भदौ२६,२०७८दाङ :दाङमा जिपले मोटरसाइकललाई ठक्कर दिँदा मोटरसाइकल चालकको मृत्यु भएको छ। मृत्यु हुनेमा शान्तिनगर गाउँपालिका २ बाघमारेका ४८ वर्षीय रुद्रबहादुर खड्का रहेको इलाका प्रहरी कार्यालय खिलतपुरले जनाएको छ।
शनिबार बिहान करिब ९ बजेतिर शान्तिनगर ७ खैरेनीमा हापुरेदेखि तुलसीपुरतर्फ आउँदै गरेको रा१ज ८०१ नम्बरको जिपले रा५ख ३१३४ नम्बरको मोटरसाइकललाई ठक्कर दिँदा मोटरसाइकल चालक खड्का र मोटरसाइकलमा सवार बाघमारेका ६७ वर्षीय नरबहादुर वली घाइते गम्भीर भएका थिए। उनीहरूलाई राप्ती प्रादेशिक अस्पताल तुलसीपुरमा सामान्य उपचारपछि थप उपचारको लागि बाँके रिफर गरिएको थियो। खड्काको उपचारको क्रममा बाँकेको कोहलपुरमा मृत्यु भएको प्रहरीले जनाएको छ।
जिप र चालकलाई नियन्त्रणमा लिइएको इलाका प्रहरी कार्यालय खिलतपुरका प्रहरी निरीक्षक नवीन चुदालीले जानकारी दिए।
त्यस्तै, तुलसीपुरको अश्वारामा ट्याक्टर पल्टँदा चालकको मृत्यु भएको छ। मृत्यु हुनेमा तुलसीपुर उपमहानगरपालिका ८ अश्वारा निवासी २१ वर्षका कृष्णबहादुर पुन रहेको इलाका प्रहरी कार्यालय तुलसीपुरले जनाएको छ। सोही ठाउँका शेरबहादुर खड्का सामान्य घाइते भएका छन्।
बालापुरबाट अश्वारातर्फ आउँदै गरेको अनटेष्ट ट्याक्टर शुक्रबार राति १० बजे अश्वाराको पेट्रोल पम्प नजिकै अनियन्त्रित भएर पल्टिई दुर्घटना भएको हो। ट्याक्टरले च्यापिँदा घाइते भएका पुनको राति ११ बजे राप्ती प्रादेशिक अस्पताल तुलसीपुरमा मृत्यु भएको इलाका प्रहरी कार्यालय तुलसीपुरका प्रमुख डिएसपी श्यामु अर्यालले जानकारी दिए।
