माघ ७,२०७९ गुल्मीः नेकपा माओवादी केन्द्र, जिल्ला समन्वय समिति गुल्मीको बैठक सम्पन्न भएको छ ।
सदरमुकाम तम्घासस्थित पार्टी कार्यालयमा सम्पन्न बैठकमा चुनावी समिक्षाका साथै आगामी कार्यायोजनाका बिषयमा छलफल भएको थियो । कार्यक्रममा गीता थापा, भुपाल पोखरेल, तेजेन्द्र सलामी र युवराज खरेलले आ–आफ्नो निर्वाचन क्षेत्रको चुनावी समिक्षासहित रिपोर्टिङ गरेका थिए ।
बैठकमा बोल्दै प्रमुख अतिथि पार्टी केन्द्रीय सचिव चक्रपाणी खनाल ‘बलदेव’ ले जनता र पार्टी कार्यक्रताको भावनाअनुरुप एमालेसँग मिलेर सरकार निर्माण गरेको बताए । विशेष अतिथि माओवादी केन्द्रका लुम्बिनी प्रदेश अध्यक्ष सुदर्शन बरालले निर्वाचनमा हार÷जित स्वभाविक भएको भन्दै अब नागरिकका काममा समय खर्चनुपर्ने बताए ।
पार्टीको जिल्ला समन्वय समितिको वेभसाइट निर्माण गर्ने, पार्टीका अधिकाशं कामलाई डिजिटल प्रविधिमा लैजाने लगायतका निर्णय गरिएको सचिव अशोक थापाले जानकारी दिए । त्यस्तै आगामी चैत –५ गते हुने स्वतन्त्र विद्यार्र्र्थी युनियनको निर्वाचनमा अनेरास्ववियु क्रान्तिकारीले अधिकतम क्याम्पसमा जित हाँसिल गर्नेगरी तयारी गर्ने पनि निर्णय गरिएको छ ।
बैठकमा पार्टीका विभिन्न पदमा कार्यरत नेता, विभिन्न जनवर्गीय संगठनका प्रमुख एवम् प्रतिनिधि लगायतको उपस्थिति रहेको थियो । बैठक माओवादी केन्द्र गुल्मीका इन्चार्ज विरबहादुर कार्कीको अध्यक्षता एवम् सचिव अशोक थापाको संचालनमा सम्पन्न भएको थियो ।
कार्यक्रममा माघ १ गते पोखरामा यति एयरको बिमान दर्घटनामा मृत्यु भएका प्रेस सेन्टर नेपालका केन्द्रिय उपाध्यक्ष एंव नेपाल पत्रकार महासंघका केन्द्रिय सदस्य त्रिभुवन पौडेलको सम्झनामा तस्विरमा फूलमाला लगाई पौडेलको योगदान पार्टी र संगठनमा खेलेको भूमिका महत्वपूर्ण रहेको वक्ताहरुले बताएका छन्
