तिलाचन पाण्डे
पुस २४,२०८० गुल्मीः सोमबारबाट गुल्मी जिल्लाको प्रमुख जिल्ला अधिकारीको जिम्मेवारी सम्हाल्नुभएका कृष्णप्रसाद शर्माले जिल्लामा शान्ती सुरक्षा कायम गर्नु पहिलो प्राथमिकता रहेको बताउनु भएको छ ।
मंगलवार जिल्ला स्थित राजनीतिक दल, सञ्चारकर्मीहरुसँगको भेटघाटका क्रममा उहाँले जिल्लाको शान्ती सुरक्षा कायम गर्नु पहिलो प्राथमिकता भएको बताउनुभयो ।
त्यस्तै विकास निर्माणका कामहरुमा हुने ढिलासुस्ती, अनियमितता र गुणस्तरता कायम गर्नमा आफूले ध्यान दिने बताउनुभएको छ । शर्माले प्रशासनिक कामको सुधारसँगै सेवाग्रहीलाई सेवामैत्री वातावरण तयार गर्न आफू सदैव तयार रहेको बताउनुभयो ।
सिमित कर्मचारीहरुबाट असिमित सेवाहरु प्रवाह गर्नुपर्ने भएकाले आन्तरिक रुपमा ब्यवस्थापन गरेरै भएपनि नागरिकलाई सहज रुपमा सेवा प्रवाह गर्नेमा ढुक्क हुन आग्रह गर्नुभयो । नागरिकलाई संबिधानले प्रत्याभूत गरेका अधिकारहरुलाई सहज तरिकाले प्रदान गर्दै जनमुखी सेवा प्रवाहमा मुख्य जोड दिने उहाँको भनाइ छ ।
केही दिन पहिले प्रमुख जिल्ला अधिकारी टेकबहादुर केसी उमेरहदका कारण अनिवार्य अवकाश भएपछि पुस १९ गते नयाँ प्रमुख जिल्ला अधिकारीको रुपमा शर्माले गुल्मीको जिम्मेवारी पाउनुभएको थियो । बाग्लुङ जिल्ला निवासी शर्मा गुल्मी जिल्लाको ४३ औं प्रमुख जिल्ला अधिकारी हुनुहुन्छ ।
