भदौ २,२०८० गुल्मीः मुसिकोट नगरपालिका वडा नम्वर एकका ४५ वर्षीय वडा अध्यक्ष मोहन घिमिरेको निधनमा नगरपालिकाले आइतबार शोक विदा दिने निर्णय गरेको छ ।
मुसिकोट नगरपालिकाको नगरप्रमुख स्तरीय बैठकबाट आइतबार शोक विदा दिने निर्णय भएको प्रमुख प्रशासकीय अधिकृत विनोद कुँवरले जानकारी दिए ।
आइतबार नगरपालिका, वडा कार्यालयहरु बन्द रहने कुँवरले जारी गरेको सूचनामा उल्लेख गरिएको छ ।
घिमिरेले शनिबार बिहान ५ बजे सामाजिक संजाल फेसबुकमा परिस्थितिको चपेटामा परेपछि बाँच्नुको अर्थ हुँदो रहेनछ, प्रिय अनिता,साथ निभाउन सकेन , मलाई माफ गरे , घर परिवार ,साथिभाई ,शुभचिन्तक सबै प्रति माफी चाहान्छु । अल बिदा लेखेका थिए ।
सामाजिक संजालमा पोष्ट देखेपछि स्थानीय र प्रहरीको टोलीले खोजतलास गर्दा झाँक्री थानमा रुखमा झुण्डिएको अवस्थामा फेला परेको जिल्ला प्रहरी कार्यालय गुल्मीका प्रमुख प्रहरी उपरीक्षक नविन किशोर प्रधानले जानकारी दिए ।
प्रहरीले स्थलगत मुचुल्का तयार गरी ,शबलाई पोष्टमार्टम गरी आफन्तको जिम्मा लगाइएको प्रधानले बताए । घटनाको बारेमा थप अनुसन्धान जारी रहेको जिल्ला प्रहरी कार्यालय गुल्मीले जनाएको छ ।
घिमिरे नेपाली काँग्रेस मुसिकोट नगरको नगर सभापति समेत थिए ।
