तिलाचन पाण्डे
कात्तिक ३,२०८० गुल्मीः दशै तिहार जस्ता महान पर्वलाई लक्षित गर्दै ग्रामीण स्तरका सडकहरु धमाधम मर्मत गर्न थालिएको छ ।
चाडपर्वलाई लक्षित गर्दै ग्रामीण सडकहरु मर्मत गर्ने कार्यलाई तीव्रता दिएको कालीगण्डकी गाउँपालिकाकी उपाध्यक्ष मञ्जु दर्लामीले जानकारी दिनुभयो । देश तथा विदेशबाट दशै तिहार जस्ता पर्वहरु मनाउन गाउँमा आउनेको सङख्या पनि बढी हुने र वर्षा पनि रोकिएकाले सडक मर्मत गर्ने कार्यलाई तीव्रता दिएको उहाँको भनाई छ ।
वर्षा रोकिए सङगै विग्रिएका सडकहरुलाई मर्मत तथा सफा गर्दा यात्रामा सहज हुने र दुर्घटना न्यूनीकरणमा समेत टेवा पुग्ने आफूहरुले विश्वास लिएको दर्लामीले बताउनुभयो ।
यस्तै रुरुक्षेत्र गाउँपालिकाले पालिका भित्रका सबै सडकहरु मर्मत गर्ने कार्यलाई प्राथमिकता दिएको अध्यक्ष यदु ज्ञवालीले जानकारी दिनुभयो । केही दिन पहिले देखी सडक मर्मतका लागि डोजरहरु लगाइएको बताउँदै सडकहरु मर्मत गर्ने कार्यअन्तिम चरणमा पुगेको उहाँको भनाई छ ।
चन्द्रकोट गाउँपालिकाले वडाबाट कार्यन्वयन हुने गरी बजेट विनीयोजन गरेको र वडाको समन्वयमा सडक मर्मत तथा सफा गर्ने कार्य भइरहेको अध्यक्ष युवराज केशीेले जानकारी दिनुभयो ।
रेसुंगा नगरपालिकाका प्रमुख खिलध्वज पन्थीले ग्रामीण स्तरका सडक मर्मत गर्ने कार्य भइरहेको भन्दै दशैमा वर्षा नभएमा ग्रामीण स्तरका सडकहरु पनि सफा र चिटिक्क हुने दाबी गर्नुभयो ।
जिल्लाका दुई नगर र १० गाउँपालिका सहित १२ स्थानीय तहहरुले ग्रामीण स्तरका सडकहरु मर्मत तथा सफा गर्ने कार्यलाई तीव्रता दिएको बताउँदै आएका छन् ।
यता मदन भण्डारी राजमार्ग योजना कार्यालय तम्घासका प्रमुख माधव अधिकारीले राजमार्गमा खसेका पहिरोहरु पन्छाएको र सामान्य सडक मर्मत गर्नका लागि लेन्थ वर्करहरु लगाएको बताउनुभयो ।
