तिलाचन पाण्डे
असार २७,२०८० गुल्मीः जिल्ला प्रशासन कार्यालय गुल्मीले गुल्मीमा सार्वजनिक यातायातहरुले टिकट नकाटी यात्रु बोक्ने र तोकिएको भन्दा बढी भाडा लिए कारवाही गर्ने भएको छ ।

प्रमुख जिल्ला अधिकारी टेकबहादुर केशीले सोमबार यातायात ब्यवसायीहरुलाई जिल्ला प्रशासन कार्यालयमा बोलाएर जिल्ला भित्रका सडकमा चल्ने गाडीहरुले यात्रुहरुलाई अनिवार्य टिकट काटेर मात्र यात्रा गराउनुपर्ने पर्ने र तोकिएको भन्दा बढी भाडा असुले कडा भन्दा कडा कारवाही गर्ने चेतावनी दिनुभएको छ ।

यात्रुहरुले बढी भाडा लिएको गुनासो प्रशासनमा गरेपछि प्रशासनले उक्त कदम चालेको जनाएको छ ।
त्यस्तै बर्षायामा पहिरोका कारण यातायात अबरुद्ध हुन नदिन हरेक सडकहरुमा डोजर स्टाण्डबाई राख्ने ,सवारी चालकले यात्रुहरुलाई अभद्र ब्यवहार गर्ने र मोवाईल प्रयोग गरी सवारी चलाउने गरेको पाइएकोले अब देखि चालकले मोवाइल चलाउन नपाइने निर्णय भएको छ ।

रातो प्लेटका गाडीहरुले अब देखि यात्रु ओसारपसार गर्न नपाउन ,२० बर्ष पुराना गाडीहरु चल्नबाट पनि रोक लगाउने निर्णय भएको छ । इन्धन डिजेल पेट्रोलको समायोजन अनुरुप सार्वाजानिक गाडीहरुको भाडा पनि समायोजन गरी सो को जानकारी प्रशासनमा पठाउनुपर्ने प्रशासनले जनाएको छ ।

यस्तै चालकले मापसे गरे नगरेको चेक जाँच पनि प्रहरीले नियमित रुपमा कडाईका साथ गर्ने भएको छ ।
सोमबार प्रशासनमा भएको निर्णयलाई कार्यन्वयन नगरे कानून अनुसारको कारवाही गरेरै छाड्ने प्रशासनले चेतावनी दिएको छ ।

तिलाचन पाण्डे
असार २७,२०८० गुल्मीः मुसिकोट नगरपालिकाले संस्कृति संरक्षण गर्नका लागि होमस्टे र पन्चेबाजा समूहलाई पन्चेबाजा वितरण गरेको छ ।

नगरपालिकाले स्थानीय स्वाँरा होमस्टे , आँपचौर पन्चेबाजा समूह र दिगामचौर पन्चेबाजा समूहलाई संस्कृति संरक्षणमा थप टेवा पुग्ने भन्दै पन्चेबाजा वितरण गरेको नगरपालिकाले जनाएको छ । पालिकाको दूई लाख २७ हजार रकमबाट पन्चेबाजा खरिद गरी वितरण गरिएको नगरपालिकाले जनाएको छ ।

पुरानो परम्परा , संस्कृति संरक्षण र उहाँहरुलाई थप ब्यवसायीक बनाउनका लागि पन्चेबाजा वितरण गरिएको नगरप्रमुख जीवन खरेलले जानकारी दिनुभयो ।
स्थानीय परम्परा ,संस्कृति संरक्षण गर्नु र नागरिकहरुलाई आत्म निर्भर बनाउनु नगरको दायीत्व पनि भएको खरेलको भनाई छ ।
कृत्रिम हात खुट्टा प्रदान
यसैबीच मुसिकोट नगरपालिकाले दुर्घटनामा हात खुट्टा गुमाएका तीन जनालाई कृत्रिम हात खुट्टा प्रदान गरेको छ ।

मुसिकोट नगरपालिका वडा नम्वर ७ वामीटक्सारकी २१ वर्षीय रुपा राना सवारी दुर्घटनामा परी वाँया हात गुमाउनुभयो , वडा नम्वर तीनका करिव ३० वर्षिय अशोक सुनार ट्याक्टर दुर्घटनामा परी वाँया खुट्टा गुमाउनुभयो । उहाँको तिघ्रा भन्दा मुनीको खुट्टा छैन । यस्तै सोही वडाकै ३० वर्षका इश्वरी रिजालले पनि सवारी दुर्घटनामा परेर खुट्टा गुमाउनुभयो ।

उहाँहरुलाई नगरपालिकाले तीन लाख रुपियाँको बजेटबाट एक कार्यक्रमका बीच कृत्रिम हात खुट्टा प्रदान गरेको छ ।
उहाँहरुकै माग अनुसार रकम विनियोजन गरेर कृत्रिम हातखुट्टा प्रदान गर्न पाउँदा आफूहरुलाई खुसी लागेको नगरप्रमुख जिवन खरेलले बताउनुभयो । नगरभित्र रहेका अपाङगता भएका ब्यक्तिहरुको साथमा नगरपालिका सधै रहने भन्दै स्थानीय सरकारले सरकार भएको अनुभूति दिने गरी काम गर्ने दाबी गर्नुभयो ।

कृत्रिम हात खुट्टा प्रदान गर्दै खरेलले अपाङगता भएका ब्यक्तिहरुले पनि समाजमा उदाहरणीय काम गरेर देखाउन सक्ने आफूले विश्वास लिएको बताउनुभयो ।
कृत्रिम हात खुट्टा प्राप्त गरेपछि खुसी ब्यक्त गर्दै स्थानीय सर्कार भएको अनुभूति आफूहरुले पाएको बताउँदै दुःख, सुखको सारथी बन्न आग्रह गर्नुभयो ।

आफूहरु पहिले अपाङता भएकै कारण सीमित घेराभित्र रहनुपरेको बताउँदै अव त्यस घेरालाई पार गर्दै सपाङता सरह नै काम गर्न सक्नेमा आफूहरु विश्वस्थ रहेको उहाँहरुको भनाई छ ।
 

असार २६,२०८० गुल्मी :चन्द्रकोट गाउँपालिका गुल्मीको चालु आर्थिक बर्षको स्विकृत बार्षिक कार्यक्रम अन्तर्गत ५० प्रतिशत लागत साझेदारीमा कृषि जन्य यन्त्र उपकारण वितरण कार्यक्रम मंगलवार सम्पन्न भएको छ।

गाउँपालिका अध्यक्ष युवराज खत्री क्षत्रीको अध्यक्षतामा संचालित वितरण कार्यक्रममा उपाध्यक्ष विष्णु प्रसाद भण्डारी, प्रमुख प्रशासकीय अधिकृत विष्णु प्रसाद भुसाल, वडा अध्यक्ष तथा कार्यपालिका सदस्यहरु, गाउँसभा सदस्यहरु लगायतको उपस्थिति रहेको थियो।

कार्यक्रममा बोल्दै अध्यक्ष युवराज केसिले गाउँपालिका भित्र रहेका कृषकहरुलाई कृषि पेशा प्रति थप आकर्षित गर्दै कृषि व्यवसायलाई आधुनिकीकरण एवम् व्यवायिकीकरण गर्नका लागि पालिकाले हरेक बर्ष जस्तो यस्ता किसिमका कार्यक्रमलाई विशेष ध्यानका साथ कार्यान्वयन गरिएको वताउनुभयो।

कृषकहरुलाई लागत साझेदारीमा यस्ता प्रकृतिका कार्यक्रम संचालन गर्दा उनीहरुले प्राप्त गर्ने यन्त्र उपकरणमा अपनत्व समेत बोध हुने भएकाले यस्ता कार्यक्रमबाट लक्षित समुदायसँग प्रतिफल हासिल गर्न सहज हुने बताउदै अध्यक्ष खत्रीले यो मात्र नभएर गाउँपालिकाको कृषि र पशु व्यवसायलाई थप व्यवस्थित गर्दै लैजान मागमा आधारित अन्य कार्यक्रमहरुपनि संचालन गर्दै आईरहेको र ठूलो परिमाणमा कृषि व्यवसाय गर्ने किसान तथा साना किसान व्यवसायिहरुलाई समेत संवोधन हुने खालका २प्रकृतिका कार्यक्रमहरु संचालन गर्दै आएको बताउनुभयो। कार्यक्रममा बोल्दै गाउँपालिका उपाध्यक्ष विष्णु प्रसाद भण्डारीले कृषिलाई माथि उठाउने र कृषिमा निरन्तर लाग्नेहरुका लागि आगामी दिनमा पालिकाले अझै सहयोग गर्दै जाने बताउनुभयो।

उद्यम गर्न चाहाने समुदायमा रहेका सबैलाई समेटेर अघि बढाउने पाखा पखेरामा उत्पादन गर्न चाहानेका लागि पालिकाले आगामी दिनमा सहयोग गर्ने प्रतिवद्धता जनाउनुभयो। कार्यक्रममा बोल्दै आर्थिक विकास समिति संयोजक वल बहादुर बस्नेतले गाउँपालिकाका विपन्न र कृषिलाई व्यवसायीकीकरण बनाउनको लागि ५० प्रतिशत लागत साझेदारीमा कृषिजन्य यन्त्र उपकरण वितरण गर्न खोजिएको बताउनुभयो।

लाभग्राहीहरुको तर्फबाट कार्यक्रममा बोल्दै कृषक घनश्याम गौतमले लम्पी स्कीन जस्ता रोगका कारण जोत्नका लागि गोरुको अभाव रहेको र पछिल्लो समयमा गोरुपालक कृषकहरु समेत कम हुँदै गएको अवस्थामा यस्ता किसिमका उपकरणले किसानलाई थप सहजीकरण गर्ने र कम्तिमा टोल टोलमा यस किसिमका यन्त्रहरु हुँदा खेत बारीमा खनजोत गर्न सहज हुने तथा मिनिमिल जस्ता सामाग्रीले उत्पादित बस्तुहरु कुटानी पिसानी गर्न अव हैरानी खेप्न नपर्ने अवस्था आएकोमा गाउँपालिकालाई विशेष धन्यवाद दिनुभयो।

कार्यक्रममा गाउँपालिकाले सार्वजनिक सूचना प्रकाशन गरी माग संकलन गरेका कृषकहरुमध्ये कार्यपालिका बैठकबाट छनौटमा परेका १९ जना कृषकहरुलाई मिनिटिलर, १८ जनालाई कम्वाईन (कुटानी पिसानी) मिल तथा ५जनालाई मकै छोडाउने मेसिन (कर्नसेलर) गरी कुल ४२ जना कृषकलाई यन्त्र उपकरणमा साझेदारी गरिएको थियो। कार्यक्रममा स्वागत मनतव्य राख्दै प्रमुख प्रशासकीय अधिकृत विष्णु प्रसाद भुसालले सबैभन्दा सम्मानित र मर्यादित पेशा कृषि रहेको भन्दै कृषि पेशालाई निर्वाहमुखीबाट उत्पादन मुखी बनाउदै लैजानुपर्ने बताउनुभयो भने उक्त कार्यक्रमको संचालन प्रशासन शाखा प्रमुख शिव ज्ञवालीले संचालन गर्नुभएको थियो।

तिलाचन पाण्डे
असार २५,२०८० गुल्मी : गुल्मीमा ४८८रोपनी बाँझो जग्गामा चक्लाबन्दी खेती सुरु गरिएको छ ।

जिल्लाका विभिन्न स्थानीय तहमा गरी कूल ४८८ रोपनी जग्गामा चक्लाबन्दी खेती गरिएको प्रधानमन्त्री कृषि आधुनिकीकरण परियोजना , परियोजना कार्यन्वयन इकाई गुल्मीका प्रमुख गंगाकुमारी पोखरेलले जानकारी दिइन् ।

धुर्कोट २ पिपलधारामा सुभसन्देश उपभोत्ता सहकारी संस्थाका १२ जनाले बाँझो ६० रोपनी जग्गामा सुन्तला खेतीे , मदाने गाउँपालिका ६ पुर्कोटदहमा कंकेदेउराली बिउँ उत्पादन समूहका २३ जनाले ६८ रोपनी बाँझो जग्गामा सुन्तला खेती, सत्यवती गाउँपालिका वडा नम्वर४ को लिम्घामा सत्यवती कृषक समूहका ९ जनाले १०० रोपनीमा कागती खेती , कालीगण्डकी गाउँपालिका ३ मा हिमालयन कृषि तथा पशुपन्छी फर्मले २०० रोपनी जग्गामा कफी खेती र रेसुङगा नगरपालिका ३ मा ६० रोपनी जग्गाको क्षेत्रफलमा तरकारी खेती मार्फत चक्लाबन्दी खेती गरिएको पोखरेलले बताइन् ।

कृषि यन्त्रहरुको प्रयोग गरी चक्लाबन्दी खेती गरिएको कार्यालयले जनाएको छ । यसरी चक्लाबन्दी गरी खेती गर्दा उत्पादनमा वृद्धि हुने,लागत ,समयको पनि बचत हुने र स्थानीय स्तरमै रोजगारीको अवसर पनि सृजना हुने कार्यालयका सूचना अधिकारी नारायणी गाहाले दाबी गरिन् ।

प्रत्येक चक्लाबन्दी खेती गर्ने कृषक , तथा समूहलाई कार्यालयको तर्फबाट कूल लागतको ५० प्रतिशत अर्थात १२ लाख रुपियाँ उपलध गराइने छ । ५० प्रतिशत रकम कृषक वा कृषक समूहको लागत रहने कार्यालयले जनाएको छ । जसमा स्थानीय तहको पनि लगानी रहने कार्यालयले जनाएको छ ।

फलफूलको चक्लाबन्दीमा सुन्तला जातमा कलमी बिरुवाहरु लगाइएको छ भने कफीमा जालीभित्रको घरमा तयार गरिएको नर्सरीका बिरुवाहरु रोपण गरिएको गाहाले जानकारी दिनुभयो । बिरुवाहरु स्वच्छ मान्यता प्राप्त नर्सरीका भएकाले कुनै शंका नरहेको गाहाको दाबी छ ।

कलमी सुन्तलाका बिरुवाहरुले करिव तीन वर्षबाट उत्पादन दिन सुरु गर्ने र कफीका बिरुवाहरुले पाँच वर्षमा उत्पादन दिन सुरु गर्ने गाहाले बताइन् ।

गत वर्ष जिल्लाका विभिन्न स्थानीय तहमा पाँच वटा चक्लाबन्दीमा खेती गरेको कार्यालयले जनाएको छ । गतवर्षको चक्लाबन्दीमा यस वर्ष साना सिंचाइमा कार्यालयले सहयोग गरेको गाहाले बताइन् ।