दिवाकर पोख्रेल
असोज ११,२०७९ देउखुरी :रेविज रोगबाट बच्नको लागि दाङ देउखुरीमा स्थानीय सरकारले कुकुर बन्ध्याकरण तथा सुई लगाउने कार्यलाई तिब्रता दिन थालेका छन् ।
दाङको लमही नगरपालिकाले पछिल्ला दुइवटा आर्थिक बर्षमा गरेर हालसम्म करिब पाँचसय सामुदायिक कुकुरको बन्ध्याकरण गरिसकेको छ । यसवर्ष पनि बन्ध्याकरण शिविरको आयोजना गर्न बजेट विनियोजन गरेको छ । लमही नगरपालिका पशु सेवा उप–शाखाका प्रमुख शिवराज न्यौपानेले संक्रमित कुकुर तथा जनावरले मानिसलाई टोक्दा लाग्ने रेबिज रोगलाई खोपका माध्यमबाट रोकथाम गर्न सकिने भएकाले बन्ध्याकरण संगै खोपको कार्यक्रम समेत आयोजना गरिने बताउनुभयो । यस्तै गरेर राप्ती गाउँपालिकाले अभियान नै संचालन गरेर घरमा पालिएका कुकुर, बिराला र सामुदायिक (छाडा) कुकुरलाई खोप लगाउन थालेको छ । कुकुर र बिरालाहरुका लागि निःशुल्क रेबिज खोप कार्यक्रम असोज साताबाट संचालन गरिएको हो ।
झन्डै कुकुर विराला गरेर एकसय बढीलाई खोप लगाएपनि सबै कुकर बिरालालाई खोपको दायरामा ल्याउन सकिएको छैन । राप्ती गाउँपालिका अध्यक्ष प्रकाश विष्टले पालिका भित्रका सबै कुकुर बिरालामा खोप लगाउने योजना भएकाले गाउँवासीमा सूचना नै जारी गरेर रेविज खोप लगाउन सहयोग गर्न आग्रह गरेको जानकारी दिनुभयो ।
पछिल्लो समय कुकुरले टोकेका बिरामीहरु रेविज खोपको लागि अस्पताल धाउन थालेपछि पालिकाले रेविज विरुद्धको खोप लगाउने अभियान नै थालेका हुन । देउखुरीको लमही अस्पतालमा मात्र रेबिज बिरुद्धको खोप लगाउने गरिएको छ । स्वास्थ्य चौकीमा रेबिज बिरुद्धको खोप राख्ने गरिएको छैन । राप्ती गाउँपालिका सिसहनियाँका स्वास्थ्य चौकीका प्रम्ुख धनबहादुर खड्काले स्वास्थ्य चौकीमा रेबिज बिरुद्धको खोप लगाउने आउने संख्या बढेपनि आफुहरुले खोप लगाउने लमही अस्पतालमा पठाउने गरेको बताउनुभयो ।
उहाँले भन्नुभयो, ‘ खोपको लागि हामीले लमही अस्पताल पठाउने गरेका छौ, रेबिजबाट जोगिन कुकुर र बिरालालाई खोप लगाउनु नै हो ।’ राप्ती गाउँपालिकाले पनि चालु आर्थिक वर्षमा सामुदायिक कुकुरको संख्या घटाउन बन्ध्याकरण शिविर चलाउने योजना बनाएको छ । मानिसमा संक्रमण भएर रेविज लागेमा बिरामीलाई बचाउन सकिदैन । नेपालमा वार्षिक करिब एकसय जनासम्मले रेबिजका कारण ज्यान गुमाउने गरेको सरकारी विवरण छ । रेबिज संक्रमण भएका जनावरले मानिसलाई टोकेमा त्यस्ता जनावरको ¥यालबाट रोग सर्न सक्ने चिकित्सकहरू बताउँछन् । रेबिज भाइरस शरीरमा प्रवेश गरेपछि फैलिनका लागि केही दिनदेखि महिनांैसम्म पनि लाग्न सक्ने चिकित्सकको भनाइ छ ।
