जेठ, १८ ,२०७७ : म्याग्दीका कोरोना संक्रमितसँग एउटै बसमा आएका ६ जना सम्पर्कविहीन भएका छन् ।
गत जेठ ९ गते भैरहवाको नमुना माविबाट क्वारेन्टाइनमा बसेकाहरुलाई लिएर आएको बसमा सवार २३ जनामध्ये गोरखाका एक जनासहित ६ जना सम्पर्कविहीन भएका हुन् ।
उनीहरु सम्पर्कमा नभएपछि स्वास्थ्य निर्देशनालय गण्डकीले खोजी थालेको छ ।
म्याग्दीका संक्रमितको ट्राभल हिस्ट्री चेक गर्दा आँबुखैरेनीमा ओर्लिएका गोरखाका एक जना, पोखराको पुरानो बसपार्कमा ओर्लिएका २ जना र डुम्रेमा ओर्लिएका लमजुङका ३ जना सम्पर्क विहीन रहेको निर्देशनालयले जनाएको छ ।
म्याग्दीको मालिका गाउँपालिका–२ रुमका ३० वर्षीय पुरुषमा जेठ १५ गते कोरोना सङ्क्रमण पुष्टि भएको थियो।
