तिलाचन पाण्डे
असार १४,२०८० गुल्मीः जेठ ३२ गते सत्यवती गाउँपालिकाका बैंक ,सहकारी लगायत घरहरु तोडफोड गरी नगद ,गरगहना चोरी भए , त्यो घटनाको दोषी पत्ता नलाग्दै कालीगण्डकीमा चोरी भएको छ ।
सोमबार राती कालीगण्डकी गाउँपालिका वडा नं ७ भुर्तुङको खमरे पाटा बस्ने सकुल थापाको घरबाट एक हजार पाँच सय नगद, रेनुका थापाको घरबाट मोवाइल सेट, कोपिला थापाको घरबाट आधा तोलाका सुनकोे औठी, देगराज पुनको घरबाट मोवाइल सेट, लुमबहादुर मगरको घरबाट मोवाइल सेट चोरी भएको जिल्ला प्रहरी कार्यालय गुल्मीले जनाएको छ ।
राती १२ः ३० बजे आफूहरुलाई चोरी भएको भन्ने सूचना आएको र लगत्तै जिल्लाको टोली घटनास्थल तर्फ गएको प्रहरी नायव उपरीक्षक डिल्लीनारायण पाण्डेले जानकारी दिनुभयो । प्रहरीको टोलीले सुक्ष्म रुपमा अनुसन्धान गरी रहेको पाण्डेले बताउनुभयो ।
सुरक्षा दिने राज्यको दायित्व : नागरिक समाज
नागरिक समाज गुल्मीका अध्यक्ष पदमप्रसाद पाण्डेले चोरीका घटनाहरुलाई नियन्त्रण गर्नका लागि प्रहरी प्रशासनले तदारुकता देखाउनुपर्नेमा जोड दिनुभयो । जनताको जिउ धनको सुरक्षा दिनु राज्यको दायित्व भएको भन्दै जनताले सुरक्षाको प्रत्याभूति पाउनु पर्ने उहाँको तर्क छ ।
जेठ ३२ गते राती सत्यवती गाउँपालिका वडा नम्वर एक अस्लेवामा जीतबहादुर मिदुनको घरमा शंकर थापाले संचालन गरेको औषधि पसलबाट ८ हजार नगद, पुष्पा अर्यालको करिब ३० हजार नगद , सीता होटलबाट छ हजार, तोयनारायणकी कान्छी बुहारीको घरबाट ४० हजार नगद र १५ तोला सुन , मति पाण्डेको घरबाट पुराना सामग्रीहरु चोरी भएको थियो
शुक्रबार अर्को वडा लिम्घामा रहेको कुमारी बैकंको ब्रान्चलेस बैकिङ शाखाबाट चार लाख नगद चोरी भएको र वडा कार्यालय तोडफोड भएको थियो ।
हुन त गुल्मीका लागि यो कुनै नौलो घटना भने होइन ,विगतका वर्षहरुमा पनि चन्द्रकोट ,गुल्मीदरबार , मालिका र सत्यवतीका विभिन्न स्थानहरुमा घर ,वडा कार्यालय तोडफोड गरी चोरी भयो । त्यी घटनामा संलग्नहरुलाई अझै सम्म पनि प्रहरीले सार्वजनिक गर्न सकेको छैन ।
यता जिल्ला प्रहरी कार्यालय गुल्मीका प्रमुख एसपी नविन किशोर प्रधानले चोरीका घटनामा स्थानीयहरुको पनि संलग्नता रहेको हुनसक्ने भन्दै सूचना प्राप्त गर्नु नै प्रमुख भएकाले सूचना दिई सहयोग गर्न पनि उहाँले स्थानीयहरुलाई आग्रह गर्नुभएको छ ।
आफूहरुसंग प्रयाप्त स्रोत साधन नभएकाले पनि अनुसन्धानमा केही समस्या भएको उहाँको भनाई छ । चोर नसमातिदा प्रहरीले काम गरेन जस्तो जनतालाई लागेको हुन सक्ने भन्दै आफूहरु अनुसन्धानमै रहेको दाबी गर्नुभयो ।
उक्त क्षेत्रमा स्याङजा र गुल्मीको सीमाना पनि भएकाले चोरीका घटनाहरु बढ्दै गएको बताउँदै त्यस क्षेत्रमा प्रहरी चौकी पनि आवश्यक रहेको उहाँको भनाई छ ।
अस्लेवामा चोरी हुँदाको केही दिन पहिले स्याङजाको कालीगण्डकी गाउँपालिकाका पाँच छ वटा घरहरुमा तोडफोड गरी चोरी भएको थियो ।
