सुशीला रेग्मी
मंसिर २०,२०८० पाल्पाःभूपु सैनिक राईजिङ्ग ईङ्गलिस सेकेण्डरी स्कुल रामपुर पाल्पाले विद्यालय स्थापनाको २५ औँ वर्ष पुरा गरेको अवसरमा रजत महोत्सव मनाएको छ ।
पूर्वी पाल्पाको रामपुर नगरपालिका वडा नं ५ मटेरीमा संचालित यस विद्यालयले रजत महोत्सव विभिन्न कार्यक्रमका साथ सम्पन्न गरेको छ । विद्यालय व्यवस्थापन समितिका अध्यक्ष सुवेदार राजकुमार श्रेष्ठको अध्यक्षतामा भएको रजत महोत्सव समारोहको उद्घाटन भारतीय राजदुतावास भूतपूर्व सैनिक कल्याणकारी शाखाका सहायक सैनिक सहचरी मेजर नविन जानुले गर्नुभएको हो । रजत जयन्तीको अवसरमा निर्माण गरिएको रजत स्तम्भ अनावरण, भूपु सैनिक रजत स्मारिका विमोचन गर्नुहुदै उहाँले नेपालको विकासमा भारतले सहयोग गरिरहेको र आगामी दिनमा पनि साथ र सहयोग रहने बताउनुभयो । उहाँले सुरुवाती समयमा चुनौतीका विच पनि सञ्चालन भएको विद्यालयले २५ वर्षको समयमा महत्वपूर्ण उपलब्धी हात पारेको बताउनुभयो ।
कार्यक्रममा लुम्बिनी प्रदेश सभा सदस्य राजुप्रसाद श्रेष्ठले रामपुर क्षेत्रको शिक्षाको विकासमा निजी क्षेत्रबाट सञ्चालित शिक्षण संस्थाले महत्वपूर्ण योगदान दिएको बताउनुभयो । उहाँले भूतपूर्व सैनिकहरुले अवकास पश्चात आफ्नो कर्मभूमिमा शिक्षाको विकासको लागि दिएको योगदानको प्रशंसा गर्नुभयो । लुम्बिनी प्रदेश सभा सदस्य खेमबहादुर सारुले शिक्षालाई श्रम र संस्कारसंग जोड्न नसकिएको हो कि भन्ने अनुभुती पछिल्लो समय खड्किएको बताउनुभयो । दक्ष जनशक्ति रोजगारी सृजना हुन नसक्दा पलायन हुने क्रम बढ्दै गएको बताउँदै संस्कार र सीप सहितको शिक्षा अबको आवश्यकता भएकाले यसप्रती गम्भीर रुपमा चिन्तन गर्ने समय आएको उहाँले बताउनुभयो ।
रामपुर नगरपालिकाका प्रवक्ता एवं विद्यालयका पूर्व प्रिन्सिपल कपिलबहादुर खाँणले समय अनुसारको शिक्षा दिनुपर्ने समय आएको बताउनुभयो । कार्यक्रममा रामपुर नगरपालिका ५ का वडाध्यक्ष दुर्गाप्रसाद पोखरेल, रामतुलसी माविका प्रधानाध्यापक बालकृष्ण लम्साल, प्याव्सन लुम्बिनी प्रदेश उपाध्यक्ष गोविन्दप्रसाद पौडेल, प्याव्सन पाल्पाका अध्यक्ष महेशमान बज्राचार्य, विद्यालयका पूर्व प्रिन्सिपल ध्रुव पोखरेल, प्याव्सन केन्द्रिय कार्यसमितिका निवर्तमान सह–कोषाध्यक्ष मीनप्रसाद बञ्जाडे र अभिभावक पुरुषोत्तम केसीले बोल्नुहुदै कार्यक्रम सफलताको शुभकामना दिनुभएको छ ।
कार्यक्रममा विद्यालयका संस्थापक एवं प्रबन्ध निर्देशक अनेरी क्याप्टेन रोमनबहादुर रानाले भूतपूर्व सैनिकहरुको पहलमा शिक्षाको ज्योती छर्नको लागि विद्यालय स्थापना गरिएको बताउनुभयो । विद्यालयका प्रिन्सिपल गोपि सिग्देलले विद्यालयको वार्षिक प्रतिवेदन प्रस्तुुत गर्नुहुदै शैक्षिक गुणस्तर, खेलमैदान, अतिरिक्त क्रियाकलाप, खानेपानी, शौचालय तथा भौतिक पूर्वाधारमा जोड दिइएको बताउनुभएको छ ।
विद्यालयका संस्थापक, पूर्व प्रिन्सिपल, शिक्षक तथा एसईईमा उत्कृष्ट अंक ल्याउने विद्यार्थीहरुलाई सम्मान गरिएको छ । कार्यक्रमको अवसरमा विद्यार्थीहरुले निर्माण गरेको सामाग्री तथा साँस्कृतिक कार्यक्रमले दर्शक तथा पाहुनालाई आकर्षित गरिरहेको थियो । विद्यालयका सहायक प्रिन्सिपल कमल शर्माको स्वागतबाट सुरु भएको कार्यक्रमको सञ्चालन शिक्षक हरिप्रसाद भट्टराई र राधिका क्षेत्रीले गर्नु भएको हो । रजत महोत्सव समारोह सुरु हुनुअघि रामपुर बेझाड बजारमा ¥याली निकालिएको थियो ।
