फागुन १०,२०७९ गुल्मीः जिल्ला कारागार कार्यालय गुल्मीमा सिनीयर अहेवको दरवन्दी भए पनि २०७७ सालदेखी स्वास्थ्कर्मी नहुँदा समस्या भएको छ । लामो समय देखी दरबन्दीमा भएका स्वास्थ्यकर्मी प्रकाशचन्द्र घिमिरे स्वास्थ्य मन्त्रालयमा काजमा रहँदा कैदीबन्दीहरुलाई स्वास्थ्यमा समस्या आउँदा झनै समस्या आउने गरेको कार्यालयका सूचना अधिकारी सीता भण्डारीले जानकारी दिइन् ।
दरबन्दी भएर पनि स्वास्थ्यकर्मी नहुनु र २०७७ साल जेठ देखी हालसम्म स्वास्थ्य मन्त्रालयको काजमै रहँदा बिरामीहरुलाई अस्पतालसम्म लान पनि समस्या आउने गरेको उनको भनाई छ ।
सुरक्षाकर्मीको सहयोगमा कार्यालय सहयोगीले अस्पतालसम्म लैजाने र ल्याउने गरेको भण्डारीले बताइन । स्वास्थ्य कर्मी नुहँदा समस्या भोगीरहेका कैदीबन्दीहरुको रेखदेख र अनुगमन गर्ने जिल्ला प्रशासन कार्यालय गुल्मी भने देखेको नदेख्यै जस्तो गरी दुई वर्ष बिताएको छ । झारा टार्नका लागि मात्रै अनुगमन गर्ने र समस्याको समाधान गर्न तर्फ नलाग्नु दुःखद पक्ष रहेको छ ।
जिल्ला प्रशासन कार्यालय गुल्मीका सूचना अधिकारी हरिप्रसाद गैरेले काजमा रहेका स्वास्थ्यकर्मीलाई तत्काल फिर्ता बोलाउने र फिर्ता नआए करारमा भएपनि स्वास्थ्यकर्मीको ब्यबस्था गर्ने उनको भनाई छ । अन्य समस्यालाई पनि समाधान गर्ने गरी आफूहरुले पहल गरेको गैरेले बताए ।
स्वास्थ्य कार्यालय गुल्मीका प्रमुख पशुपति आचार्यले कारागारमा लामो समय देखी स्वास्थ्य कर्मी नहुँदा कैदीबन्दीहरुलाई समस्या भएको थाहा भएपनि आफूहरुको कार्यक्षेत्र भित्र नपरेको बताएका छन् ।
आफूहरु प्रदेश मातहत रहेको र कारागार कार्यालय संघ मातहत रहेकाले समस्या भएपनि समस्या छ भन्ने बाहेक अन्य बिकल्प नरहेको आचार्यले बताए ।
तेब्बर बढी कैदीबन्दी
बिसं २०२४ सालमा स्थापना भएको (ङ)बर्गको कारागारमा २० पुरुष र पाँच महिलाको क्षमता रहेपनि यहाँ अहिले तेब्बर भन्दा बढी कैदीवन्दी छन् । कारागारमा हाल ८० जना कैदीवन्दी छन् । जसमध्ये ७३ पुरुष र सात महिला कैदीवन्दी रहेको सूचना अधिकारी भण्डारीले जानकारी दिइन् ।
जिल्ला कारागारमा अहिले कैदी ४५ र थुनुवा २८ पुरुष छन् । पाँच कैदी र दुई थुनुवा महिला छन् । जसमा सबैभन्दा बढी क्रमश जबरजस्ती करणी, कर्तव्य ज्यान, चोरी, ज्यान मार्ने उद्योग, सवारी ज्यान, बहुबिवाह, सवारी ज्यान र अंगभंग लगायत मुद्दाका कैदीवन्दी छन् ।
सुधार गृहको कारागार हुनुपर्नेमा दण्ड गृह जस्तो भयो : नागरिक समाज
यता नागरिक समाज गुल्मीका अध्यक्ष पदम पाण्डेले कारागार सुधारगृह जस्तो कारागार हुनुपर्नेमा दण्ड गृहको रुपमा परिणत भएको बताए ।
कारागारमा प्रर्याप्त खेलमैदान, उचित बासस्थान र उद्यमी गर्नेहरुका लागि उचित ब्यबस्था हुनुपर्ने ठाउँमा राज्यको ध्यान नजानु दुःखद भएको उनको भनाई छ । भवन जीर्ण हुनु र कैदीबन्दीहरुको स्वास्थ्य प्रति सरोकारवाला निकाय मौन रहनुले कैदीबन्दीहरु प्रति सामान्य मानवीय ब्यबहार समेत नगरेको पाण्डेले बताए ।
जिल्ला कारागार गुल्मीमा १० जना कर्मचारीहरुको दरबन्दी रहेको कार्यालयले जनाएको छ । जसमा अधिकृत १,सि अहेव १,नायव सुब्वा १, खरिदार १,सहायक लेखापाल १ ,सहायक कम्प्युटर अपरेटर १ र कार्यालय सहयोगी ४ जना गरी १० जनाको दरबन्दी रहेको छ ।
कार्यालय प्रमुख काठमाडौं काजमा , खरिदार जिल्ला प्रशासन कार्यालय गुल्मीमा काज ,सि अहेव स्वास्थ्य मन्त्रालयमा लामो समय देखी काजमा रहेको कार्यालयले जनाएको छ ।
