मंसिर २९,२०८० गुल्मी : इश्मा गाउँपालिकाका अध्यक्ष भगतसिंह खडकाले आफूलाई काम गर्न नदिन चौतर्फी घेराबन्दी गरेको बताउनुभएको छ ।
अख्तियार दुरुपयोग अनुसन्धान आयोग कार्यालय बुटवलले इश्मामा आयोजना गरेको भ्रष्टाचार नियन्त्रण र सुशासन प्रवद्र्धन सम्बन्धी स्थानीय तह स्तरीय अन्र्तक्रिया कार्यक्रममा खड्काले यस्तो बताउनुभएको हो ।
पालिकामा काम गर्ने उर्जालाई कमजोर बनाउनका लागि अख्तियारमा उजुरी राखेर दुःख दिनका लागि केही पक्षहरु हात धोएरै लागेको बताउँदै खडकाले मन सफा राखेर आफूले जनतालाई सेवा दिन पछि नपर्ने उद्घोष गर्नुभयो ।
अख्तियारले पनि कानुनको डन्डा बजाएर नहुँने भन्दै केही कुराहरुलाई ब्यबहारीक रुपमा हेर्नुपर्नेमा उहाँले जोड दिनुभयो ।
अख्तियार बुटवल कार्यालयका उपसचिव ठाकुर प्रसाद आचार्य, इन्जिनियर टीकाबहादुर थापा लगायतले कार्यालयले गर्ने कार्य , उजुरीका प्रकृतिहरु र काम कारवाहीका बारेमा जानकारी गराउनुभएको थियो ।
कार्यक्रममा सहभागीहरुले झुटा उजुरी दिनेलाई कारवाही र सही उजुरी दिनेलाई पुरस्कृत गर्नुपर्नेमा जोड दिएका थिए ।
इश्मा गाउँपालिकाका ७ वटा उजुरी हाल अख्तियारमा रहेका छन् ।
