हुमाकान्त पोखरेल
असोज १,२०७७ गुल्मी : गुल्मीमा कोरोना परीक्षण प्रयोगशालाको उदघाटन गरिएको छ । बिहीबार सरकारका परराष्ट्रमन्त्री एवम् प्रवक्ता प्रदिपकुमार ज्ञवालीले कोभिड १९ परीक्षण प्रयोगशालाको उद्घाटन गरे ।
जिल्लामा कोरोना संक्रमितको पहिचान गरी कोरोना समुदाय स्तरमा फैलिन नदिनको लागि पीसीआर मेसिन संचालनमा ल्याउन लागिएको हो । उक्त मेसिन मन्त्री ज्ञवालीले नै गत साउन २ गते रेसुङ्गा नगरपालिकाका मेयर डिल्लिराज भुसाललाई हस्तान्तरण गरेका थिए । तर बीचमा केही प्राविधिक समस्या देखिपछि मर्मतको लागि काठमाडौ लगिएको थियो । अहिले काठमाडौबाट उक्त मेसिनको सट्टा नयाँ मेसिन ल्याइएको छ ।
रेसुङ्गा नगरपालिका वडा नम्बर ९ उपल्लो तम्घासमा राखिएको परीक्षण प्रयोगशालाबाट एक पटकमा ९६ वटा स्याम्पलको नतिजा आउने तम्घास अस्पतालका प्रमुख डाक्टर उत्तम पाच्याले जानकारी दिए । बिहिबार ल्याबको उद्घाटन गरिएपनि नियमित संचालनमा आउन भने अझै एक हप्ता लाग्नेछ । अहिले तत्कालै भैरहवाबाट कोरोना पोजेटिभ र नेगेटिभ स्वाब स्याम्पलको रुपमा ल्याई परीक्षण गर्ने र त्यसैको नजिताको आधारमा यस प्रयोगशाला संचालन गर्ने डाक्टर पाच्याले बताए ।
४ देखि १७ दिनको प्रतिक्षा अन्त्य भयो
गुल्मीमै पीसीआर परीक्षण सुरु भएपछि ४ देखि १७ दिनसम्म पीसीआर रिपोर्टको प्रतिक्षामा बस्नुपर्ने बाध्यताको अन्त्य हुनेछ । यसभन्दा अगाडी संकलन गरिएका स्वाब काठमाडौ, हेटौडा र भैरवहवा पु¥याउने गरिएको थियो । त्यसो गर्दा रिपोर्टकै प्रतिक्षामा लामो समय कट्ने भएकोले अब त्यो समस्या समाधान भएको रेसुङ्गा नगरपालिकाका स्वास्थ्य संयोजक बोम अर्यालले बताए । ‘१७ दिनसम्म पिसिआर् रिपोर्टको प्रतिक्षा गर्दा अति नै समस्या परेको थियो ।’ उनले भने, ‘अब स्वाबको सङ्ख्या हेरीकन बढीमा दुई दिनमा नजिता आउनेछ ।’ ल्याबमा अहिले ५ नम्बर प्रदेशको प्रदेशिक जनस्वास्थ्य प्रयोगशालाबाट एकजना र तम्घास अस्पतालका एकजन गरी दुईजना कर्मचारी कार्यरत छन् । तर दुईजनाले मात्रै नपुग्ने भएकोले जनशक्ति थप गर्नको लागि सुचना प्रकाशित गरिएको छ । यहि असौज ६ गतेसम्म पाचँ जना जनशक्ति थपिन गई कुल सात जना पुग्ने र यसकाले काममा सहजता आउने अर्यालले बताए ।
ल्याब पुन : प्रयोगमा आउछ
परराष्ट्रमन्त्री प्रदिप ज्ञवालीले पीसीआर ल्याब दीर्घकालसम्म प्रयोग गर्न सकिने भएकोले ल्याइएका उपकरण जिल्लाको सम्पत्ति भएको बताए ।
करिब एक करोडको लागतमा जडान गरिएको मेसिन अन्य रोगको जाँच गर्ने काममा पनि प्रयोगमा आउने भएकोले सामग्रीको संरक्षण र उपयोगामा ध्यान दिन सबैलाई आग्रह गरे । त्यसका साथै उनले हिड्दा वा अन्य दैनिक काम गर्दा अनिवार्य रुपमा माक्स लगाउने, निश्चित दुरी कायम गर्ने जस्ता स्वास्थ्य तथा जनसङ्ख्या मन्त्रालयले जारी गरेका स्वास्थ्य नियमहरु पालना गर्न आग्रह गरे ।
अन्य देशको तुलनामा नेपालमा सकं्रमित र मृत्युदर कम भएकोले धेरै नआत्तिन उनले सबैलाई आग्रह गरे । तर जो–सुकै नागरिकको मृत्यु राज्यको लागि दुःखद् विषय हुने भएकोले सजक रहन उनले आग्रह गरे । सरकारले समयमै जारी गरेको लकडाउन, बढाएको परीक्षण दायरा जस्ता बिषयले संक्रमण धेरै फैलन नपाएको उनले बताए । ‘पैसा र बन्दुकले कोरोनालाई जित्ने भए विकाशशिल देशमा भयाभहको स्थिति हुने थिएन ।’ उनले भने, ‘त्यसैले कोरोनालाई हेलचक्रयाई नसम्झौं, सुरक्षित रहौं ।’
एमसिसी पास हुन्छ
फरक प्रसङ्गमा मन्त्री ज्ञवालीले अमेरिकी मिलेनियम कर्पोरेशन (एम्सिसी) पारित हुने बताए । बिहीबार नै पत्रकार महासंघ गुल्मीले आयोजना गरेको पत्रकार भेटभाट कार्यक्रममा बोल्दै उनले यस्तो बताएका हुन् ।
‘हामी तिब्रगतिमा विकासको बाटोमा छौ, हामीलाई वैदेशिक सहयोगको पनि खाँचो छ ।’ मन्त्री ज्ञवालीले भने, ‘केही संशोधन गरेर एम्सिसी पारित गर्नुपर्छ ।’ एम्सिसीको बारेमा बाहिर अनावश्यक हल्ला चलाइएको भन्दै त्यो निराधार हुने उनको भनाई छ । त्यसका साथै आफुहरु लिपुलेक, कालापानी लिम्पियाधुरा सहितको नेपाली जग्गा प्राप्तको लागि लागिपरेको पनि बताए । लालपुर्जा हातमा आइपुगेको भन्दै उनले केही समयमै जग्गा फिर्ता हुने विश्वास व्यक्त गरे । त्यस्तै नेपाल कम्युनिष्ट पार्टी (नेकपा) का कोही पनि कार्यक्रतालाई सामाजिक संजालमा अनावश्यक विरोध नगर्न पनि निर्देशन दिए ।
फरक प्रसंगमा उनले दुई संकटलाई सामना गरेर जिन्दगीको गाडीलाई गुडाउनुपर्ने समय आएको बताए । व्यवसाय चलाउने, बजार खोल्ने नाममा स्वास्थ्य जेसुकै होस् भन्ने र स्वास्थ्य संकट बढ्यो भन्दैमा अर्थतन्त्र जे सुकै होस् भन्ने कुरालाई सम्हालेर अगाडी बढ्नुपर्ने अवस्था आएको उनको भनाई छ ।
