असोज २०,०७९ पाल्पा :पाल्पाको निस्दी–३, झिरुवास भलुवाका दुई युवा मृत अवस्थामा फेला परेका छन् ।
दसैँको अष्टमीको दिन घरबाट भलिबल खेल हेर्न हिँडेका भलुवाका २१ वर्षीय वीरेन्द्र सोमै र २३ वर्षका इन्द्रबहादुर खरुमगरको सब फेला परेको प्रहरीले जनाएको छ ।
निस्दी–४, मित्याल मौलाथरमा असोज १७ गते भलिबल हेर्न हिँडेका सोमै र खरुमगर घर फर्किएका थिएनन् । दुवै जनाको खोजी गर्दै जाँदा बुधवार बिहान निस्दी–४, मित्यालकै झल्र्याङ्दी खोलामा सोमैको शब फेला परेको थियो । अर्का खरुमगरको भने बुधवार साँझ निस्दी–५, ढुङ्गानावेशीस्थित खोलामा शब फेला परेको जिल्ला प्रहरी कार्यालय पाल्पाले जनाएको छ ।
मृत अवस्थामा भेटिएका दुवै युवाको शव रामपुर अस्पतालमा लगिएको छ । अस्पतालमा चिकित्सक नभएकाले पोस्टमार्टम हुन नसकेको प्रहरीले जनाएको छ ।
मित्यालका स्थानीय बासिन्दाले भने निस्दी–४, मित्यालस्थित झर्ल्याङ्दी खोल्साले बगाउँदा दुई जना युवाको मृत्यु भएको हुन सक्ने बताएका छन् । अष्टमीको राति ठूलो वर्षा परेको र त्यही वर्षसहित बढेको खोल्साले दुबैजनालाई बगाएको स्थानीय बासिन्दाको भनाई छ ।
जिल्ला प्रहरी कार्यालय पाल्पाका प्रहरी नायव उपरीक्षक वीरेन्द्र थापाले भने खोल्साले बगाएका दुई जनाको शब फेला फेला परेको र घटनाको बारेमा थप अनुसन्धान भइरहेको जानकारी दिए ।
