मंसिर ९,२०८१ गुल्मीः घरेलु तथा साना उद्योग कार्यालय गुल्मीका उद्यम विकास सहजकर्ता त्रिविक्रम ज्ञवाली उत्कृष्ट कर्मचारीको रुपमा सम्मानित हुनुभएको छ ।

१० औँ उद्योग दिवसको अवसरमा ज्ञवालीलाई कार्यक्रमका प्रमुख अतिथि खिलध्वज पन्थी र विशेष अतिथि प्रमुख जिल्ला अधिकारी जनार्दन गौतमले सम्मान गर्नुभएको हो ।

ज्ञवालीलाई उत्कृष्ट कार्यगरेवापत उत्कृष्ट कर्मचारी छनोट गरी सम्मान गरिएको घरेलु तथा साना उद्योग कार्यालय गुल्मीका प्रमुख राजीव अर्यालले जानकारी दिनुभयो ।

उद्योग दिवसका अवसरमा जिल्ला भित्रका ६५ उद्योगीहरुलाई सम्मान गरिएको थियो ।

सूर्य सुनार
कार्तिक १६,२०८१ गुल्मी : गुल्मीको मुसिकोट नगरपालिकाले घरदैलोमै पुगेर सेवा प्रवाह गरेको छ । नगरपालिकाले सिम्ले सामुदायिक सेवा केन्द्रको शुभारम्भ गर्दै सेवा दिएको हो ।

मुसिकोट नगरपालिकाको ९ वटा वडा मध्ये भूगोलको आधारमा सबैभन्दा ठूलो वडा रहेको १ नम्बर वडा कार्यालय पौदी अमराईबाट टाढा रहेका बस्तीहरुलाइ सेवा प्रवाहमा जोड्न र नागरिकलाई सहज ढङ्गले सेवा दिन नगरपालिकाले सामुदायिक सेवा केन्द्रको सुभारम्भ गरेको नगरप्रमुख जीवन खरेलले बताउनुभयो ।

कुनै पनि सेवा लिन वडा कार्यालय सम्म धाउनुपर्ने समस्याको अत्य भएको नगरप्रमुख खरेलले बताउनुभयो । स्थानीय सरकार भनेको नागरिकको नजिकको सरकार भएको हुँदा नगरपालिकाले घरदैलोमा गएर सेवा दिने बताउनुभयो ।

बिवाह दर्ता, उपभोक्ता समिति मार्फत हुने योजनाको सम्झौता, सिफारिस, मालपोत संकलन र प्राविधिक सल्लाह जस्ता काम सामुदायिक सेवा केन्द्रबाट गरिएको मुसिकोट नगरपालिकाका योजना शाखा प्रमुख प्रकाश घिमिरेले बताउनुभयो ।
मुसिकोट नगरपालिका वडा नम्बर १ सिम्लेका नागरिकहरु घरदैलोबाट सेवा लिन पाउँदा निकै खुशी भएका छन् । नगरपालिकाले घरदैलोमै आएर सेवा दिदाँ स्थानीय सरकार भएको महशुस भएको डमर बहादुर धर्तीले बताउनुभयो ।

त्यस्तै आर्का एक स्थानीय नर बहादुर खातीले सामुदायिक सेवा केन्द्रबाट पहिलो योजनाको सम्झौता गर्दै नगरपालिकालाई धन्यवाद दिनुभएको थियो । पहिले योजना सम्झौता गर्न वडा देखी नगरपालिका सम्म जानु पर्ने थियो । तर नगरपालिकाले सामुदायिक स्वास्थ्य सेवा केन्द्रको स्थापना गरेर घरदैलो बाट सेवा प्रवाह गर्दा खुशी लागेको बताउनुभयो ।

तिलाचन पाण्डे
कात्तिक १३,२०८१ गुल्मीः सदरमुकाम केन्द्रित मात्रै कार्यक्रम नगर्न एक कार्यक्रमका सहभागीहरुले आग्रह गरेका छन् ।

जिल्लामा दुई सङघीय निर्वाचन क्षेत्र, प्रदेशका चार र १२ स्थानीय तहमा केन्द्रित गरेर कार्यक्रम राख्न चन्द्रकोट गाउँपालिकाका अध्यक्ष युवराज केसीले आग्रह गर्नुभयो । सदरमुकाम मात्रै केन्द्रित कार्यक्रम गर्नुभन्दा स्थानीय तह र निर्वाचन क्षेत्रस्तरीय कार्यक्रमहरु गर्दा थप प्रभावकारी हुनेमा उहाँले जोड दिनुभयो ।

घरेलु तथा साना उद्योग कार्यालय गुल्मीले सदरमुकाम तम्घासमा सोमबार आयोजना गरेको सेवा प्रवाह सरलीकृतको लागि अन्तर तह समन्वय र सहकार्य सम्बन्धी कार्यक्रममा केसीले सो कुरा बताउनुभएको हो । सोही कार्यक्रममा केसीले खादाहरुको प्रयोग गर्दा स्थानीय स्तरमा उत्पादन भएका उद्योगहरुको प्रयोग गर्दा उहाँहरुलाई थप प्रोत्साहन हुने बताउनुभयो ।

सोही कार्यक्रमा चन्द्रकोट गाउँपालिकाका सूचना अधिकारी तथा उद्योग शाखा हेर्ने शिब ज्ञवालीले घरेलु तथा साना उद्योग कार्यालयले दर्ता भएका उद्योगहरुको लगत तथा विवरण उपलब्ध नगराउँदा समस्या भएको बताउनुभयो । पाँच लाख रुपियाँसम्मको पुजी भएको उद्योग दर्ता गर्ने अधिकार स्थानीय सरकारलाई भएपनि घरेलु कार्यालयमा दर्ता भएका उद्योगहरु नविकरण गर्नका लागि पालिकामा आउने भएकाले आफूहरुले नविकरण गर्न नसकेको उहाँको भनाइ छ । घरेलु कार्यालयमा दर्ता भएका उद्योगहरुको नविकरण गर्ने अधिकार आफूहरुमा भए नभएको बारेमा अन्योलता छाएको ज्ञवालीले बताउनुभयो । कार्यालयले फाइल र लगतको विवरण पालिकामा हस्तान्तरण गर्ने ब्यबस्था गरेमा सहजता हुने उहाँको तर्क छ ।

स्थानीय तहमा मदिराजन्य र सुर्तिजन्य कारोवारमा समस्या देखा पर्ने गरेकाले यसको बारेमा थप स्पस्ट पार्नुपर्नेमा सत्यवती गाउँपालिकाका प्रमुख प्रशासकीय अधिकृत कमलप्रसाद भुसालले जोड दिनुभयो ।
घरेलु तथा साना उद्योग कार्यालय गुल्मीका कार्यालय प्रमुख राजीव अर्यालले हालसम्म कार्यालयले गरेका कार्य र आगामी कार्यक्रमको बारेमा जानकारी गराउनुभएको थियो । उहाँले आगामी दिनहरुमा स्थानीय तह केन्द्रित कार्यक्रमहरु गर्दै जाने र सकभर स्थानीय उत्पादनलाई नै प्रयोग गरेर उद्योगीहरुलाई प्रोत्साहन गर्दै लैजाने बताउनुभयो ।

उद्योग वाणिज्य तथा उपभोत्ता हित संरक्षण निर्देशनालय रुपन्देहीका बरिष्ठ शाखा अधिकृत नेत्रप्रसाद भुसालले सेवा प्रवाह र कानूनी प्रावधानका बारेमा प्रस्तुतिकरण गर्नुभएको थियो । सोही कार्यक्रममा करदाता सेवा कार्यालय तम्घास गुल्मीका प्रमुख विक्रम पन्थीले करको बारेमा स्थानीय तह केन्द्रित कार्यक्रम गर्ने गरी योजना बनाएको बताउनुभयो । स्थानीय तह केन्द्रित करदाता शिक्षा कार्यक्रम गर्ने र करको बारेमा ग्रामीणस्तरबाटै स्पस्ट पार्नुपर्ने आवश्यकता रहेको बताउनुभयो ।

गुल्मी जिल्लाका प्रमुख जिल्ला अधिकारी कृष्ण्प्रसाद शर्माले बजार अनुगमन र नियमनका बारेमा तीनै तहका सरकारको समन्वयमा काम गर्दै आएको बताउँदै थप प्रभावकारी बनाउँदै लैजानुपर्नेमा जोड दिनुभयो ।

जिल्ला समन्वय समिति गुल्मीका प्रमुख द्रोर्णबहादुर खत्रीले सरल तरिकाले सेवाग्राहीहरुलाई केन्द्रित गरी सेवा प्रवाह गर्नुपर्ने बताउनुभयो । उद्योग दर्ता,खारेज र करको बारेमा ग्रामीण स्तरसम्म पुग्नुपर्नेमा उहाँले जोड दिनुभयो । जसका लागि तीनै तहका सरकारको समन्वय हुनु आवश्यक रहेको उहाँको भनाइ छ ।

तिलाचन पाण्डे
कात्तिक ११,२०८१ गुल्मीः जिल्ला प्रशासन कार्यालय गुल्मीबाट एक हप्तामा ५३१ जनाले राहदानी बनाएका छन् ।

जिल्ला प्रशासन कार्यालय गुल्मीका सहायक प्रमुख जिल्ला अधिकारी हरिप्रसाद गैरेका अनुसार गत आइतबारदेखी शुक्रबारसम्म एक हप्ताको अवधिमा ५३१ जनाको राहदानीका लागि आवेदन सङकलन भएको बताउनुभयो । जसबाट २७ लाख ८० हजार पाँच सय रुपियाँ राजस्व सङकलन भएको उहाँको भनाइ छ ।

गत आइतबार देखी शुक्रबारसम्मको अवधिमा नयाँ नागरिकता ५७२, प्रतिलिपि २९३, गैर आवासीय नागरिकता दुई, नावलक परिचयपत्र ४६ ,राहदानी वितरण ३६५,राष्ट्रिय परिचयपत्रका लागि आवेदन ७५६, परिचयपत्र वितरण ३७८, संस्था नविकरण छ र ९८ दलित,जनजाति,पारिवारिक विवरण तथा अन्य प्रमाणित भएको गैरेले बताउनुभयो ।

सोही अवधिमा राहदानीबाट २७ लाख ८० हजार पाँच सय रुपियाँ र संस्था नविकरणबाट तीन हजार छ सय रुपियाँ गरि कुल २७ लाख ८४ हजार एक सय रुपियाँ राजस्व सङकलन भएको गैरेले जानकारी दिनुभयो ।

जिल्ला प्रशासन कार्यालय गुल्मीमा यस अवधिमा नागरिकता ,राहदानी र परिचयपत्र बनाउनेको सङख्यामा वृद्धि भएको उहाँको भनाइ छ । दशै तिहारजस्ता पर्वहरुमा पर्व मनाउन देशका शहर र विदेशबाट पनि आउँदा राहदानी, नागरिकता बनाउनेको सङख्यामा पनि वृद्धि भएको गैरेले बताउनुभयो ।

न्यून जनशक्तिकाबीच पनि सेवाग्राहीहरुको चापलाई मध्यनजर गर्दै बिहान साँझ गरी सेवा प्रवाह गरिएको गुल्मी जिल्लाका प्रमुख जिल्ला अधिकारी कृष्णप्रसाद शर्माले जानकारी दिनुभयो ।

तिलाचन पाण्डे
कात्तिक १०,२०८१ गुल्मीःविगत १० वर्षदेखी कतारमा रोजगारीमा रहनुभएका कालीगण्डकी १ का ३६ वर्षीय लक्ष्मीकान्त पाण्डे दसैँ मनाउँन घर आउनुभयो । दसैँ मनाएर पुनः रोजगारीका लागि कतार जाने समय आउँन थालेपछि उहाँलाई श्रम गर्नका लागि बुटवल वा काठमाडौँ जाने भन्ने अन्योलता छायो ।

पाण्डेलाई पालिकाबाटै श्रम स्वीकृति हुन्छ भन्ने बारेमा थाहा नै थिएन् । पहिले पहिले आउँदा बुटवल र काठमाडौँबाट श्रम गर्दै आउनुभएका उहाँले अहिले पनि त्यही होला भनेर सोच्नुभयो । तर अहिले गाउँको नजिकको सरकार पालिकाबाट श्रम स्वीकति भएपछि उहाँले खुसी ब्यक्त गर्नुभयो । पालिकाबाटै श्रम हुँदा उहाँको बुटवल काठमाडौँ जाने समय र पैसा दुवै बचत भएकाले आफूले बल्ल स्थानीय सरकार भएको अनुभूती पाएको बताउनुभयो । स्थानीय सरकार त खासमा सरकारै रहेछ भन्दै उहाँले १० मिनेटमै श्रम स्वीकृतिको काम सकिएपछि स्थानीय सरकार र कर्मचारीलाई धन्यबाट ब्यक्त गर्नुभयो ।

यस्तै केही महिना पहिले साउदीबाट घर आउनुभएका सोही स्थानका मित्रलाल पाण्डेले पनि पालिकाबाटै श्रम स्वीकृति पाएकोमा खुसी ब्यक्त गर्नुभयो । पालिकाबाटै श्रम गर्न पाउँदा उहाँले पनि समय र पैसा दुबै बचत भएको बताउनुभयो । विना झन्झट सहज रुपमा पालिकाबाटै श्रम स्वीकृति भएको उहाँको प्रतिक्रिया छ ।

गाउँपालिकाबाट आर्थिक वर्ष२०७९।०८० मा तीन जना, २०८०।०८१ मा २९ जना र चालु आर्थिक वर्षको हालसम्म चार जनाले श्रम गरेको कालीगण्डकी गाउँपालिकाका रोजगार सहायक तिलक रानाले जानकारी दिनुभयो । अझै पनि पालिकाबाट श्रमको काम हुन्छ भन्नेमा धेरै जानकार नभएका कारण बुटवल काठमाडौँ धाउने गरेको उहाँले बताउनुभयो ।

गाम्रीणस्तर सम्म पालिकाबाटै श्रमको काम हुन्छ भन्ने बारेमा प्रचार प्रसार गर्नेपर्नेमा रानाले जोड दिनुभयो ।

तिलाचन पाण्डे
कात्तिक १०,२०८१ गुल्मीः गुल्मीको रेसुङगा विमानस्थलबाट एक महिनापछि नियमित उडान सुरु भएको छ । मौसम खरावका कारण विगत एक महिनादेखी नियमित उडान हुन नसकेको विमानस्थलका स्टेशन प्रमुख सुमन थापाले बताउनुभयो । हप्ताको दुई दिन बुधबार र शुक्रबार उडान हुने कार्यतालिका रहे पनि विगत एक महिनादेखी नियमित उडान हुन नसकेका थापाले बताउनुभयो ।

कात्तिक महिनाको सात गते बुधबार र ९ गते शुक्रबार नियमित उडान भएकाले मौसम सफा भएमा नियमित हप्ताको दुइ दिन उडान हुने उहाँको भनाइ छ ।

असोज महिनामा चार गते र २५ गतेमात्रै उडान भएको थियो । मौसम सफा नभएका कारण उडान भर्न नसकिएको थापाले बताउनुभयो । क्रमिक रुपमा मौसम सफा हुँदै गएकाले नियमित उडान हुने भन्दै यात्रुहरुलाई निरास नहुन उहाँले आग्रहसमेत गर्नुभएको छ ।

गत असार १४ गतेदेखी करिव दुई महिना रेसुङगा विमानस्थलबाट उडान ठप्प भएपनि भदौ ७ गतेबाट उडान नियमित भएको थियो ।
पहिले हप्ताको एक दिन शुक्रबार मात्रै उडान भर्दै आएको जहाजले यात्रुको अत्याधिक चाप बढेपछि साप्ताहिक तीन उडानको अनुमति पाएको थियो । वर्षायाम सुरु भएपछि पछिल्लो समय हप्ताको एक दिन शुक्रबार मात्रै उडान गर्ने गरी कार्यतालिका रहेको थापाले बताउनुभयो । पछिल्लो समयमा यात्रुहरुको चापलाई मध्यनजर गर्दै हप्ताको शुकबार र बुधबार दुई दिन उडान गर्ने कार्यतालिका रहेको थापाले बताउनुभयो ।

काठमाडौँबाट बिहान ६ बजेर ३० मिनेट र रेसुङगाबाट काठमाडौँका लागि बिहान ७ बजेर ४५ मिनेटमा उडान हुने कार्यतालिका रहेको उहाँले बताउनुभयो ।

हवाई यात्रामा गुल्मी जोडिएसङगै फ्रान्स र स्पेनबाट पनि पर्यटकहरु घुम्नको लागि गुल्मी आएको रेसुङगा नगरपालिका गुल्मीले जनाएको छ ।
हाल गुल्मीबाट काठमाडौँका लागि सात हजार तीन सय र काठमाडौँबाट गुल्मीका लागि सात हजार पाँच सय रुपियाँ भाडा कायम गरेको स्टेशन प्रमुख थापाले बताउनुभयो ।

जिल्ला सदरमुकाम तम्घासबाट करिव पाँच मिलोमिटर कच्चीबाटो पछि विमानस्थल पुग्न सकिन्छ । विमानस्थलबाट गतवर्षको वैशाख २९ गतेबाट व्यवसायिक उडान शुरु गरिएको थियो ।