सुशीला रेग्मी
चैत २२,२०७९ पाल्पाः पाल्पाको रामपुर नगरपालिकाका वीउविजन सम्बन्धी तालिम सुरु भएको छ ।
वीउविजन क्षेत्रका बहुसरोकारवालाहरु संगको समन्वय सहकार्य र साझेदारीमा आधारित व्यवसाय उन्मुलन वीउवीजन सम्बन्धी चारदिने तालिम रामपुर नगरपालिका वडा नं ६ को आयोजनामा तालिम सुरु भएको हो ।
दरैठाँटी मावि विजयपुरको सभाहलमा वडाध्यक्ष दिवाकर देवकोटाको अध्यक्षतामा उद्घाटन कार्यक्रम गरिएको छ । कार्यक्रमको उद्देश्यमाथि जानकारी दिदै रामपुर नगरपालिका कृषि शाखा प्रमुख रामहरी पाण्डेयले स्वागत गर्नुभएको कार्यक्रमको संचालन सामुदायिक रेडियो रामपुरका प्रतिनिधि दिपेन्द्र भट्टराईले गर्नुभएको हो ।
अन्तर्राष्ट्रिय विपि चिन्तन प्रतिष्ठानका अध्यक्ष तथा युवा समाजसेवी सन्दिप रानाले हाम्रो जीवनसंग जोडिएको कृषिको महत्वलाई उजागर गरी यसबाट सबै नागरिक आत्मनिर्भर बन्नुपर्नेमा जोड दिनुभएको छ । उहाँले कृषिप्रधान देश नेपालमा आफ्नै देशको उत्पादनले नेपाली बाँच्ने अवस्था नरहेको हुदा समयानुकूल कृषिजन्य प्रविधिको प्रयोग गरेर बाँझिएका जमिन हराभरा बनाएर आफ्नै देशमा उत्पादन भएको वस्तु उपभोग गरी जीवनयापन गर्नुपर्ने बताउनुभएको छ ।
नेपालमा निर्यातभन्दा तीन गुणा बढी आयात गर्नु परिरहेको अवस्था रहेको बताउनुहुदै अब आयातलाई घटाउने गरी उत्पादन बढाउनुपर्ने बताउनुहुदै गाउघरमा रैथाने बालि लोप हुदै गएको अवस्थामा अब यसलाई पुनःनिरन्तरता दिनुपर्ने युवा समाजसेवी रानाले बताउनुभएको छ । कार्यक्रममा वीउविजन प्रयोगशाला भैरहवाका प्रमुख शालिकराम गौतमले तालिममा सिकेका सिपलाई व्यावहारमा प्रयोग गर्न सकियो भने कृषकले आर्थिक लाभ लिन सक्ने बताउनुभएको छ ।
ब्रह्मकुमारी ईश्वरीय विद्यालय रामपुरका सरस्वतीले प्रवचनमार्फत स्वस्थ भोजनले मानिस स्वस्थ र फुर्तिलो हुने बताउनुभएको छ । वीउविजन सम्बन्धी तालिम दरैठाँटी मावि हल र मौरीपालन सम्बन्धी तालिम विजयपुर कृषि सहकारीको हलमा हुनेछन् ।
कृषि ज्ञानकेन्द्र पाल्पाको आयोजनामा मौरीपालन सम्बन्धी तालिम दुईदिन चल्नेछ । मौरीपालन सम्बन्धी तालिमको सहजिकरण कृषि ज्ञान केन्द्र पाल्पाका प्रमुख कामना अधिकारी, बालीसंरक्षण अधिकृत मिलन गैरे, रामपुर नगरपालिका कृषि शाखा प्रमुख रामहरी पाण्डेय, रामपुर मौरीस्रोत केन्द्रका हुमनाथ न्यौपानेले गरिरहनुभएको छ ।
वीउविजनसम्बन्धी राष्ट्रिय गहुँबाली विकास कार्यक्रमका बरिष्ठ वैज्ञानिक दिपक पाण्डेय, वीउविजन प्रयोगशाला भैरहवाका प्रमुख शालिग्राम गौतम, कृषि ज्ञान केन्द्र पाल्पाका प्रमुख कामना अधिकारी, बालीसंरक्षण अधिकृत मिलन गैरे, रामपुर नगरपालिका कृषि शाखा प्रमुख रामहरी पाण्डेयले गरिरहनुभएको छ ।
