चन्द्रकोटमा १५० रोपनी क्षेत्रफलमा सामुहिक आलु खेती

0
42

तिलाचन पाण्डे
वैशाख ३०,२०८१ गुल्मीः गुल्मीमा १५० रोपनी क्षेत्रफलमा सामुहिक आलु खेती गरिएको छ ।

जिल्लाको चन्द्रकोट गाउँपालिका वडा नम्वर एक दिवु्रङको लुग्दीमा ३४ घररिवारले १४० रोपनी क्षेत्रफलमा सामुहिक आलु खेती गरेको वडा अध्यक्ष घनश्याम खरेलले जानकारी दिए ।
ग्रामीण स्तरका नागरिकहरुलाई गाउँमै रोजगारी र आत्मनिर्भर बनाउनका लागि सामुहिक  आलु खेतीमा लगाइएको खरेलको दाबी छ ।

 

गत वर्ष सामुहिक आलु खेतीबाट ४० लाख रुपियाँ आम्दामी भएको र आफूहरु आलु  खेतीबाट सन्तुष्ट रहेको उद्यमशिल कृषक समूहका अध्यक्ष घनश्याम खरेलले जानकारी दिए ।
यस वर्ष ५२ लाख वढीको आलु उत्पादन हुने लक्ष्य लिएको खरेलले बताए ।  उनले एकल प्रयासले मात्र नहुने भएकाले सामुहिकतामा जोड दिएको बताए ।  उक्त स्थानमा एम एस ४२ नामक जातको आलु लगाइएको छ ।

आलु पकेट बिकास कार्यक्रम अन्तर्गत १८ लाख र उद्यमशिलता अन्तर्गत समूहको १३ लाख ६८ हजार गरी कूल ३१ लाख ६८ हजार लगानी भएको चन्द्रकोट गाउँपालिकाका सूचना अधिकारी शिवप्रसाद ज्ञवालीले जानकारी दिए ।
कृषकहरुलाई आर्थिक रुपमा आत्म निर्भर र ब्यवसायीक बनाउनका लागि आफूहरुले प्राथमिकता दिएको गाउँपालिकाका अध्यक्ष युवराज केशीले जानकारी दिए । गाउँमै रोजगारी सृजना गरी बसाइँ सराइँको दरलाई पनि घटाउने गरी पालिकाले योजना बनाएको उनको दाबी छ ।

गुल्मीमा ८७१ हेक्टर क्षेत्रफलमा आलु खेती

जिल्लामा ८७१ हेक्टर क्षेत्रफलमा आलु खेती गरिएको कृषि ज्ञान केन्द्र गुल्मीले जनाएको छ ।
जिल्लाको चन्द्रकोट, मालिका, मदाने ,सत्यवती, गुल्मीदरबार गाउँपालिका  र मुसिकोट नगरपालिकामा ब्यवसायीक रुपमा आलु खेती हुने गरेको ज्ञान केन्द्रका प्रमुख नवराज भण्डारीले जानकारी दिए ।

गत वर्ष जिल्लामा  आठ हजार एक सय मेट्रीक टन आलु उत्पादन भएको र   दुई करोड ७१ लाखको आलु जिल्ला बाहिर निर्यात भएको भण्डारीले बताए ।

आलु खेतीका लागी ज्ञानकेन्द्रले प्राविधिक सहयोगका साथै अनुदान र प्रविधिहरु सहयोग गर्दै आएको जनाएको छ ।

SHARE