हुमाकान्त पाेखरेल
मंसिर ०३,२०७८ गुल्मी :मुसिकोट नगरपालिका –६ कुर्घामा खुल्ला पुरुष भलिबल प्रतियोगिता सम्पन्न भएको छ ।
मालिका पूर्णिमा मेला मुल आयाेजक समितिकाे आयाेजनामा सम्पन्न प्रतियोगितामा १६ समुहकाे सहभागीता रहेकाे थियाे । जसमा बाग्लुङकाे गलकाेट नगरपालिका प्रथम एवम् मुसिकाेट -५ काे तिरेमिरे रेष्टुरेन्ट द्वितीय भएका छन् । प्रतियाेगितामा प्रथम हुनेलाई नगद ५६ हजार एवम् द्वितीय हुनेलाई नगद ३६ हजारसहित मेडल र प्रमाण पत्र प्रदान गरिएको गाेपाल रायमाझीले जानकारी दिए ।
कार्यक्रममा विभिन्न कलाकारहरूले साँस्कृतिक प्रस्तुति पनि देखाएका थिए । सन्तु थापा, मिना बुढाथाेकी, प्रकाश पराजुली लगायतका कलाकारहरूले प्रस्तुति देखाएका थिए । कार्यक्रममा बोल्दै प्रमुख अतिथि मुसिकोट नगरपालिकाका मेयर सोमनाथ सापकोटाले नगरले खेल क्षेत्रलाई सधै प्राथमिकतामा राखेको बताए । कुर्घा मालिका मन्दिर, स्वारा होमस्टे लगायतका मुसिकोटका मुख्य पर्यटकीय स्थलहरुको प्रवद्र्धन एवम् प्रचार–प्रसारको नगरपालिका लागिपरेको बताए ।
नगरपालिकाकी उपप्रमुख कमला शर्माले खेल क्षेत्रको विकास र प्रवद्र्धनका लागि नगरले विगतको समयमा पनि थुप्रै खेलकुद प्रतियोगिता सम्पन्न गरेको स्मरण गरिन् । उनले प्रतियोगितालाई सम्पन्न गराउन लागिपर्ने सबैलाई धन्यवाद् दिइन् ।
कार्यक्रमकाे व्यवस्थापनका लागि कुर्घा सेवा समाज, जापानले एक लाख सहयाेग गरेको छ । कार्यक्रममा विभिन्न संघ संस्थाका प्रमुख एवम् प्रतिनिधि, जनप्रतिनिधि, कर्मचारी, पत्रकार लगायत स्थानीयकाे उपस्थिति रहेको थियाे ।
