तुलसीपुर, ३० असोज । दाङबाट नेत्रविक्रम चन्द ‘विप्लव’ समूहका २१ नेता तथा कार्यकर्ता पक्राउ परेका छन् । नेपाल–भारत सीमानाकाअन्तर्गत दाङको राजपुर गाउँपालिका–४ मुग्रेटाखोलास्थित जङ्गलबाट उनीहरूलाई पक्राउ गरिएको जिल्ला प्रहरी कार्यालय दाङले जनाएको छ । त्यहाँ विप्लव समूहको बैठक भइरहेको प्राप्त गोप्य सूचनाका आधारमा पुगेको प्रहरीको टोलीले गएराति १ः०० बजे उनीहरूलाई पक्राउ गरेको हो ।
पक्राउ पर्नेमा विप्लव समूहका मध्यपश्चिम कमाण्ड इन्चार्ज वीरजङ्ग चन्द, केन्द्रीय सदस्य तथा राप्ती ब्यूरो इन्चार्ज सुवास बाठा, युवा सङ्गठनका केन्द्रीय अध्यक्ष पाटनलगायतका नेता तथा कार्यकर्तालाई पक्राउ गरिएको हो । चन्द ‘विप्लव’ का दाजु हुन् । पक्राउ पर्नेमा केन्द्रीय सदस्य तथा लुम्बिनी ब्यरो ईन्चार्ज एवम् मध्य पश्चिम कमाण्ड ईन्चार्ज चन्द्रबहादुर चन्द (वीरजङ्ग) सहित राप्ती ब्युरो ईन्चार्ज केशवबहादुर बाँठा मगर (सुवास), राप्ती ब्युरो एवम् न्याय विभाग समिति जिल्ला संयोजक रामबहादुर थापा (सुन्दर), राप्ती ब्युरो कार्यालय सचिव सविन पोख्रेल, जिल्ला ईन्चार्ज यमलाल कटुवाल(विक्रम), जिल्ला सेक्रेटरी प्रदीप वली, युवा संगठन नेपाल केन्दीय अध्यक्ष बविन केसी (पाटन, जंगली), वुद्धिजिवी सुनिल पौडेल, एरिया नम्बर ४ ईन्चार्ज एवम् जिल्ला जनपरिषद् सदस्य एकराज चौधरी, एरिया नम्बर १ ईन्चार्ज एवम् राजपुर गा पा सेक्रेटरी धनबहादुर बोहोरा (महान), पूर्व जनमुक्ति सेना तिलक पुन, दलित राष्ट्रिय मुक्ति मोर्चा जिल्ला अध्यक्ष सुरज विक, पार्टी सदस्य हितप्रसाद रोका, रोल्पा जिल्ला सदस्य पोष्टमान घर्ती, दलबहादुर खत्री, अमित घर्ती मगर, बालकृष्ण शर्मा, जीत क्षेत्री, रमेश आचार्य, बिष्णु थापा र कुलबहादुर ओली रहेका छन् ।
