गीताकुमारी बस्याल
मंसिर २४,२०७९ गुल्मीः गुल्मीका पाँच स्थानीय तहका कार्यालयहरु भाडाकै भबनमा छन् । करोडौ रकम स्थानीय तहको कार्यालय भाडामै खर्च भएको छ ।
जिल्लाको मुसिकोट नगरपालिका , इश्मा, गुल्मीदरबार ,कालीगण्डकी चन्द्रकोट गाउँपालिका हालसम्म पनि भाडाकै घरबाट सेवा प्रवाह गरेका छन् ।
जिल्लाको इश्मा गाउँपालिकाले २०७४ सालदेखी भाडाकै भवनबाट सेवा प्रवाह गरेको छ । मासिक ३३ हजारका दरले गाउँपालिकाको भवनको भाडा बुझाउँदै आएको गाउँपालिकाका सूचना अधिकारी नारायण महतले जानकारी दिए । साथै वडा नं २ को वडा कार्यालय पनि भाडामा बस्दै आएको उनले बताए ।
चन्द्रकोट गाउँपालिकाले स्थापना कालदेखीनै भाडाकै भवनबाट सेवा प्रवाह गरेको छ । गाउँपालिकाले चन्द्रकोट क्याम्पसको भवनबाट सेवा प्रवाह गरेको अहिले मासिक ९७ हजार रुपैयाँ क्याम्पसलाई भाडा बुझाउँदै आएको गाउँपालिकाका सूचना अधिकारी शिवप्रसाद ज्ञवालीले जानकारी दिए ।
गुल्मीदरबार गाउँपालिकाले तीन वटा भवनको मासिक ७४ हजार ९५१ मासिक भाडा तिर्ने गरेको सूचना अधिकारी नवराज भण्डारीले जानकारी दिए ।
कालीगण्डकी गाउँपालिकाले २ वटा भवन भाडामा लिएको छ उसले मासिक ९० हजार भाडा तिर्ने गरेको गाउँपालिकाका सूचना अधिकारी ओमबहादुर थापाले जानकारी दिए । यस्तै वडा नं १,४ र ७ का वडाहरुपनि भाडामा रहेको गाउँपालिकाले जनाएको छ ।
मुसिकोट नगरपालिकाले २ वटा भवनको मासिक ६२ हजारका दरले भाडा बुझाउँदै आएको सूचना अधिकारी मुना ज्ञवालीले जानकारी दिइन् । यस्तै २,३,४र ७ नम्वरका वडाहरु पनि भाडामै रहेका छन् ।
मुसिकोट नगरपालिका ,धुर्कोट गाउँपालिका ,रुरुक्षेत्र गाउँपालिका र चन्द्रकोट गाउँपालिकाका प्रशासकीय भवनहरु निर्माणधिन अवस्थामा रहेका छन् ।
गुल्मी जिल्लामा रेसुङगा नगरपालिकाले आफनै कार्यायबाट सेवा प्रवाह गरेको छ भने मुसिकोट नगरपालिकाको प्रशासकीय भवन पनि निर्माणधिन अवस्थामा छ ।
मदाने गाउँपालिकाले साबिकको गाबिस कार्यालय,मालिकाले गाउँपालिकाको सभाहल ,धुर्कोट गाउँपालिकाले बहुउद्येश्यीय सभाहल, छत्रकोट र सत्यवतीले सभाहलबाट र रुरुक्षेत्र गाउँपालिकाले कृषि सम्पर्क कार्यालयको भवनबाट सेवा प्रवाह गरिरहेको छ ।
रुरुक्षेत्र गाउँपालिकाको प्रशासकीय भवन निर्माणको अन्तिम चरणमा रहेको गाउँपालिकाका अध्यक्ष यदु ज्ञवालीले जानकारी दिए ।
