तिलाचन पाण्डे
पुस २१,२०८० गुल्मी :गुल्मीमा गाई भैसीमा देखा पर्ने बाँझोपन न्यूनीकरण गर्न कृषकको गोठमै गएर सेवा प्रदान गरिएको छ ।
भेटेरिनरी अस्पताल तथा पशुसेवा विज्ञ केन्द्र गुल्मीले २३ वटा गाई र ३१ वटा भैसी गरी कुल ५४ गाईभैसीको बाँझोपन न्यूनीकरण गर्नका लागि किसानको गोठमै गएर सेवा प्रदान गरेको छ ।
जिल्लाको रेसुङ्गा र मुसिकोट नगरपालिका, चन्द्रकोट,सत्यवती र कालीगण्डकी गाउँपालिकाका गरी ५४ गाइ भैसीमा बाँझोपन न्यूनीकरण गर्नका लागि सेवा प्रदान गरिएको कार्यालयका प्रमुख हुमकान्त पाण्डेयले जानकारी दिनुभयो ।
कृषकले पालेका गाई भैसीमा देखा पर्ने समस्याहरुको प्रत्यक्ष भेटघाट भएर डोर टु डोर सेवा प्रदान गर्ने हुँदा यो कार्यक्रम प्रभावकारी भएको कार्यालयले जनाएको छ । गाई भैसीको प्रजनन् अङगका साथै गर्भ परीक्षण, प्रजनन् तथा सम्बन्धित रोगहरुको निदान तथा उपचार , आवश्यक परामर्श र निःशुल्क औषधी समेत वितरण गरिएको पाण्डेयले बताउनुभयो ।
कृषकको गोठमै गएर सेवा प्रदान गर्दा गाई भैसीको पनि भिडियो एक्सरे हुँदो रहेछ भन्ने आफूहरुलाई बल्ल थाहा भएको कृषकहरुले बताएका छन् । मानिसलाई जस्तै गाइभैसीलाई पनि निरन्तर रुपमा चेकजाँच र औषधीको आवश्यक पर्ने थाहा भएकाले निरन्तर रुपमै चेकजाँच गर्ने र औषधि खुवाउन आफूहरु लाग्ने कृषकले बताउने गरेको कार्यालयले जनाएको छ ।
पशु स्वास्थ्य सेवा कार्यक्रमका लागि दुई लाख रुपियाँ बजेट रहेको कार्यालयले जनाएको छ । अहिले चेकजाँच गरिएका ५४ गाई भैसीको पुनः एकपटक चेकजाँच गरिने कार्यक्रम रहेको पाण्डेयले बताउनुभयो ।
