तिलाचन पाण्डे
साउन १४,२०८० गुल्मीःजिल्ला प्रशासन कार्यलय गुल्मीमा आठ हजार ७४ राष्ट्रिय परिचयपत्र बनेर आए पनि परिचयपत्र लिन आउनेको सङख्या भने न्यून रहेको पाइएको छ ।
२०७६ साल असार ३२ गते तत्कालिन परराष्ट्रमन्त्री प्रदीपकुमार ज्ञवालीले जिल्ला प्रशासन कार्यालयमा विवरण दर्ता गराएर कार्यक्रमको शुभारम्भ गरेका थिए ।
ज्ञवालीले विवरण दर्ता गरेर शुभारम्भ भए पश्चात जिल्लाका १२ वटै स्थानीय तहमा अभियान मार्फत विवरण दर्ता भएको थियो ।
सोही अभियान र जिल्ला प्रशासन कार्यालयमा विवरण दर्ता भएका मध्ये दूई पटक गरी गत बैशाखसम्म आठ हजार ७४ जनाको परिचयपत्र बनेर आएपनि ७५१ जनाले मात्र परिचयपत्र लिएको जिल्ला प्रशासन कार्यालय गुल्मीका सहायक प्रमुख जिल्ला अधिकारी तथा सूचना अधिकारी हरिप्रसाद गैरेले जानकारी दिए ।
परिचयपत्र बनेर आएको र लिन आउनुहोस भन्ने म्यासेज सम्बन्धित ब्याक्तिको मोवाइल नम्वरमा गएपनि लिन आउनेको सङख्या भने न्यून रहेको उनको भनाई छ । विवरण दर्ता गर्दा राखिएको मोवाइल नम्वरमा म्यासेज गएको बताउँदै गैरेले यसको महत्व नबुझेर पनि लिन नआएको हुन सक्ने गैरेले बताए ।
कतिपयको तत्कालिन समयमा दिइएको मोवाइल नम्वर नभएको ,सम्बन्धित ब्यक्तिको मृत्यु भएको ,देशभन्दा बाहिर रहेको र म्यासेज नहेरेका कारणले पनि समस्या भएको हुन सक्ने गैरेको भनाई छ ।
परिचयपत्र लिनका लागि सम्बन्धित ब्यक्तिनै आउनुपर्ने र फिङगर प्रिन्ट दिनुपर्ने भएकाले एकै घरका भएपनि अरु कसैलाई दिन नमिल्ने प्रशासनले जनाएको छ ।
जिल्लामा हालसम्म एक लाख ७९हजार ६४८ जनाले विवरण दर्ता गराएका छन् ।
राष्ट्रिय परिचय पत्र लागु भइसकेपछि विभिन्न सरकारी एवम अन्य सेवा सुविधासंग आवद्ध गरी नागरिकलाई ई—सर्भिस गराउन सकिनेछ ।
सार्वजनिक सेवा सुविधा ई—सर्भिस संग आवद्ध भई पेपरलेस सेवा सुविधा उपलब्ध हुने अपेक्षा गरिएको छ । सुरक्षित , आधिकारीक तथ्यांक र विवरण सहितका सेवाहरु सहजरुपमा पाउन सकिने छ । जसबाट कर, राजश्व छली लगायका आर्थिक अनियमितामा नियन्त्रण हुने, तथा बैदेशिक रोजगारको क्षेत्रलाई समेत सुशासित तुल्याउन टेवा पुग्ने, मुलुकमा सुशासन कायम हुने विश्वास लिइएको छ ।
