भदौ १३, २०७६ बाँके स् डुडुवा गाउँपालिकाले ‘ग’ र ‘घ’ वर्गका अपाङ्गता भएकालाई पनि विशेष सेवा सुविधा दिन परिचयपत्र वितरण थालेको छ। सरकारले ‘क’ र ‘ख’ वर्गका लागि मात्रै सेवा उपलब्ध गराए पनि गाउँपालिकाले ‘ग’ र ‘घ’ वर्गका अपाङ्गता भएकालाई पनि सेवा सुविधा दिन परिचयपत्र वितरण थालिएको हो। ‘ग’ र ‘घ’ वर्गका अपाङ्गता भएकाले सेव ासुविधाबाट बन्चित भएको गुनासो गरेपछि कार्यपालिकाको बैठकले ‘ग’ वर्गलाई ५०० र ‘घ’ वर्गलाई ४०० रुपैयाँ मासिक रुपमा उपलब्ध गराउने निर्णय गरेको गाउँपालिकाले जनाएको छ। अपाङ्गता अधिकार ऐन २०७४ अनुसार सबै स्थानीय तहलाई अपाङ्गता परिचयपत्र वितरण गर्न दिएको अधिकारअन्तर्गत गाउँपालिकाले परिचयपत्र वितरण गरेको हो। गाउँपालिका उपाध्यक्ष साहिदा बानोको संयोजकत्वमा गठित ११ सदस्यीय अपाङ्गता परिचयपत्र वितरण समन्वय समितिले गरेको निर्णयका आधारमा अपाङ्गता भएकाहरुको स्तर र गम्भीरता पहिचान गरी परिचयपत्र वितरण गरिरहेको गाउँपालिका अध्यक्ष नरेन्द्रकुमार चौधरीले बताए। परिचयपत्रका लागि अहिलेसम्म १३० जनाभन्दा बढीले निवेदन दिएको समितिले जनाएको छ। निवेदनमध्ये साउन महिनामा मात्रै ११० जनालाई परिचयपत्र वितरण गरिएको गाउँपालिकाका प्रमुख प्रशासकीय अधिकृत विष्णुप्रसाद धितालले जानकारी दिए। उनका अनुसार गाउँपालिकामा ‘क’ वर्गका १७ जना, ‘ख’ वर्गका २४ जना, ‘ग’ वर्गका ३२ जना र घ वर्गका ३७ जना रहेका छन्।
