पुस ४,२०७९ गुल्मीः छत्रकोट गाउँपालिकाका अध्यक्ष रामप्रसाद पाण्डेले गत बैशाखमा सम्पन्न स्थानीय तहको निर्वाचनमा विजयी भएपश्चात पदभार ग्रहण गर्दा गाउँपालिकामा २ वटा एम्बुलेन्स नल्याएसम्म सरकारी सेवा सुबिधाको सवारी प्रयोग नगर्ने घोषण गर्नुभएको थियो ।
गाउँपालिकाले भन्सार छुटमा ३७ लाख ५१ हजार ४३६ रुपियाँमा २ वटा एम्वुलेन्स ल्याएपश्चात आफुले पदभार ग्रहण गर्दा गरेको घोषण पूरा भएपश्चात सरकारी सेवा सुबिधा वापतको सवारी प्रयोग गरेको पाण्डेको भनाई छ ।
गाउँपालिका भित्र श्रङगा प्राथामिक स्वास्थ्य केन्द्र रहेको एउटा एम्बुलेन्स बाहेक अन्य एम्बुलेन्स नहुँदा सहज रुपमा स्वास्थ्य क्षेत्रमा बिरामीहरुको सेवा प्रवाह गर्न नसकिएको गाउँपालिकाले जनाएको छ ।
थप दुई वटा एम्बुलेन्स खरिद पश्चात गर्भवती महिलाहरु र बिरामीहरुलाई सहज रुपमा एम्बुलेन्स उपलब्ध गराउन सकिने भएकाले आफूले सरकारी सेवा सुबिधा बापतको सवारी प्रयोग गरेको पाण्डेले बताउनुभयो ।
नयाँ २ वटा एम्बुलेन्स मध्ये एउटा श्रङगा प्राथामिक स्वास्थ्य केन्द्रको मातहतमा र एउटा खरज्याङ स्वास्थ्य चौकीको मातहतमा रहने गरि निर्णय भएको गाउँपालिकाले जनाएको छ ।
पाण्डेले स्थानीय नागरिकको दैनिकीमा परिवर्तन नआएसम्म बिकास भएको भन्न नसकिने भन्दै दैनिकी परिवर्तन र आत्म निर्भर बनाउने गरी आफू लागेको बताउनुभयो ।गाउँपालिका भित्रका नागरिकहरुलाई ब्यवसायीक रुपमा कृषि र पशुपालन मार्फत आत्म निर्भर बनाउन सकिनेमा जोड दिनुभएको छ ।
सोही माध्यमबाट युवाहरुलाई स्वदेशमानै टिकाई राख्ने गरी आफूले दीर्घकालिन योजना बनाएको दाबी पनि गर्नुभएको छ । आफनो कार्यकालमा गाउँपालिकालाई नमुना गाउँपालिका बनाउने गरी आफू लागेको भन्दै यसमा सबैको साथ र सहयोग आवश्यक रहेको पाण्डेले बताउनुभयो ।
