गुल्मी : गुल्मीमा उत्कृष्ट कार्य गर्ने १६ जना प्रहरी सम्मानित भएका छन् ।
मङगलबार ६८ औं प्रहरी दिवसको अवसरमा विभिन्न क्षेत्रमा कार्यरत १६ जना प्रहरीहरुलाई सम्मान गरिएको गुल्मी जिल्लाका प्रहरी नायव उपरीक्षक डिल्लीनारायण पाण्डेले जानकारी दिनुभयो ।
एक वर्षको अवधिमा कार्यालय मातहतमा रहेर सूचना संकलन, विपद् ,अपराध न्यूनिकरणका साथै विभिन्न क्षेत्रमा रहेर उत्कृष्ट कार्य गर्ने १६ जना प्रहरीलाई सम्मान गरिएको हो । यसरी उत्कृष्ट कार्य गर्ने प्रहरीलाई सम्मान गर्दा काममा थप उत्प्रेरण जाग्ने र आन्तरिक रुपमा पनि प्रतिस्पर्धा हुने उहाँ
को भनाई छ । सम्मानित हुनेमा कार्यालय सहयोगी देखी प्रहरी निरीक्षकसम्म रहेको पाण्डेले जानकारी दिनुभयो ।
यस्तै जिल्ला प्रहरी कार्यालय गुल्मीले इश्मा र रुरुक्षेत्रमा प्रहरी चौकी निर्माणका लागि निशुल्क रुपमा जग्गा उपलब्ध गराउँने जग्गादातालाई समेत सम्मान गरेको छ । जिल्ला प्रहरी कार्यालय गुल्मीले प्रहरी दिवसको अवसरमा निबन्ध लेखन प्रतियोगितामा प्रथम,द्धितिय,तृतिय स्थान हासिल गर्ने विद्यार्थीहरुलाई पुरस्कार समेत प्रदान गरेको छ ।
कार्यक्रमलाई सम्बोधन गर्दै गुल्मी जिल्लाका प्रमुख जिल्ला अधिकारी टेकबहादुर केशीले प्रहरीले गरेको कार्य उत्कृष्ट रहेको बताउँदै आफनो क्षेत्रमा थप परिस्कृत भएर लाग्नुपर्नेमा जोड दिनुभयो । प्रहरीले विपद्,अपराध अनुसन्धान ,सुरक्षा र नागरिकको सेवामा नजिकबाट कार्य गरेको भन्दै प्रहरीको खुलेरै प्रशंसा गर्नुभयो ।
गृह मन्त्रालयको कार्य सम्पादन मुल्याङकनमा गुल्मी जिल्ला प्रशासन प्रथम हुनुमा पनि प्रहरीको ५० प्रतिशत देन रहेको उहाँको तर्क छ ।
