मंसिर २७,२०८० गुल्मीः गुल्मीमा आगलागीका कारण जस्ताले छाएको गोठ जलेर पूर्ण रुपमा नष्ट भएको छ ।

गएराती  गुल्मीदरबार गाउँपालिका वडा नम्वर ६ भलायचौरका नारयण खड्काको काठले बनेको र जस्तापाताले छाएको गोठमा आगलागी भएको जिल्ला प्रहरी कार्यालय गुल्मीका प्रहरी नायव उपरीक्षक डिल्लीनारायण पाण्डेले जानकारी दिए ।

गोठमा आगलागी हुँदा एक लाख पचास हजार रुपियाँ बराबरकको क्षती भएको र आगलागी कारण खुल्न नसकेको पाण्डेले बताए । गोठमा घाँस र काठहरु रहेको थियो ।

आगोलाई स्थानीय र प्रहरीको साथमा नियन्त्रणमा लिइएको जिल्ला प्रहरी कार्यालय गुल्मीले जनाएको छ । घटनाको बारेमा थप अनुसन्धान जारी रहेको प्रहरीले जनाएको छ ।

मंसिर २५,२०८० गुल्मीः नेकपा माओवादी केन्द्र गुल्मीले संचालन गरेको अभियानले कार्यकर्ताहरुमा थप उर्जा पैदा भएको जनाएको छ ।

जनजनमा माआवादी घरघरमा माओवादी विशेष रुपान्तरण अभियानले जनतामा थप उर्जाका साथ जोश र जाँगर पैदा भएको जिल्ला सचिव अशोक थापाले जानकारी दिए । २०६४ सालपछि माओवादीमा जोडिएका असल कार्यकर्ताहरुका लागि पार्टीको नीति,सिद्धान्त र कार्यकर्तामा नयाँ रक्तसंचार पैदा गरेको छ भने पुराना पूर्णकालिन कार्यकर्ताका लागि थप आत्म विश्वासका साथै पुर्नताजगी पैदा भएको थापाले बताए ।

दर्शनशास्त्र, अर्थशास्त्र ,संघीयता,पार्टी र सत्ता, संगठन, पार्टीको वर्तमान नीति तथा कार्यक्रम ,नेपाल सहित विश्व कम्युनिष्ट आन्दोलनको इतिहास सहितका विषयमा क्रमश नेकपा माओवादीका केन्द्रिय सचिव हितमान शाक्य, स्थायी समिति सदस्य जोखबहादुर महरा,पार्टीका लुम्बिनी प्रदेश अध्यक्ष सुदर्शन बराल, पोलिटब्युरो सदस्य जगप्रसाद शर्मा,केन्द्रिय सदस्यहरु कमल चुँदाली, भविस्वर तिवारी,निमाकान्त डाँगीले स्कुलिङ दिएका थिए ।

यस्तै अभियानमा लुम्बिनी प्रदेश सह सचिव पार्वती बिक , जिल्ला संयोजक युवराज केशी, सचिव अशोक थापा,प्रदेश सदस्य ज्ञानकुमार बुढा, प्रदेश परिषद सदस्यहरु, रामचन्द्र कंडेल, पदम पाण्डेलगायतकाले स्कुलिङ दिएका थिए ।

धुर्कोट,मालिका,मदाने रेसुंगा ,मुसिकोट ,गुल्मीदरबार , छत्रकोट ,रुरुक्षेत्र, कालीगण्डकी, चन्द्रकोट र सत्यवतीमा अभियानात्मक रुपले संचालन गरी सम्पन्न भएको थापाले बताए ।

पार्टीले रचानात्मक कार्य गर्ने

मंसिर २५ देखी पुस २० गतेसम्म पार्टी सदस्यता नविकरण सम्पन्न गर्ने, निश्कृय वार्ड कमिटिहरुको भेला, पुर्नगठन , सेल कमिटिहरु गठन गर्नुका साथै पुस ५ देखी स्थानीय कमिटि सहित जनपरिचालन गरी रचानात्मक सामाजिक कार्यहरु जिल्लाका १२ वटै स्थानीय तहमा गर्ने गरी कार्यतालिका बनाएको पार्टीले जनाएको छ ।

तिलाचन पाण्डे
मंसिर २३,२०८० गुल्मीः निश्पक्ष रुपमा पत्रकारीता गर्न सरोकारवालाहरुले सुझाब दिएका छन् ।
सदरमुकाम तम्घासमा प्रेस काउन्सिल नेपालले आयोजना गरेको पत्रकार आचार संहिता, जागरण कार्यक्रममा सरोकारवालाहरुले पत्रकारहरुलाई निश्पक्ष रुपमा पत्रकारिता गर्न आग्रह गरेका हुन् ।

नागरिक समाज गुल्मीका अध्यक्ष पदमप्रसाद पाण्डेले पछिल्लो समयमा स्वतन्त्रताका नाममा छाडातन्त्र बढी भएको भन्दै नियमन गर्नुपर्नेमा जोड दिनुभयो । पत्रकारहरु पनि राजनीतिक दलको झण्डा बोकेर हिड्ने र राजनीतिक प्रभाव बढी भएकाले निश्पक्ष रुपमा पत्रकारिता हुन नसकेको गुनासो गर्नुभयो । उहाँले पत्रकारिता क्षेत्रलाई थप ब्यबस्थित गर्नका लागि आचार संहिताको पूर्ण पालना गर्न र सन्तुलित रुपमा समाचार सम्प्रेषण गर्न आग्रह गर्नुभयो ।

गुल्मी जिल्लाका सहायक प्रमुख जिल्ला अधिकारी हरिप्रसाद गैरेले पत्रकारिता क्षेत्रमा केही विकृतिहरु देखा परेकाले त्यसलाई सुधार गर्दै लैजानुपर्नेमा जोड दिनुभयो । नेपालका कतिपय मिडियाहरुले सत्य तथ्य भन्दा पनि आर्थिक लाभका लागि मिडिया संचालन गर्ने गरेको भन्दै त्यस्ता मिडियाहरुलाई नियमन गर्नुपर्ने बताउनुभएको छ ।

नेपाल पत्रकार महासंघ गुल्मीका पूर्व अध्यक्ष जनार्दन घिमिरेले युटुवर र पत्रकारहरुलाई एउटै डालोमा राखेर हेर्न नहुने बताउनुभयो । केही युटुबरहरुका कारण आम संचार माध्यमहरुलाई हेर्ने दृष्टिकोण एउटै भएकाले त्यसलाई प्रेस काउन्सिलले नियमन गर्नुपर्नेमा जोड दिनुभयो ।

विभिन्न संचारमाध्यममा काम गर्ने पत्रकारहरुले पारिश्रमिक नपाएको समयमा पारिश्रमिक दिनका लागि काउन्सिलले पहल गर्नुपर्नेमा यहाँका संचारकर्मीहरुले जोड दिएका छन् ।
जिल्लामा पत्रकारिताको अवस्था र पत्रकारहरको बारेमा पत्रकार महासंघ गुल्मीका अध्यक्ष टोपलाल अर्यालले जानकारी गराउनुभएको थियो । प्रेस काउन्सिलका वोर्ड सदस्य तथा पत्रकार ठाकुर बेल्वासेले आचार संहिता र बर्तमान अवस्थाका बारेमा सहजीकरण गर्नुभएको थियो ।

काउन्सिलका बोर्ड सदस्य सरदप्रसाद अधिकारीले काउन्सिलले आचार संहिता पालनाका लागि अनुगमन र नियमन गर्ने बताउनुभयो । कहिँकतै आचार संहिता विपरीतका कार्यहरु आफूहरुकोमा लिखीत र मौखिक रुपमा पनि आउने गरेकाले त्यसलाई नियमन गर्नमा काउन्सिल लाग्न बताउनुभयो । सरकारलाई कानून निर्माण गर्नका लागि पनि काउन्सिलले सहयोग गर्ने भएकाले सुझाबका रुपमा कार्यालयले काम गर्ने उहाँले बताउनुभयो ।

कार्यक्रममा जिल्ला स्थित सुरक्षा निकायका प्रमुखहरु, नागरिक समाज , संचारकर्मी लगायतको उपस्थिति रहेको थियो । कार्यक्रमको सहजीकरण काउन्सिलका मुख्य अधिकृत झबिन्द्र भुसालले गर्नुभएको थियो ।