सुशीला रेग्मी
रामपुर (पाल्पा), २० कात्तिक :आगामी मङ्सीर ४ गते हुन गइरहेको प्रतिनिधि सभा र प्रदेश सभा निर्वाचनमा मत बदर हुन नदिन पाल्पाको रामपुर नगरपालिकामा नमुना मतदान कार्य भएको छ ।
आईतवार रामतुलसी माविमा जिल्ला निर्वाचन कार्यालय पाल्पाको आयोजनामा नमुना मतदानको अभ्यास भएको छ । जिल्ला निर्वाचन कार्यालय पाल्पाका प्रमुख रुक्मागत अर्यालले पाल्पाका दशवटै स्थानीय तहमा नमुना मतदान गर्ने कार्यक्रम रहेको र सोही अनुसार रामपुरमा गरिएको बताउनुभयो ।
नमुना मतदान अभ्यासमा ३० जनाले मतदान गरेका छन् । रामपुर नगरपालिकाका प्रमुख रमणबहादुर थापाले नमुना मतदान गर्दै आफुले सिकेको सीप अरुलाई मतदान गर्ने तरिका सिकाउन अनुरोध गर्नुभएको छ ।
अझैपनि मतदान गर्ने प्रक्रिया जानकारी नहुदा धेरै मत बदर हुने गरेकाले आफ्नो मताधिकार सुरक्षित गर्न नमुना मतदान गर्न गाउँ टोलमा पुगेर एकले अर्कोलाई सिकाइयो भने बदर मत कम हुने नगर प्रमुख थापा बताउनुहुन्छ ।
रामपुर निर्वाचन कार्यालयका निर्वाचन अधिकृत गोपालप्रसाद ढकालले मताधिकार सही सदुपयोग गर्न सबैले सहयोग गर्नुपर्ने बताउनुभएको छ ।
