पा :
कृषि विकास बैंक शाखा कार्यालय रामपुरले खेलाडीलाई जर्सी सहयोग गरेको छ । रामपुर नगरपालिका वडा नं ६ का खेलाडीलाई खेलकुदको जर्सी सहयोग गरेको हो । वडा नं ६ ले कृषि प्रवद्र्धनका कार्यक्रमलाई अगाडी बढाएकाले खेलाडीलाई खेलकुदमा हौसला बढाउन बैंकले जर्सी सहयोग गरेको शाखा प्रमुख बिशाल पौडेलले बताउनुभयो ।
“रामपुर नगरपालिकाको वडा नं ६ ले कृषिलाई प्राथमिकता दिएर काम अगाडी बढाएको हुदा यस पटक खेलाडीलाई जर्सी सहयोग गरेका हौँ” प्रमुख पौडेलले भन्नुभयो । वडामा रहेका खेलाडीलाई भलिवल, फुटवल र क्रिकेट खेलको जर्सी सहयोग गरिएको हो ।
वडा नं ६ को कार्यालयले नगरको एक वडा एक उत्पादन कार्यक्रम अन्र्तगत आलु खेतीलाई जोड दिएर समुह तथा व्यक्तिगत रुपमा कृषकलाई अनुदानमा आलुको वीउ वितरण गरी आलु उत्पादनको नमुना वडा बनाउने अभियानमा लागेको छ ।
कृषि विकास बैंकले रामपुर नगरपालिकामा संचालन भएको तेस्रो मेयर कप २०७६ को अवसर पारेर खेलाडीलाई जर्सी सहयोग गरेपछि खेलकुदमा खेलाडीको हौसला बढेको वडा अध्यक्ष हुमनाथ न्यौपानेले बताउनुभयो ।
“बैंकले वडाले कृषिमा गरेको कामको मुल्यांकन गरेर खेलाडीलाई जर्सी सहयोग गरेपछि खेलाडीहरुलाई खेलमा झन् हौसला बढेको छ, बैंकले गरेको सहयोगलाई धन्यवाद दिन चाहान्छु” अध्यक्ष न्यौपानेले भन्नुभयो ।
