कात्तिक २९,२०७९ गुल्मी : स्याङजाको कालीगण्डकी गाउँपालिकाले गाउँपालिकाको लोगो र झण्डा डिजाइन गर्नेलाई ५०।५० हजार पारिश्रमिक दिने भएको छ ।
गाउँपालिकाका प्रमुख प्रशासकीय अधिकृत देबेन्द्र पाण्डेयद्धारा जारी गरिएको सूचनामा गाउँपालिकाको लोगो र झण्डा उत्कृष्ट डिजाइन गर्नेलाई प्रति डिजाइन ५० हजारका दरले पारिश्रमिक र प्रमाणपत्र उपलब्ध गराउने उल्लेख गरिएको छ ।
लोगो डिजाइनमा समग्र गाउँपालिकाको भौगोलिक,प्राकृतिक,सांस्कृतिक तथा सामाजिक चरित्र झल्कने र पालिका गानलाई सम्बोधन गर्ने प्रकृतिको हुनुपर्नेछ ।लोगोमा समाबेश भएका चित्र तथा शब्दहरुले मौलिक ब्याख्या तथा विश्लेषण समाबेश भएको हुनुपर्नेछ भने अन्य गाउँपालिकको लोगो भन्दा भिन्न र मौलिक डिजाइन भएको हुनुपर्ने सूचनामा उल्लेख गरिएको छ ।
यस्तै गाउँपालिकाको झण्डा डिजाइन गर्दा रङ तथा चित्रले सामाजिक , धार्मिक सहिष्णुता झल्कने हुनुपर्नेछ ।
झण्डामा प्रयोग भएको रङ तथा चित्रले अभिब्यक्त गर्न खोजेको अभिप्राय स्पस्ट रुपमा उल्लेख भएको हुनुपर्ने गाउँपालिकाले जारी गरेको सूचनामा उल्लेख गरिएको छ ।
झण्डाको डिजाइनमा नेपालको राष्ट्रिय झण्डा भन्दा फरक हुनुपर्नेछ भने झण्डाको आकार नेपालको राष्ट्रिय झण्डाको आकारको क्षेत्रफल भन्दा फरक नहुने उल्लेख गरिएको छ ।
गाउँपालिकाको लोगो र झण्डा डिजाइन गर्नका लागि गाउँपालिकामा मंसिर २० गतेसम्म प्रस्ताब पेश गर्न सक्ने गाउँपालिकाका प्रमुख प्रशासकीय अधिकृत देबेन्द्र पाण्डेयले जानकारी दिनुभयो ।
