गीता बस्याल (पाण्डे)
भदौ ४,२०७९ गुल्मी : राष्ट्रिय भूमि आयोग जिल्ला समिति गुल्मीले हालसम्म भएका कार्यहरु सार्वजनिक गरेको छ ।
समितिले सदरमुकाम तम्घासमा पत्रकार भेटघाट कार्यक्रमको आयोजना गरि हालसम्म भएका प्रगतिहरु सार्वजनिक गरेको हो ।
जिल्ला अध्यक्ष राममल्ल ठकुरीले हालसम्म जिल्लामा भूमिहीन दलित , भूमिहीन सुकुम्वासी ,अब्यवस्थित बसोबासी र अधुरा अपुरा कार्यहरुको लगत संकलन भएको जानकारी दिए ।
जस अनुसार हालसम्म जिल्लामा भूमिहीन दलितहरु २७६ जना, भूमिहीन सुकुम्वासी २३१ जना, अब्यवस्थित बसोबासी एक हजार ५६६ जना गरी कूल दुई हजार ७३ जना रहेका छन् । यस्तै विगतका आयोगहरुबाट भएका अधुरा अपुरा कार्यहरुको कार्य सम्पन्न गर्न बाँकी रहेका सात सय ३४ फाइलहरु रहेको मल्लले बताए ।
७३४जना मध्ये २३० लाभग्राहीहरुको निवेदन प्राप्त भएको र प्राप्त निवेदनहरु छानविन गरी नापी कार्यालयबाट नक्सा प्रमाणित गर्ने, मालपोत कार्यालय मार्फत श्रेस्ता कायम गरी भदौ मसान्तसम्ममा कार्यसम्पन्न गर्ने गरी समितिले काम गर्ने कार्यतालिका रहेको मल्लले सुनाए ।
अधुरा अपुरा कार्यहरुका लाभग्राहीहरुले निवेदन दिन छुटेको भए दोस्रो पटक प्रकाशित सूचना अनुसार साउन ३१ देखि लागु हुने गरी ३५ दिन भित्र निवेदन दिन सकिने जिल्ला समिति गुल्मीका सदस्य सीता बलालले जानकारी दिइन् ।
यस्तै गरी रुरुक्षेत्र गाउँपालिकाबाट १८५ जनाको प्राप्त विवरण अनुसार जिल्ला समितिले तीन पुस्ते पारिवारीक विवरण सहित जग्गा पहिचानका लागि मालपोत कार्यालयमा पठाइएको छ । जग्गा पहिचान पश्चात जग्गा नापजाँचका लागि सूचना प्रकाशन गरी प्राविधिकहरु मार्फत काम अगाडि बढाइने छ । त्यस पश्चात दाबी बिरोधको सूचना प्रकाशन गरी निस्सा प्रदान गर्ने र लालपुर्जा वितरण गर्ने मल्लले बताए ।
यसै गरी अन्य स्थानीय तहबाट प्राप्त विवरणलाई पनि सोही प्रक्रिया मार्फत अगाडि बढाइने कार्यालयले जनाएको छ ।
जिल्ला समिति गुल्मीले जिल्लाका १२ वटै स्थानीय तहहरुसंग समस्या समाधानका लागि अन्र्तक्रिया गरेको थियो भने सरोकारवालाहरुसंग पनि बैठक बसेको कार्यालयले जनाएको छ ।
