तिलाचन पाण्डे
असार ६,२०८१ गुल्मी : गुल्मीदरबार गाउँपालिकाले सल्लाका रुखहरु विस्थापन गर्ने भएको छ ।
आर्थिक वर्ष २०८१।०८२ को नीति तथा कार्यक्रम प्रस्तुत गर्दै गाउँपालिकाका अध्यक्ष सरोजकुमार थापाले आगलागी र डढेलोको मुख्य कारक सल्लाका रुखहरु भएकाले त्यसलाई ब्यबस्थापन गर्ने नीति लिएको उहाँको भनाई छ । सल्लाका रुखहरु विस्थापन गरी अन्य रुखहरु रोप्ने र हरियाली बनाउने गरी पालिका लागेको नीति तथा कार्यक्रममा उल्लेख गरिएको छ ।
यस्तै खानेपानीका मुहानहरु सुक्दै गएकाले जलाधार संरक्षणका एक वडा पाँच पोखरी निर्माण गर्नै गरी गाउँपालिकाले नीति लिएको छ । पालिका भित्र रहेका ७ वटा वडाहरुमा न्यूनतम ३५ वटा सुक्खा पोखरी निर्माण गर्ने पालिकाले नीति लिएको छ । सुक्खा पोखरी निर्माणले जलाधार संरक्षण हुने र पानिका मुलहरु सुक्नबाट केही भएपनि राहत पुग्ने पालिकाले विश्वास लिएको छ ।
पछिल्लो समयमा जंगली जनावर बाँदर र बंदेलले कृषकहरुलाई सताएको भन्दै उक्त समस्याको समाधानमा पनि उचित पहल गरिने पालिकाले जनाएको छ ।
पालिकाले पर्यटकीय क्षेत्रको बिकासका निम्ती एक वडा एक पर्यटकीय गन्तब्य स्थाल अभियान सञ्चालन गर्ने नीति पनि लिएको जनाएको छ । पालिका भित्रका पर्यटकीय स्थलको पहिचान गरी एकिकृत पर्यटन बिकासलाई प्राथमिकतामा राखेको अध्यक्ष थापाले बताउनुभयो ।
