तिलाचन पाण्डे
माघ ४,२०८० गुल्मीः गुल्मीमा संस्कृति संरक्षण गर्नका लागि नौमती बाजा हस्तान्तरण गरेको छ ।
जिल्लाको इश्मा गाउँपालिकाले संस्कृति संरक्षण गर्न र ब्यवसायीक बनाई आत्मनिर्भर बनाउनका लागि नौमती बाजा हस्तान्तरण गरेको जनाएको छ ।
पालिकाको दुई लाख रुपियाँ बजेटबाट मगर समुदायका लागि नौमती बाजा हस्तान्तरण गरिएको गाउँपालिकाकी उपाध्यक्ष पार्वती कुँवरले जानकारी दिनुभयो । इश्मा गाउँपालिका ४ हुलको देवीस्थान युवा समूहलाई ब्यवसायीक बनाउनका साथै बाजा बजाएरै आत्मनिर्भर बनाउनका लागि यस्तो कार्यक्रम अगाडि बढाइएको उहाँको भनाइ छ ।
गाउँपालिकाले संस्कृति संरक्षण गर्नुका साथै सीप प्रदान गर्ने र ब्यवसायीक बनाइ आत्मनिर्भर बनाउनका लागि यस कार्यक्रमले थप टेवा पुग्ने विश्वास लिएको कुँवरले बताउनुभयो ।
पछिल्लो समयमा बाजा बजाउने सिप दोस्रो पुस्तामा हस्तान्तरण हुन नसकेको र लोप हुँदै गएकाले यसको संरक्षण गर्नमा पालिकाले सहयोग गरेको गाउँपालिकाले जनाएको छ ।
गाउँमै सीपको साथै आर्थिक रुपमा आत्मनिर्भर बनाउन सकेमा पछिल्लो समयमा मौलाएको बसाइँ सराइँलाई पनि रोक्न सकिने गाउँपालिकाका अध्यक्ष भगतसिंह खड्काले बताउनुभएको छ । यसका साथै युवाहरुलाई स्वदेशमा नै टिकाई राख्न र ब्यवसायीक बनाउनका लागि पालिकाले थप योजनाहरु बनाएको खड्काको भनाइ छ ।
युवा समूहको नेतृत्व नीरा हिताङले गर्नुभएको छ । महिलाले पनि समूहको नेतृत्व गर्न सक्छन् र आत्म निर्भर बन्न सक्ने उदाहरण प्रस्तुत गर्नका लागि पालिकाले थप सहयोग गर्दै जाने जनाएको छ । आफूहरुले नौमती बाजा बजाएरै संस्कृति संरक्षणको साथमा आत्मनिर्भर बन्ने गरी लागेको समूहकी अध्यक्ष नीरा हिताङले बताउनुभएको छ ।
महिलाहरु चुलो चौकोमा मात्र सीमित नभई केही गर्न सक्छन् भन्ने गतिलो उदाहरण प्रस्तुत गर्नका लागि आफूहरु लागेको उहाँको दाबी छ ।
मदाने गाउँपालिकाले पनि महिलाहरुलाई आत्मनिर्भर बनाउनका लागि नौमती बाजा हस्तान्तरण गरेको छ । महिलाहरुको नेतृत्वले सभा समारोहमा समेत नौमती बाजा बजाएर आत्मनिर्भर बन्न थालेका छन् ।
