हुमाकान्त पोखरेल
असार१०,२०७८ गुल्मीः गुल्मीको मदाने गाउँपालिकाले उत्कृष्ट पाँच कर्मचारीलाई सम्मान गरेको छ ।
गाउँपालिकाको नवौँ गाउँसभाको अवसरमा सूचना अधिकारी ऋषिराम पोखरेलसहित पाँच कर्मचारी सम्मानित भएका हुन् । पोखरेललाई सर्वोत्कृष्ट कर्मचारीको रुपमा सम्मानित गरिएको छ ।
त्यस्तै उत्कृष्ट कर्मचारीको रुपमा धनबहादुर थापा मगर, ल्याब असिस्टेन्ट शिवहरी पन्थी, पशु प्राविधिक अर्जुन भण्डारी, कार्यालय सहयोगी बिमला राउत र विष्णु विकलाई सम्मानित गरिएको हो । पुरस्कृत हुने सबैलाई नगदसहित दोसल्ला, करुवा र सम्मान पत्र प्रदान गरिएको गाउँपालिकाका प्रमुख प्रशासकीय अधिकृत रुद्र पछाईले जानकारी दिए ।
चालु आर्थिक बर्षमा मदाने गाउँपालिका स्थानीय तह स्व–मुल्याकंनमा गुल्मीमा प्रथम भएको थियो । गाउँपालिकालाई प्रथम स्थानसम्म ल्याउनको लागि महत्वपूर्ण भुमिका खेलेको भन्दै कर्मचारीहरुलाई सम्मानित गरिएको हो ।
गाउँपालिकाको प्रशासनतर्फ उत्कृष्ट काम गरेकोले पोखरेललाई, स्वास्थ्यतर्फ उत्कृष्ट काम गरेकोले पन्थी, पशुतर्फ उत्कृष्ठ काम गरेकोले भण्डारीलाई सम्मानित गरिएको प्रमुख प्रशासकीय अधिकृत पछाइले जानकारी दिए ।
गाउँपालिका अध्यक्ष दान बहादुर खत्रीले उत्कृष्ट काम गर्ने कर्मचारीलाई सम्मान गर्ने पालिकाको नीति तथा कार्यक्रमअनुसार कर्मचारीलाई सम्मान गरिएको बताए ।
