तिलाचन पाण्डे
साउन २७,२०८० गुल्मीः गुल्मीको सडक पूर्वाधार बिकास कार्यालयमा दुई वटा कार्यालय प्रमुख फेरिदा पनि वेभ साइडमा भने कार्यालय प्रमुखको नाम अझै फेरिन सकेको छैन ।
२०७८ असोजमा सरुवा भएर रुपन्देही जानुभएका तत्कालिन कार्यालय प्रमुख इन्जिनियर गोपीराज पुन मगर सरुवा भएर गएको दुई वर्षसम्म पनि कार्यालयको वेभ साइडमा प्रमुख गोपीराज पुन मगर नै रहेको पाइएको छ ।
पुन मगर सरुवा भएर गएपश्चात तत्कालिन इन्जिनियर सागर मरासिनीले निमित्तको रुपमा कार्यालय प्रमुखको जिम्मेवारी सम्हाले । त्यस पश्चात २०७९ असोजमा उनको पनि रुपन्देहीमा सरुवा भयो ।
मरासिनीको सरुवा पश्चात तत्कालै कार्यालय प्रमुखको रुपमा सचितानन्द चौधरी आए । चौधरी आएको करिव एक वर्ष हुनै लाग्दा समेत कार्यालयको वेभ साइडमा कार्यालय प्रमुखको नाम गोपीराज पुन नै रहेको पाइएको छ ।
कार्यालय प्रमुखको नाम नै वेभ साइडमा परिवर्तन नभए पश्चात अन्य कर्मचारीको नाम परिवर्तन होला भन्नेमा त कल्पना पनि गर्न सकिदैन ।
२०७९ असोजमै रुपन्देही सरुवा भएर जानुभएका इन्जिनियर सूर्य भण्डारी ,२०७८ फागुनमा सरुवा भई जानु भएका र हाल कोष तथा लेखा नियन्त्रकको कार्यालय गुल्मीमा रहनुभएका आर्थिक प्रशासन शाखाका प्रमुख यमप्रसाद श्रेष्ठ लगायतको नाम कार्यालयको वेभ साइडमा उल्लेख छ ।
कार्यालयका सूचना अधिकारी भक्तराज गिरीले कार्यालयको वेभ साइड अपडेट नभएको स्विकार गरे । कार्यालयको ध्यान त्यसतर्फ नगएको भन्दै केही दिन भित्रैमा अपडेट गर्ने प्रतिबद्धता ब्यक्त गरे ।
यता नागरिक समाज गुल्मीका अध्यक्ष पदमप्रसाद पाण्डेले कार्यालयका कर्मचारीको विवरण समेत अपडेट नगर्ने कार्यालयले गरेको सेवा प्रवाहको बारेमा पनि सोच्नुपर्ने र तत्काल अपडेट गर्न आग्रह गर्नुपर्नेमा जोड दिए ।
