तिलाचन पाण्डे
असार १५,२०८० गुल्मीः २०७७ साल मङसिर १५ गते तामझामका साथ हतार हतारमा शिलन्यास गरीएका १५ वेडका अस्पतालको अवस्था दयनीय छन् ।
तत्कालिन प्रधानमन्त्री केपी शर्मा ओली नेतृत्वको सरकारले देशभरका तीन सय ९६ स्थानीय तहहरुमा एकै दिन अस्पतालहरुको शिलान्यास गर्ने निर्णय अनुसार गुल्मीमा शिलन्यास भएका अस्पतालको अवस्था दयनीय अवस्थामा छन् ।
अस्पतालको शिलन्यास गर्न केन्द्रिय मन्त्री, पुर्व मन्त्री, प्रदेश स्तरका मन्त्री र प्रदेश सभा सदस्यहरुले गाउँ–गाउँमा पुगेर एकै दिन दुई तीन वटा अस्पतालको शिलन्यास गर्न आतुर थिए । शिलन्यास भएको झण्डै तीन वर्ष पुग्न लाग्दा पनि थुप्रै स्थानीय तहका अस्पताल निर्माणको कामले गति लिन सकेको छैन् ।
शिलन्यासमै सीमित छत्रकोट
छत्रकोट गाउँपालिकाको १५ वेडको अस्पताल लुम्बिनी प्रदेश सभा सदस्य कमलराज श्रेष्ठले अस्पतालको शिलन्यास गरे । वडा नं ४ श्रृङ्गामा अस्पतालको शिलन्यास गरेको झण्डै तीन वर्ष पुग्न लाग्दा समेत अस्पताल बन्नेको नाम निसाना नै छैन् ।
शिलन्यास गरिएको जग्गा भवन मापदण्ड अनुसार नभएकाले शिलन्यास गरिएको जग्गाको करिव तीन सय मिटर पर लामो कसरत पश्चात जग्गाको ब्यबस्थापन गर्ने कार्य अन्तिम चरणमा रहेको गाउँपालिकाका अध्यक्ष रामप्रसाद पाण्डेले जानकारी दिए ।
असार महिनाभरमा जग्गा प्राप्त हुने आफूले विश्वास लिएको पाण्डेको भनाई छ ।
मालिकामा जग्गा बिवाद
मालिका गाउँपालिका वडा नं ४ अर्खबाङ्गमा पूर्व मन्त्री गोकर्णराज बिष्टले तामझामका साथ अस्पतालको शिलन्यास गरे । उक्त शिलन्यास गरिएको अस्पताल शिलन्यासमै मात्र सीमित भएको छ ।
शिलन्यास गरिएको जग्गामा मापदण्ड नपुेको र अस्पताल निर्माण कार्य हुन नसक्ने भएकाले नजिकै जग्गाको ब्यवस्थापन गरी टेण्डरको प्रक्रियामा रहेको स्वास्थ्य शाखा प्रमुख बसन्त भुसालले जानकारी दिए ।
धुर्कोटको घडेरीमा पहिरो
धुर्कोट गाउँपालिको धुर्कोट रजस्थलमा अस्पताल निर्माणका लागि खनिएको वेस (घडेरी मा)पहिरो आएका कारण निर्माणको कार्य अगाडि बढ्न नसकेको गाउँपालिकाका अध्यक्ष भुपाल पोखरेलले जानकारी दिए ।
लामो समयको कसरत पश्चात मन्त्रालयबाट डिपिआर र नक्सा परिवतर्न गरी आएकाले अस्पतालको निर्माण कार्य सुरु गरिएको उनको भनाई छ । पूर्वमन्त्री समेत रहनुभएका गोकर्णराज बिष्टले शिलन्साय गरेको अस्पताल निर्माणको जिम्मा रविना–अर्जुन–न्यु लिजा जेभीले १३ करोड बढीको लागतमा पाएको छ ।
इश्मामा बल्ल पिल्लर
इस्मा गाउँपालिका ४ दोहली स्थित गुरुङगाडेमा १५ वेडको अस्पताल निर्माणको कार्य बल्ल बेसमेन्टको कार्य भइरहेको इन्जिनियर सुनिल भण्डारीले जानकारी दिए ।
सुरुमा डिपिआर लगायतका केही समस्या भएको भन्दै त्यसको समस्या पश्चात निर्माणको कार्यमा पनि ढिलाई भएको उनको भनाई छ । १० करोड ८५ लाखमा सुनिल समिर निर्माण सेवाले निर्माणको जिम्मा पाएको हो ।
रुरुक्षेत्रमा घडेरी सम्याउँदै
त्यस्तै रुरुक्षेत्र गाउँपालिकाको वडा नं १ को रातामाटामा घडेरी सम्याउने कार्य बल्ल सम्पन्न भएको छ । लुम्बिनी प्रदेशका तत्कालिन सामाजिक बिकासमन्त्री सुदर्शन बरालले शिलन्यास गरेको अस्पतालको अवस्था दयनीय छ । अस्पतालको भौतिक प्रगति हेर्दा मुस्किलले १० प्रतिशत पुग्ने गाउँपालिकाका प्राविधिक रोमकान्त पाण्डेले जानकारी दिए । कटिङ गरेको माटो राख्ने ठाउँका अभावका कारण पहिले समस्या भएको र त्यसको समस्या समाधान भएको गाउँपालिकाले जनाएको छ ।
प्रकृति–पिटिआर–अधिकारी–राजेश्वरी जेभी सन्धिखर्कले १४ करोड ४२ लाख ८२ हजार ६ ५९ रुपियाँको लागतमा अस्पताल निर्माणको जिम्मा पाएको छ ।
कालीगण्डकीमा ३० प्रतिशत भैतिक प्रगति
तत्कालिन परराष्ट्रमन्त्री प्रदीपकुमार ज्ञवालीले बाजागाजा र तामझामका साथ शिलन्यास गरेको अस्पतालमा अहिले तेस्रो तला ढलानको कार्य भइरहेको छ । गाउँपालिकाको वडा नम्वर तीन कनौटामा करिव साढे १२ करोडको लागतका खिम्ती–श्रेष्ठ–अन्जना जेभिले अस्पताल निमार्णको कार्य गरेको छ । सो अस्पतालको करिब ३० प्रतिशत भौतिक प्रगति भएको इन्जिनियर सत्यनारायण राईले जानकारी दिए । सो अस्पतालको शिलन्यास गरे लगत्तै मन्त्री ज्ञवाली प्रभुको हेली मार्फत पोखरा हुँदै मन्त्री परिषदको बैठकमा सामेल हुन हतारमा काठमाडौँे फर्किएका थिए ।
सत्यवति गाउँपालिकामा १५ वेडको अस्पताल वडा नं ६ जुहांङ्गमा निर्माण दोस्रो तलाको ढलानको तयारी भइरहेकोे पालिकाका इन्जिनियर रमेश शाहीले जानकारी दिए ।
अस्पताल निर्माणको कार्य हाल त्रिव गतिमा अगाडि बढेको भन्दै हाल सम्म करिव ४५ प्रतिशत भौतिक प्रगतिको काम सम्पन्न भएको उनको दाबी छ । १५ करोडको लागतमा आशिष एगेश्वर जेभी काठमाण्डौले निर्माण सेवाले निर्माण कार्यको जिम्मा पाएको छ ।
मदाने गाउँपालिकामा वडा नं ६ पुर्कोटदहमा अस्पताल निर्माणको काम भवनको एक ब्लकको तेस्रो तला ढलानको कार्य सकिएको र अन्य कार्यभइरहेको सब इन्जिनियर तीर्थराज पन्थीले जानकारी दिए । भवनको करिब ५० प्रतिशत भौतिक र आर्थिक प्रगति भएको उहाँको दाबी छ । हिमदुम–एसी निर्माण कम्पनी बाग्लुङले १२ करोड ४८ लाखमा अस्पताल निर्माणको जिम्मा पाएको छ ।
तीन स्थानीय तहमा निर्माणको आशा
जिल्लाका तीन पालिकामा भने अस्पताल निर्माणका कार्यले गति लिएको पाइएको छ । गुल्मीदरबार गाउँपालिका, चन्द्रकोट गाउँपालिका र मुसिकोट नगरपालिकाको अस्पताल निर्माणमा सक्रियता देखिएको छ ।
गुल्मी दरवार गाउँपालिकाको वडा नं ३ को झाँक्री डाँडामा १५ वेडको अस्पताल निर्माण कार्य करिब ९५ प्रतिशत भौतिक र ७५ प्रतिशत आर्थिक प्रगति भएको प्रमुख प्रशासकीय अधिकृत राजिव पन्थीले जानकारी दिए ।
बिकोइ–अर्जुन–न्यू लिजा जेभीले १२ करोड ९४ लाखमा अस्पताल निर्माणको जिम्मा पाएको हो ।
मुसिकोट नगरपालिका वडा नं ७ मा १५ वेडको अस्पतालको निर्माण कार्य ७५ प्रतिशत भौतिक प्रगति भएको स्वास्थ्य शाखा प्रमुख डिबी जिशीले जानकारी दिए ।
खिम्ती–श्रेष्ठ–कालीगण्डकी जेभीले ११ करोड १० लाख २६ हजार १०८ रुपियाँ लागतमा अस्पताल निर्माणको जिम्मा पाएको छ ।
चन्द्रकोट गाउँपालिका वडा नम्वर ४ शान्तिपुरमा अस्पताल निर्माणको भौतिक प्रगति ७० प्रतिशत भन्दा माथि पुगेको गाउँपालिकाका सूचना अधिकारी शिवप्रसाद ज्ञवालीले जानकारी दिए । कुल १३ करोड ६६ लाख ४४ हजार सात सय ३६ रुपियाँमा तुल्सीभक्त–अर्जुन बिल्डर्स जेभीले अस्पताल निर्माणको जिम्मा पाएको हो ।
