कात्तिक १२,२०७९दाङ : दाङमा मोटरसाइकल दुर्घटना हुँदा एक युवकको मृत्यु भएको छ।
मृत्यु हुनेमा तुलसीपुर उपमहानगरपालिका १७ मजगैं निवासी २४ वर्षीय रवि बस्नेत रहेको जिल्ला प्रहरी कार्यालय दाङका प्रवक्ता एवम् डिएसपी राजन कुमार गौतमले जानकारी दिए।
शुक्रबार राति करिब पौने ९ बजेतिर तुलसीपुर उपमहानगरपालिका ६ स्थित मदनआश्रित चोकमा मोटरसाइकल दुर्घटनामा उनी घाइते भएका थिए।
रा७प १६२९ मोटरसाइकल अनियन्त्रित भएर दुर्घटना हुँदा बस्नेत घाइते भएका उनको राप्ती प्रादेशिक अस्पताल तुलसीपुरमा सामान्य उपचारपछि थप उपचारका लागि नेपालगञ्ज लैजाँदै गर्दा बाटोमै मृत्यु भएको प्रहरीले बताएको छ।
यस्तै, बबई नदीमा डुबेर एक जनाको मृत्यु भएको छ। मृत्यु हुनेमा तुलसीपुर उपमहानगरपालिका १४ मटेरा निवासी ६० वर्षका बुद्धिराम अधिकारी रहेको तुलसीपुर इलाका प्रहरी कार्यालयका प्रमुख डिएसपी पुष्पराज मल्लले जानकारी दिए।
शुक्रबार बिहान भोजपुरदेखि डुरुवा जाँदा नदी तर्ने क्रममा अधिकारीको डुबेर मृत्यु भएको प्रहरीले जनाएको छ।
